އައު ޑޮމެސްޓިކް ޓަރމިނަލްތަ؟ ނޫނީ ޕީއެންސީ ޖަގަހައެއްތަ؟
15 ފެބުރުއަރީ 2026 | އާދީއްތަ 13:56ވެލާނާ އިންޓަނޭޝަނަލް އެއާޕޯޓުގެ އައު ޑޮމެސްޓިކް ޓާމިނަލްގެ އެތެރެ ފަރުމާކުރުމުގައި ސަރުކާރު ހިންގާ ޕީއެންސީގެ ކުލަތައް ބޭނުންކުރާތީ، އެއީ ވަކި ސިޔާސީ ފިކުރެއް ކުރިއެރުވުމަށް ކުރާ ކަމެއްގެ ގޮތުގައި ގިނަ ބައެއްގެ ފާޑުކިޔުން ވަނީ އަމާޒުވެފަ. މި މަޝްރޫއުގެ ތަފްސީލުތައް ހާމަނުކޮށް، އާންމުންނަށް ނުފެންނާނެހެން ފޮރުވައިގެން މަސައްކަތް ކުރިއަށްގެންދާތީ އެކަމުގެ ކަންބޮޑުވުން ފާޅުކުރަމުންދާއިރު، މިއީ ގައުމީ މުދަލެއްގައި ސިޔާސީ ކުލަޖެއްސުން ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ސުވާލު އުފައްދަމުން.
ވީއައިއޭ ގެ އައު ޑޮމެސްޓިކް ޓަރމިނަލް - އެތަނުގެ އެތެރެ ފަރުމާކުރުމުގައި ސަރުކާރު ހިންގާ ޕީއެންސީ ގެ ޑިޒައިނާ ކުލަ ބޭނުން ކޮށްފައިވާތީ ގިނަބަޔަކު ދަނީ ފާޑުކިޔަމުން. | ރާއްޖެ އެމްވީ
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ކުރީގެ ބައިނަލްއަގުވާމީ ޓަރމިނަލް ޑޮމެސްޓިކް ޓަރމިނަލަކަށް ބަދަލުކުރުމުގެ މަސައްކަތް އެމްއޭސީއެލް އިން ކުރިއަށްގެންދާއިރު، އެތަނުގެ އެތެރެ ފަރުމާކުރުމުގައި ސަރުކާރު ހިންގާ ޕީއެންސީ ގެ ޑިޒައިނާ ކުލަ ބޭނުން ކޮށްފައިވާ ތީ ގިނަ ބަޔެއްގެ ފާޑުކިޔުން ސަރުކާރާ އެމްއޭސީއެލް އަށް އަމާޒުވެއްޖެ އެވެ.
ސޯޝަލް މީޑިއާގައި މިހާރު ދައުރުވަމުންދާ ފޮޓޯތަކުން ފެންނަ ގޮތުގައި އައު ޑޮމެސްޓިކް ޓާމިނަލްގެ އެތެރޭގައި ބޭނުންކޮށްފައިވާ ކުލަތަކަކީ މިހާރުގެ ސަރުކާރު ހިންގާ ޕީއެންސީގެ ކުލަތަކެވެ. މިއީ ދައުލަތުގެ ބޮޑު ކުންފުންޏަކުގެ ހިންގާ މަޝްރޫއެއްގައި، ވަކި ސިޔާސީ ފިކުރެއް ކުރިއެރުވުމަށް ކުރާ ކަމެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
މި މަޝްރޫއާ ގުޅިގެން އެންމެ ގިނަ ބަޔަކު ފާޅުކުރަމުންދާ ކަންބޮޑުވުމަކީ މަސައްކަތް ކުރިއަށްދާ ގޮތުގެ އެއްވެސް ތަފްސީލެއް އާންމުންނަށް ހާމަނުކުރުމެވެ. އެއާޕޯޓުގެ އެންމެ މުހިންމު އެއް ބައި ތަރައްގީ ކުރަމުންދާއިރު، އެތަން މިހާރު ހުރީ ހުދު ފޮތި ދަމާ ނިވާކޮށްފަ އެވެ.
އާންމުންނަށް އެތެރޭގައި ހިނގާ ކަންކަން ނުފެންނާނެހެން ފޮރުވައިގެން މަސައްކަތް ކުރުމަކީ، "ފޮރުވިފައިވާ އެޖެންޑާއެއް" ގެ ތެރެއިން މި ސަރުކާރުން ކުރަމުންދާ ކަމެއް ކަމަށް ވެސް ބައެއް ފަރާތްތަކުން ދަނީ ބުނަމުންނެވެ.
މި މަސައްކަތުގެ އަގާއި، ބޭނުންކުރާ ސާމާނުގެ ފެންވަރު ބަލާނެ މިނިވަން ފަރާތެއް ނެތްކަން ވެސް ގިނަ ބަޔަކު ފާހަގަކުރާއިރު ކުންފުނީގެ މުވައްޒަފުން ލައްވައި، ރެޔާއި ދުވާލު "ފޮރުވިގެން" މި ގޮތަށް މަސައްކަތް ކުރުވުމުގެ ބޭނުމަކީ ކޮބައިކަމާ މެދު ވެސް ބައެއް ފަރާތްތަކުން ދަނީ ސުވާލު އުފައްދަމުންނެވެ.
ދިވެހިރާއްޖޭގެ މައި އެއާޕޯޓް ގެ އިންޓީރިއާ ޑިޒައިންގައި ވަކި ސިޔާސީ ޕާޓީއެއްގެ ކުލަވަރު ޖެއްސުމަކީ، ގައުމީ މުދަލަށް ޚިޔާނާތްތެރިވުން ކަމަށް ވެސް މިކަމަށް ފާޑުކިޔާ ބައެއް ފަރާތްތަކުން ވަނީ ބުނެފަ އެވެ. މީގެ އިތުރުން ސޯޝަލް މީޑިއާގައި ފާޑުކިޔާ ފަރާތްތަކުން ބުނާ ގޮތުގައި، މިއީ "އެއާޕޯޓުވެސް ޕާޓީ އޮފީހަކަށް ބަދަލުކުރުން" ފަދަ ކަމެކެވެ. އަދި އައު ޑޮމެސްޓިކް ޓަރމިނަލަކީ ޕީއެންސީ ޖަގަހައެއް ތޯ ވެސް ބައެއް ފަރާތްތަކުން ދަނީ ބުނެ، ސުވާލު އުފައްދަމުންނެވެ.
މިކަމާ ގުޅިގެން އެމްއޭސީއެލް ގެ ރަސްމީ ބަހެއް ވަނީ ލިބޭގޮތް ނުވެފަ އެވެ.
