އިރާނުން ހޯމޫޒް ކަނޑުއޮޅީގެ ބައެއް ސަރަހައްދުތައް ބަންދުކުރަނީ

އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ކުރިއަށްގެންދާ އަސްކަރީ ތަމްރީނުތަކާ ގުޅިގެން، "ސަލާމަތީ" ފިޔަވަޅެއްގެ ގޮތުން ހޯމޫޒް ކަނޑުއޮޅީގެ ބައެއް ސަރަހައްދުތައް ބަންދުކުރާނެ ކަމަށް އެ ގައުމުގެ ދައުލަތުގެ މީޑިއާ އިން އަންގާރަ ދުވަހު ރިޕޯޓްކޮށްފި އެވެ.

ހޯމަ ދުވަހު ފެށި މި ތަމްރީނުތައް ކުރިއަށްދާ ސަރަހައްދުގެ ކައިރީގައި ހުރެ ދައުލަތުގެ ޓީވީގެ ނޫސްވެރިއަކު މައުލޫމާތު ދިން ގޮތުގައި، ހޯމޫޒް ކަނޑުއޮޅީގެ ބައެއް ސަރަހައްދުތައް ބަންދުކުރަން ނިންމީ ކަނޑުދަތުރުފަތުރުގެ ރައްކާތެރިކަމުގެ އުސޫލުތަކަށް އިހުތިރާމް ކުރުމުގެ ގޮތުންނެވެ.

އޭނާ އިތުރަށް ބުނި ގޮތުގައި މި ސަރަހައްދުތައް ބަންދުކޮށްފައި އޮންނާނީ "މަދު ގަޑިއިރުތަކަކަށެވެ."

ހޯމޫޒް ކަނޑުއޮޅިއަށް ކުރިމަތިވެދާނެ "ސަލާމަތީ އަދި އަސްކަރީ ނުރައްކާތަކަށް" ތައްޔާރުވުމުގެ ގޮތުން އައިއާރްޖީސީ އިން ސިލްސިލާ އަސްކަރީ ތަމްރީނުތަކެއް ފަށާފައިވަނީ މިދިޔަ ހޯމަ ދުވަހުއެވެ.

ނަމަވެސް، މި އަސްކަރީ ތަމްރީނުތައް ކުރިއަށްދާނީ ކިހާ މުއްދަތަކަށް ކަމެއް ހާމަކޮށްފައެއް ނުވެ އެވެ.

އިރާނުން މި ތަމްރީނުތައް ފަށާފައި މިވަނީ، އެ ގައުމުގެ ނިއުކްލިއާ ޕްރޮގްރާމާ ގުޅޭ އެއްބަސްވުމަކަށް އައުމަށް ބާރު އެޅުމުގެ ގޮތުން އެމެރިކާ އިން ގަލްފް ސަރަހައްދަށް ކަނޑުގެ ބޮޑު ލަޝްކަރެއް ފޮނުވާފައިވާ ދަނޑިވަޅެއްގަ އެވެ.

އެމެރިކާ އާ ދެމެދު މަސްރަހު ގޯސްވާ ދަނޑިވަޅުތަކުގައި، ހޯމޫޒް ކަނޑުއޮޅި ބަންދުކުރާނެ ކަމުގެ އިންޒާރު އިރާނުގެ ސިޔާސީ ފަރާތްތަކުން ތަކުރާރުކޮށް ދެމުންދިޔަ ނަމަވެސް، މިހާތަނަށް އެ ކަނޑުއޮޅި އެއްކޮށް ބަންދުކޮށްފައެއް ނުވެ އެވެ.

އިންޓަނޭޝަނަލް އެނާޖީ އެޖެންސީގެ ތަފާސްހިސާބުތަކުން ދައްކާ ގޮތުގައި، ކަނޑުމަގުން އުފުލާ ތެލުގެ ހަތަރުބައިކުޅަ އެއްބައި އަދި ދުނިޔޭގައި ބޭނުންކުރާ ލިކުއިފައިޑް ނެޗުރަލް ގޭސް (އެލް.އެން.ޖީ) ގެ ފަސްބައިކުޅަ އެއްބައި އުފުލަނީ މި ކަނޑުއޮޅި ހުރަސްކޮށެވެ.

އައިއާރްޖީސީގެ ކަނޑުގެ ސިފައިންގެ ކޮމާންޑަރު އަލީރިޒާ ތަންގްސީރީ ވިދާޅުވީ، ހޯމޫޒް ކަނޑުއޮޅި އެއްކޮށް ބަންދުކުރުމުގެ ނިންމުން ބިނާވެފައިވަނީ އެ ގައުމުގެ އިސް ވެރިން ނިންމަވާ ގޮތެއްގެ މައްޗަށް ކަމަށެވެ.