ނިއުކްލިއާ ޕްރޮގްރާމާ ގުޅޭގޮތުން ކުރިމަތިކުރާ "އިންސާފެއް ނެތް ބޮޑެތި ޑިމާންޑްތަކަށް" އީރާނުން ދޫނުދޭނެ ކަމަށް އެ ގައުމުގެ ރައީސް ވިދާޅުވެއްޖެ
އީރާނުގެ އިސްލާމީ އިންގިލާބަށް 47 އަހަރު ފުރުމުގެ ޖަލްސާގައި ވާހަކަދައްކަވަމުން ރައީސް ވިދާޅުވީ، އެ ގައުމުގެ ހައްގުތަކަށް އުނިކަން އަންނަ ފަދަ އެއްވެސް ކަމަކަށް ބޯނުލަނބާނެ ކަމަށާއި، ނަމަވެސް ސަރަހައްދީ ހަމަޖެހުމަށްޓަކައި އަވަށްޓެރި ގައުމުތަކާއެކު މަޝްވަރާކުރަން ތައްޔާރަށް އޮތް ކަމަށް.
މަސްއޫދު ޕެޒެޝްކިއަން. | ގެޓީ އިމޭޖަސް
އެމެރިކާއާއެކު އީރާނުން އަލުން މަޝްވަރާތައް ފަށާފައިވާ ދަނޑިވަޅެއްގައި، އެ ގައުމުގެ ނިއުކްލިއާ ޕްރޮގްރާމާ ގުޅޭގޮތުން ކުރިމަތިކުރާ "އިންސާފެއް ނެތް ބޮޑެތި ޑިމާންޑްތަކަށް" އީރާނުން ދޫނުދޭނެ ކަމަށް އެ ގައުމުގެ ރައީސް މަސްއޫދު ޕެޒެޝްކިއަން ބުދަ ދުވަހު ވިދާޅުވެއްޖެ އެވެ.
އީރާނުގެ އިސްލާމީ އިންގިލާބަށް 47 އަހަރު ފުރުމުގެ މުނާސަބަތުގައި ވެރިރަށް ތެހެރާންގެ އާޒާދީ މައިދާނުގައި ވާހަކަދައްކަވަމުން ރައީސް ޕެޒެޝްކިއަން ވިދާޅުވީ، އީރާނުން އެ ގައުމުގެ ހައްގުތަކަށް އުނިވާނެ ފަދަ އެއްވެސް ކަމަކަށް ބޯނުލަނބާނެ ކަމަށެވެ. އީރާނުގެ ރައީސް މި މޭމެރުމުން ވާހަކަފުޅު ދެއްކެވީ އެމެރިކާ އިން އަސްކަރީ ހަމަލާއެއް ދީފާނެ ކަމުގެ ބިރުވެރިކަން އޮތް ދަނޑިވަޅެއްގަ އެވެ.
ރައީސް ޕެޒެޝްކިއަން އިތުރަށް ވިދާޅުވީ، އީރާނަށް ކުރިމަތިވާ އެއްވެސް އުދުވާނީ ހަމަލާއެއްގެ ކުރިމަތީގައި އެ ގައުމުން ކަނޑައެޅިގެން ދޫނުދޭނެ ކަމަށެވެ. ނަމަވެސް ސަރަހައްދީ ސުލްހަޔާއި ހަމަޖެހުން ގާއިމުކުރުމަށްޓަކައި އަވަށްޓެރި ގައުމުތަކާއެކު ކުރިއަށްގެންދާ މަޝްވަރާތައް މެދުނުކެނޑި ކުރިއަށް ގެންދާނެ ކަމަށް އޭނާ ވިދާޅުވި އެވެ.
މީގެ އިތުރުން، އީރާނުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއްކަން ސާބިތުކޮށްދިނުމަށްޓަކައި "ކޮންމެ ފަދަ ތަހުގީގަކަށް ނުވަތަ ވެރިފިކޭޝަނަކަށް" އީރާން ތައްޔާރަށް އޮތް ކަމަށް ޕެޒެޝްކިއަން ވިދާޅުވި އެވެ. އަދި ތެހެރާނުން ނިއުކްލިއާ ހަތިޔާރު އުފެއްދުމަށް މަސައްކަތް ނުކުރާ ކަމަށް އޭނާ ތަކުރާރުކޮށް ވިދާޅުވި އެވެ.
"އަޅުގަނޑުމެން ނިއުކްލިއާ ހަތިޔާރު ހޯދާކަށް މަސައްކަތެއް ނުކުރަން. މި ވާހަކަ އަޅުގަނޑުމެން ތަކުރާރުކޮށް ބުނެފިން. އަދި މިކަން ކަށަވަރުކުރުމަށް ކުރާ ކޮންމެ ތަހުގީގަކަށް ވެސް އަޅުގަނޑުމެން މިތިބީ ތައްޔާރަށް،" ރައީސް ޕެޒެޝްކިއަން ވިދާޅުވި އެވެ.
މަސްދަރު: އޭއެފްޕީ
