އީރާނުން ހޯމޫޒް ކަނޑުއޮޅީގައި އަސްކަރީ ތަމްރީނުތަކެއް ބާއްވައިފި
"ސްމާޓް ކޮންޓްރޯލް އޮފް ހޯމޫޒް ސްޓްރެއިޓް" ގެ ނަމުގައި ކުރިއަށްގެންދިޔަ މި ހަރަކާތްތަކަކީ އެ ގައުމުގެ އަސްކަރީ ފައުޖުތަކުގެ ތައްޔާރީ ހާލަތު ވަޒަންކުރުމަށް ބޭއްވި ތަމްރީނުތަކެއް.
އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކަނޑުގެ ސަފުތަކުން ބޭއްވި ކަނޑުމަތީ ޕެރޭޑެއްގައި، އެ ފައުޖުގެ "މާޓިއަރ ހަސަން ބަޣޭރީ" ހަނގުރާމަމަތީ މަނަވަރާއި، ބަސީޖް ޕެރަމިލިޓަރީ ފޯސްގެ ސްޕީޑް ބޯޓުތައް ޕާޝިއަން ގަލްފް ސަރަހައްދުގައި ދަތުރުކުރަނީ. | ގެޓީ އިމޭޖަސް
އީރާނާއި އެމެރިކާއާ ދެމެދު ނިއުކްލިއާ އެއްބަސްވުމާ ގުޅޭ މަޝްވަރާތައް އަލުން ފެށުމުގެ އެއް ދުވަސް ކުރިން، އީރާނުގެ ރިވޮލިއުޝަނަރީ ގާޑްސްގެ ކަނޑުގެ ސިފައިން ހޯމޫޒް ކަނޑުއޮޅީގައި ހާއްސަ ތަމްރީނުތަކެއް ބާއްވައިފި އެވެ.
ހޯމަ ދުވަހު މި ތަމްރީންތައް ކުރިއަށް ގެންދިޔަ ކަމަސް އެ ގައުމުގެ ސެމީ އޮފިޝަލް ނިއުސް އެޖެންސީއެއް ކަމަށްވާ ތަސްނީމް އިން ވަނީ ރިޕޯޓްކޮށްފަ އެވެ.
"ސްމާޓް ކޮންޓްރޯލް އޮފް ހޯމޫޒް ސްޓްރެއިޓް" ގެ ނަމުގައި ކުރިއަށްގެންދިޔަ މި ތަމްރީނުތަކަކީ، ކުރިމަތިވެދާނެ ސަލާމަތީ އަދި އަސްކަރީ ނުރައްކާތަކާ ދެކޮޅަށް އީރާނުގެ އަސްކަރީ ފައުޖުތަކުގެ ތައްޔާރީ ހާލަތު ވަޒަންކުރުމުގެ މަގްސަދުގައި ބޭއްވި ތަމްރީނުތަކެއް ކަމަށް ތަސްނީމް ނިއުސް އެޖެންސީން ވަނީ ބުނެފަ އެވެ.
