ޓްރަމްޕް: މެދުއިރުމައްޗަށް ދެވަނަ އެއަރކްރާފްޓް ކެރިއަރެއް ފޮނުވުން މިދަނީ ވިސްނަމުން
11 ފެބުރުއަރީ 2026 | ބުދަ 08:08އީރާނުން ނިއުކްލިއާ ހަތިޔާރު ހޯދުން ހުއްޓުވުމަށްޓަކައި އެމެރިކާ އިން އަސްކަރީ ފިޔަވަޅު އެޅުމަށް ތައްޔާރަށް އޮތް ކަމުގެ އިންޒާރު ރައީސް ޓްރަމްޕް ދެއްވައިފި. ދެ ގައުމުގެ ދެމެދުގައި މަޝްވަރާތައް ކުރިއަށްދާއިރު، ޑިޕްލޮމެޓިކް މަގުން ހައްލެއް ނުލިބިއްޖެ ނަމަ މީގެ ކުރިން ދިން ފަދަ ވަރުގަދަ ހަމަލާތަކެއް ދޭން ޖެހިދާނެ ކަމަށް ޓްރަމްޕް ވިދާޅުވި.
ޢަރަބި ކަނޑުގައި ހަރަކާތްތެރިވަމުންދާ ޔޫއެސްއެސް އަބްރަހަމް ލިންކަން ކެރިއަރ ސްޓްރައިކް ގްރޫޕްގެ މަންޒަރެއް - ފެބްރުއަރީ 6، 2026. | ސޯޝަލް މީޑިއާ
އީރާނާއެކު އޮތް ނުތަނަވަސްކަމާ ގުޅިގެން، އެމެރިކާގެ ދެވަނަ އެއަރކްރާފްޓް ކެރިއަރަކާއި އިތުރު އަސްކަރީ ވަސީލަތްތައް މެދުއިރުމައްޗަށް ފޮނުވުމާ މެދު ވިސްނަވަމުން ގެންދަވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު އިޒްރޭލުގެ މީޑިއާތަކަށް ވިދާޅުވެއްޖެ އެވެ.
ޓްރަމްޕް ވިދާޅުވީ ވޮޝިންޓަނާއި ތެހެރާނާ ދެމެދު މިހާރު މަޝްވަރާތައް ކުރިއަށްދާ ކަމަށާއި، އަސްކަރީ ކުރިމަތިލުމަކަށް ދިއުމުގެ ބަދަލުގައި އެއްބަސްވުމަކަށް އައުމަށް ދެ ފަރާތުން ވެސް ބޭނުންވާ ކަމަށެވެ. އަދި އީރާނަށް ނިއުކްލިއާ ހަތިޔާރު ހޯދުމުގެ ފުރުސަތު ދީގެން ނުވާނެ ކަމަށް ވިދާޅުވާ ވިދާޅުވުން އޭނާ ވަނީ އަނެއްކާވެސް ތަކުރާރު ކުރައްވާފަ އެވެ.
މީގެ އިތުރުން، މިދިޔަ ހޫނު މޫސުމުގައި އީރާނުގެ ބިމުގެ އަޑީގައި ހުރި ނިއުކްލިއާ މަރުކަޒުތަކަށް އެމެރިކާ އިން ދިން ހަމަލާތަކަށް އިޝާރާތް ކުރައްވައި ޓްރަމްޕް ވިދާޅުވީ، އެމެރިކާއިން ފިޔަވަޅު އަޅާނެ މިންވަރާ މެދު އީރާނުން އޭރު އޮތީ ގޯސްކޮށް އަންދާޒާކޮށްފައި ކަމަށެވެ.
އިސްރާއީލުގެ "ޗެނަލް 12" އަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، "މިދިޔަ ފަހަރު އަޅުގަނޑު އެކަން (ހަމަލާދިނުން) ކޮށްފާނެ ކަމަކަށް އެމީހުން ގަބޫލެއް ނުކުރޭ. އެމީހުންނަށް އޭރު އަމަލުކުރެވުނީ އަތުގައި އޮތް ބާރަށް ވުރެ މާ ބޮޑު ބާރެއް އޮތް ކަމަށް ހީކޮށްގެން،" ކަމަށެވެ.
އެމެރިކާއިން އީރާނަށް އެ ހަމަލާތައް ދީފައިވަނީ އީރާނުގެ ނިއުކްލިއާ ޕްރޮގްރާމާ ގުޅޭގޮތުން ދެ ގައުމުގެ ދެމެދުގައި ނުސީދާ މަޝްވަރާތަކެއް ކުރިއަށްދަނިކޮށެވެ. ނަމަވެސް މިހާރު ކުރިއަށްދާ މަޝްވަރާތައް "ވަރަށް ތަފާތު" ކަމަށާއި، އީރާނުން މިހާރު އެއްބަސްވުމަކަށް އައުމަށް ބޭނުންވާ މިންވަރު ބޮޑުކަން ޓްރަމްޕް ފާހަގަކުރެއްވި އެވެ.
ޓްރަމްޕް އިތުރަށް ވިދާޅުވީ އީރާނުން އެއްބަސްވުމަކަށް އައުމަށް "ވަރަށް ބޮޑަށް" ބޭނުންވާ ކަމަށެވެ. އެހެންނަމަވެސް، ޑިޕްލޮމެޓިކް މަގުން ކަންކަން ހައްލު ނުވެއްޖެ ނަމަ، ފިޔަވަޅު އެޅުމަށް އެމެރިކާ އޮތީ ތައްޔާރަށް ކަމުގެ އިންޒާރު އޭނާ ދެއްވި އެވެ.
މިކަމާ ގުޅޭގޮތުން ޓްރަމްޕް ވިދާޅުވީ، "އަޅުގަނޑުމެން އެއްބަސްވުމަކަށް އަންނާނަން، ނޫނީ މިދިޔަ ފަހަރެކޭ އެއްގޮތަށް ވަރަށް ވަރުގަދަ ފިޔަވަޅުތަކެއް އަޅަން ޖެހޭނެ،" ކަމަށެވެ.
އަދި އަސްކަރީ ގޮތުން ތައްޔާރުވުމުގެ ގޮތުން ކުރަމުންދާ މަސައްކަތްތަކުގެ ތެރެއިން، އެ ސަރަހައްދަށް އެމެރިކާގެ ދެވަނަ އެއަރކްރާފްޓް ކެރިއަރެއް ފޮނުވުމާ މެދު ވިސްނަވަމުން ގެންދަވާކަން ވެސް ރައީސް ޓްރަމްޕް ވަނީ ކަށަވަރުކޮށްދެއްވާފަ އެވެ.
މަސްދަރު: އަލް އަރަބިއްޔާ
