ގޭސް ހުސްވެ، ވިލާ ކުންފުނިން ގޭސް ގަނެގެން ވިއްކާ ކަމަށް ތުހުމަތު ކުރެވޭ މައްސަލަ އަށް މޯލްޑިވް ގޭހުން ޖަވާބު ދޭން ދެކޮޅު ހަދައިފި
26 ޖެނުއަރީ 2026 | ހޯމަ 07:39ކުރިއަށް އޮތް ރޯދަ މަހުގެ ކުރިން މޯލްޑިވް ގޭހަށް ގޭސް ލިބޭނެ ކަމުގެ ޔަގީންކަމެއް ނެތް.
މޯލްޑިވް ގޭސް ގެ 25 ވަނަ އަހަރީ ދުވަސް ފާހަގަކުރުމަށް ބޭއްވި ހަފްލާ އެއްގައި އެސްޓީއޯ އާއި މޯލްޑިވް ގޭހުގެ ވެރިން - އޮކްޓޯބަރު 3، 2024. | މޯލްޑިވް ގޭސް
އެސްޓީއޯ އިން އެތެރެ ކުރާ ގޭސް ހުސްވެ، ވިލާ ކުންފުނިން ގޭސް ގަނެގެން ވިއްކާ ކަމަށް ތުހުމަތު ކުރެވޭ މައްސަލައަށް މޯލްޑިވް ގޭހުން ޖަވާބު ދޭން ދެކޮޅު ހަދައިފި އެވެ.
ސަރުކާރުގެ ގޭސް ކުންފުންޏަށް އެސްޓީއޯ އިން އެތެރެކުރާ ގޭސް ހުސްވެފައިވާ ކަަމަށް އިތުބާރު ހުރި ފަރާތްތަކުން މައުލޫމާތު ދީފައިވެ އެވެ.
މައުލޫމާތު ލިބޭ ގޮތުގައި މޯލްޑިވް ގޭސް އިން މި ވަގުތު ޚިދުމަތް ފޯރުކޮށްދެމުން ދަނީ ވިލާއިން ގޭސް ގަނެގެން ކަމަށާއި، ކުރިއަށް އޮތް ރޯދަ މަހުގެ ކުރިން ގޭސް ލިބޭނެ ކަމުގެ ޔަގީންކަން ނެތް ކަމަށެވެ. އަދި ފެބްރުއަރީ މަހުގެ 15 ގައި އައު ޝިޕްމެންޓެއް ރާއްޖެ އަންނާނެ ކަމަށް މައުލޫމާތު ލިބޭ ކަމަށާއި، އެކަން ވެސް ކަށަވަރު ކުރެވިފައިނުވާ ކަމަށެވެ.
މީގެ އިތުރުން މިދިޔަ މިދިޔަ ހަފްތާ ތެރޭގައި ވެސް 8,000 އަށް ވުރެ ގިނަ ފުޅި، 12.97 ޑޮލަރުގެ ރޭޓުން ނަގާފައިވާ ކަަމަށް މައުލޫމާތު ލިބެ އެވެ.
މޯލްޑިވް ގޭސް އިން ރީޓެއިލްކޮށް ކަސްޓަމަރުންނަށް ގޭސް ފުޅި ވިއްކަމުން ދަނީ 200 ރުފިޔާ އަށެވެ. ބޮޑު އަގުގައި ވިލާ ކުންފުނިން ގޭސް ގަންނަމުންދާއިރު، މިއީ އެކުންފުންޏަށް ލިބޭނެ ގެއްލުމެކެވެ.
މި މައްސަލައާ ގުޅޭގޮތުން މައުލޫމާތު ހޯދުމަށް އެސްޓީއޯ އަށް ގުޅުމުން ބުނީ މައުލޫމާތު ހިއްސާކުރާނީ މޯލްޑިވް ގޭހުން ކަމަށެވެ. މޯލްޑިވް ގޭހުގެ ހޮޓްލައިން 1616 އަށް ގުޅުމުން ބުނީ ހެޑް އޮފީހަށް ގުޅުމަށެވެ. އަދި ހެޑް އޮފީހަށް ގުޅުމުން، ސޭލްސް އެންޑް މީޑިއާ ޑިޕާޓްމަންޓަށް ކޯލް ޕާސް ކުރި އެވެ. ފޯނު ނެގި ބޭފުޅާއާ ސުވާލު ކުރުމުން ހޮޓްލައިން އަށް ގުޅާށޭ ވިދާޅުވެ ފޯނު ކަނޑާލެއްވި އެވެ.
ފޮރުވާނެ އެއްވެސް އެއްޗެއް ނޯންނާނެ ކަމަށް ވިދާޅުވެ ރައީސް މުއިއްޒު ވެރިކަމަށް ވަޑައިގެންނެވި ނަމަވެސް، އާންމު ގޮތެއްގައި ވެސް ސަރުކާރުގެ ތެރެއިން މައުލޫމާތު ހޯދުމުގައި ހުރި ދަތިކަން މި ކަމުގައި ވެސް ވަނީ ކުރިމަތިވެފަ އެވެ. އެސްޓީއޯ އާއި މޯލްޑިވް ގޭހުގެ އިތުރުން ސަރުކާރުގެ އިސް ބޭފުޅެއްގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.
މޯލްޑިވް ގޭހުގެ ކޮރަޕްޝަންގެ ގިނަ މައްސަލަތަކެއް ވަނީ ފެންމަތިވެފަ އެވެ. މޯލްޑިވް ގޭސްގެ ގޭސް ޝިޕްމެންޓަކަށް އެޑްވާންސްގެ ގޮތުގައި ދެއްކި 250،000 ޑޮލަރު ގެއްލުނު މައްސަލައާ ގުޅިގެން ގޭސް ގަތުމުގެ މަސައްކަތް 13 އޭޕްރީލް 2025 އެސްޓީއޯ އާ ވަނީ ހަވާލުކޮށްފަ އެވެ.
