ގޭސް ކުންފުނީގެ އެމްޑީ އެ ކުންފުނީގެ ދޯނީގައި މަސްދަތުރުވަޑައިގެންފި
މޯލްޑިވް ގޭހުގެ މެނޭޖިންގް ޑިރެކްޓަރު އަބްދުﷲ މުހައްމަދު ކުންފުނީގެ ދޯންޏާއި ވަސީލަތްތައް ނަހަމަގޮތުގައި ބޭނުންކޮށްގެން މަސްދަތުރު ދާކަން ހާމަވެއްޖެ. މުވައްޒަފުން ބުނާގޮތުން އޭނާ ކުރިން ވެސް ބޮޑެތި ޕާޓީ އިންތިޒާމުކޮށް މިފަދަ ދަތުރުތައް ރާވާފައިވާއިރު މިފަހުން ގޭހުގެ ޝިޕްމަންޓަށް ދެއްކި 250،000 ޑޮލަރު ގެއްލުނު މައްސަލަ ފެންމަތިވުމުން ދަތުރުތައް މަދުކޮށްލައިފައިވޭ. މައްސަލަ ބަލައިދިނުމަށް ރައްޔިތުންގެ މަޖިލީހުގެ އެސްއޯއީ ކޮމިޓީއަށް ފޮނުވާފައިވާއިރު ގާބިލުކަން ނެތް ކުންފުންޏަކަށް އޯޑަރު ދިނީ އެމްޑީގެ އިރުޝާދުގެ މަތިންކަން ވެސް ވަނީ ހާމަވެފައި.
މޯލްޑިވް ގޭސް ގެ މެނޭޖިންގް ޑިރެކްޓަރު އަބްދުﷲ މުހައްމަދު އެ ކުންފުނީގެ ދޯންޏާއި ކުންފުނީގެ ވަސީލަތްތަކުގެ ނަހަމަ ބޭނުންކޮށްގެން މަސްދަތުރު ދަނީ | ރާއްޖެއެމްވީ
ރާއްޖެ އަށް ގޭސް އެތެރެކުރާ ސަރުކާރު ކުންފުނި، މޯލްޑިވް ގޭސް އިން ގޭހުގެ ޝިޕްމަންޓަކަށް ދެއްކި 250،000 ޑޮލަރު ގެއްލުވާލި ކަމަށް ގިނަ ބަޔަކު ތުހުމަތު ކުރާ އެ ކުންފުނީގެ މެނޭޖިންގ ޑިރެކްޓަރު އަބްދުﷲ މުހައްމަދު އެ ކުންފުނީގެ ދޯންޏާއި ކުންފުނީގެ ވަސީލަތްތަކުގެ ނަހަމަ ބޭނުންކޮށްގެން މަސްދަތުރު ދާ މައްސަލަ އެއް ފެންމަތި ވެއްޖެ އެވެ.
އަބްދުﷲ މުހައްމަދު ވަނީ އެ ކުންފުނީގެ ގޭސް އުފުލާ ދޯނި "ގޭސްމާ" ދޯނީގައި ހުކުރު ދުވަހު ވެސް މަސް ދަތުރު ގޮސްފަ އެވެ. މިއީ އޭނާ މިގޮތަށް ދަތުރު ރާވާ، ކުންފުނީގެ ވަސީލަތްތަކުގެ ބޭނުން ނަހަމަ ގޮތުގައި ހިފާ ފުރަތަމަ ފަހަރު ނޫން ކަން ވެސް ރާއްޖެއެމްވީ އަށް ވަނީ އެނގިފަ އެވެ.
މިކަމުގެ މައުލޫމާތު ހިއްސާކޮށް އެ ކުންފުނީގެ މުވައްޒަފަކު ރާއްޖެއެމްވީ އަށް ބުނީ އަބްދުﷲ މީގެ ކުރިން ވެސް މިގޮތަށް ބޮޑެތި ދަތުރުތައް ރާވާ ކަމަށެވެ. އަދި ކުންފުނީގެ ދޯނީގެ އިތުރުން ކުންފުނީގެ ބައެއް މުވައްޒަފުންނަށް ވެސް އަންގައިގެން އޭނާ ގެ މި މަސް ދަތުރު ތަކުގައި އެކި ބޭނުންތަކަށް ގެންދާ ކަމަށް ވެސް އެ މުވައްޒަފު ކިޔައިދިނެވެ.
މިފަހުން މޯލްޑިވް ގޭސް އިން ގޭހުގެ ޝިޕްމަންޓަކަށް ދެއްކި 2 ލައްކަ ޑޮލަރު ގެއްލުނު މައްސަލަ ފެންމަތި ވުމާއެކު އެ ދަތުރުތައް މަދު ކޮށްލާފައިވާ ކަން ފާހަގަކޮށް އޭނާ ބުނީ މީގެ ކުރިން ކުންފުނީގެ ދޯނީގެ އިތުރުން ބައެއް މުވައްޒަފުންނަށް އަންގާ ދަތުރު ރާވަނީ ބޮޑެތި ޕާޓީ އިންތިޒާމު ކުރާ އުސޫލުން ކަމަށެވެ. ހުކުރު ދުވަހު އަނެއްކާ ވެސް މިގޮތަށް ކުންފުނީގެ ވަސީލަތްތައް އަމިއްލަ ބޭނުމަށް ބޭނުން ކޮށްގެން މި ދަތުރު ގޮސްފައި ވަނީ ވަރަށް ސިއްރުން ކަމަށާ އެ ހުރިހާ އިންތިޒާމު ތައް ވެސް ހަމަޖައްސަނީ ވަރަށް ސިއްރުން ކަމަށް އޭނާ ކިޔައިދިނެވެ.
އަބްދުﷲ މުހައްމަދުގެ އިރުޝާދުގެ ދަށުން ގޭސް ގަންނަން ހަވާލުކުރި ފައިސާ ގެއްލުނު މައްސަލަ ތަހުގީގުކޮށްދޭން ރައްޔިތުންގެ މަޖިލީހުގެ އެސްއޯއީ ކޮމިޓީއަށް ވެސް މިހާރު ވަނީ ފޮނުވާފަ އެވެ. މި މައްސަލަ ބަލައިދޭން އެ ކޮމިޓީއަށް ހުށަހެޅުއްވީ މާވަށު ދާއިރާގެ މެމްބަރު އަހްމަދު ޝާކިރެވެ.
ގޭސް ޝިޕްމަންޓަށް ދެއްކި ފައިސާ ގެއްލިފައިވާ އިރު، ގާބިލުކަން ނެތް ކުންފުންޏަކަށް ގޭހުގެ އޯޑަރު ދިނީ އެމްޑީގެ އިރުޝާދުގެ މަތިން ކަން ވަނީ ހާމަވެފަ އެވެ. އެ ކުންފުންޏަށް އޯޑަރު ދިން އިރު ޖަކްސާ އެނަރޖީ ޓްރޭޑިންގ ކޮމްޕެނީ ވެންޑަރ އެއްގެ ގޮތުގައި މޯލްޑިވްސް ގޭސްގައި ރަޖިސްޓްރީ ކުރީ އެމްޑީގެ ހާއްސަ ހުއްދަ އަކާއި އެކުގަ އެވެ. ދުބާއީގައި ރަޖިސްޓްރީކޮށްފައިވާ އެ ކުންފުނިން 31 ޑިސެމްބަރު 2023 ގެ ތާރީހުގައި ހުށަހެޅި ފައިނޭޝަނަލް ސްޓޭޓްމަންޓަށް ބަލާ ނަމަ އެ ކުންފުންޏަށް އެ އަހަރު އާމްދަނީގެ ގޮތުގައި ލިބުނީނީ 1.4 މިލިއަން ޑޮލަރެވެ.
އެ ފައިސާ އެ ކުންފުނީގެ އެމްޑީ ވަގަށް ނެގި ކަމަށް ދޭހަވާ މޭރުމަކުން ޕީއެންސީގެ ޕާލަމެންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވެސް ވަނީ ވާހަކަ ދައްކަވައިފި އެވެ.
މޯލްޑިވްސް ގޭހަށް ގޭސް ގަތުމަށް ދުބާއީގެ ޖަކްޝާ އެނަރޖީއަށް އެޑްވާންސް ފައިސާގެ ގޮތުގައި ޝިޕްމެންޓުގެ 30 ޕަސެންޓުގެ ފައިސާ ކަމަށްވާ 246،645 ޑޮލަރު ނުވަތަ 3.7 މިލިއަން ރުފިޔާ ދެއްކީ އޮކްޓޫބަރު 2024ގަ އެވެ. ގޭސް ޝިޕްމެންޓެއްގެ އެޑްވާންސަށް ދެއްކި ފައިސާ ގެއްލުނުކަން ހާމަކުރެއްވީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމެއްގައި މަޖިލީހުގެ ނައިބު ރައީސް އަހްމަދު ނާޒިމެވެ. 2024 ވަނަ އަހަރު ލިކުއިފައިޑް ޕެޓްރޯލިއަމް ގޭސް ޝިޕްމަންޓަކަށް ދެއްކި އެޑްވާންސް ފައިސާ ކަމަށް ނާޒިމް ކޮމިޓީގައި ހާމަކުރެއްވި އެވެ.
