ގޭހުގެ އެމްޑީ ގެ އިރުޝާދުގެ ދަށުން ގޭސް ގަންނަން ހަވާލުކުރި ފައިސާ ގެއްލުނު މައްސަލަ އެސްއޯއީ ކޮމިޓީއަށް ހުށަހަޅައިފި
މޯލްޑިވް ގޭހުން ގޭސް ޝިޕްމަންޓަކަށް އެޑްވާންސް ފައިސާގެ ގޮތުގައި ދުބާއީގެ ޖަކްސާ އެނާޖީއަށް ދެއްކި 246،645 ޑޮލަރު ގެއްލުނު މައްސަލަ ރައްޔިތުންގެ މަޖިލީހުގެ އެސްއޯއީ ކޮމިޓީއަށް ހުށަހެޅީ މެންބަރު ޝާކިރު. ގާބިލުކަން ނެތް އެ ކުންފުންޏަށް އޯޑަރު ދިނީ މޯލްޑިވްސް ގޭހުގެ މެނޭޖިން ޑިރެކްޓަރު އަބްދުﷲ މުހައްމަދުގެ އިރުޝާދުގެ މަތިންކަން ހާމަވެފައިވާއިރު، އޭސީސީން އަންނަނީ މި މައްސަލަ ތަހުގީގު ކުރަމުން.
މޯލްޑިވް ގޭސްގެ މެނޭޖިންގ ޑިރެކްޓަރ އަބްދުالله މުހައްމަދު | މޯލްޑިވް ގޭސް
މޯލްޑިވް ގޭހުގެ މެނޭޖިން ޑިރެކްޓަރު އަބްދުﷲ މުހައްމަދުގެ އިރުޝާދުގެ ދަށުން ގޭސް ގަންނަން ހަވާލުކުރި ފައިސާ ގެއްލުނު މައްސަލަ ތަހުގީގުކޮށްދޭން ރައްޔިތުންގެ މަޖިލީހުގެ އެސްއޯއީ ކޮމިޓީއަށް ހުށަހަޅައިފި އެވެ.
މި މައްސަލަ ބަލައިދޭން އެ ކޮމިޓީއަށް ހުށަހެޅުއްވީ މާވަށު ދާއިރާގެ މެމްބަރު އަހްމަދު ޝާކިރެވެ. އޭނާ ފޮނުއްވި ސިޓީގައި ވިދާޅުވީ މޯލްޑިވް ގޭސް އިން އޮކްޓޯބަރު 2024 ގައި އޯޑަރު ކޮށްފައިވާ 800،000 ޑޮލަރުގެ ގޭސް ޝިޕްމަންޓުގެ އެޑްވާންސް ފައިސާގެ ގޮތުގައި ދެއްކި 246،645 ޑޮލަރު ގެއްލިފައިވާ މައްސަލައަކީ ސަރުކާރު ހިއްސާވާ ކުންފުންޏަކަށް ކުރެވޭ ސީރިއަސް ތުހުމަތެއް ކަމަށެވެ. އެހެން ކަމުން އެކަމުގެ މައުލޫމާތު ހޯދުމުގެ އިތުރުން އޭގެ ފުރިހަމަ ތަހުގީގެއް ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް ކޮމިޓީ މެދުވެރިކޮށް ހިންގައި ދިނުމަށެވެ.
މޯލްޑިވްސް ގޭހަށް ގޭސް ގަތުމަށް ދުބާއީގެ ޖަކްޝާ އެނާޖީއަށް އެޑްވާންސް ފައިސާގެ ގޮތުގައި ޝިޕްމެންޓުގެ 30 ޕަސެންޓުގެ ފައިސާ ކަމަށްވާ 246،645 ޑޮލަރު ނުވަތަ 3.7 މިލިއަން ރުފިޔާ ދެއްކީ އޮކްޓޫބަރު 2024ގަ އެވެ.
ގޭސް ޝިޕްމެންޓެއްގެ އެޑްވާންސަށް ދެއްކި ފައިސާ ގެއްލުނުކަން ހާމަކުރެއްވީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމެއްގައި މަޖިލީހުގެ ނައިބު ރައީސް އަހްމަދު ނާޒިމެވެ. 2024 ވަނަ އަހަރު ލިކުއިފައިޑް ޕެޓްރޯލިއަމް ގޭސް ޝިޕްމަންޓަކަށް ދެއްކި އެޑްވާންސް ފައިސާ ކަމަށް ނާޒިމް ކޮމިޓީގައި ހާމަކުރެއްވި އެވެ.
މެމްބަރު ޝާކިރުގެ ސިޓީގައި ވަނީ މޯލްޑިވްސް ގޭސްގެ މެނޭޖިން ޑިރެކްޓަރު އަބްދުﷲ މުހައްމަދަށް ވެސް ތުހުމަތެއް ކުރައްވާފަ އެވެ. އެއީ މޯލްޑިވްސް ގޭސްގެ މެނޭޖިން ޑިރެކްޓަރު އަބްދުﷲ މުހައްމަދު މީސްމީޑިއާގައި ރައްޔިތުންގެ މަޖިލީހުގެ މެންބަރުން ކަމަށްވާ ވައިކަރަދޫ ދާއިރާގެ މެންބަރު ހުސައިން ޒިޔާދު އަދި ހުޅުމާލެ ދެކުނު ދާއިރާގެ މެންބަރު ޑޮކްޓަރ އަހްމަދު ޝަމްހީދުއަށް ބިރުދެއްކުން ދޭހަވާފަދަ ގޮތަކަށް ޕޯސްޓެއް ކޮށްފައިވާތީ އެވެ.
މެމްބަރު ޝާކިރު ވިދާޅުވީ މީސްމީޑިއާގައި މަޖިލީހުގެ މެންބަރުންނަށް ބިރުދެއްކުން ދޭހަވާފަދަ ގޮތަކަށް ޕޯސްޓެއް ކުރުމަކީ ވެސް ރައްޔިތުންގެ މަޖިލީހުގެ ކަމާއި ބެހޭ ކޮމެޓީއިން ބައްލަވައިދެއްވަންޖެހޭ ކަމެއް ކަމަށެވެ.
ގޭސް ޝިޕްމަންޓަށް ދެއްކި ފައިސާ ގެއްލިފައިވާ އިރު، ގާބިލުކަން ނެތް ކުންފުންޏަކަށް ގޭހުގެ އޯޑަރު ދިނީ އެމްޑީގެ އިރުޝާދުގެ މަތިން ކަން ވަނީ ހާމަވެފަ އެވެ. އެ ކުންފުންޏަށް އޯޑަރު ދިން އިރު ޖަކްސާ އެނަރޖީ ޓްރޭޑިންގ ކޮމްޕެނީ މޯލްޑިވްސް ގޭސްގެ ވެންޑަރ އެއްގެ ގޮތުގައި ރަޖިސްޓްރީ ކުރީ އެމްޑީގެ ހާއްސަ ހުއްދަ އަކާއި އެކުގަ އެވެ. ދުބާއީގައި ރަޖިސްޓްރީކޮށްފައިވާ އެ ކުންފުނިން 31 ޑިސެމްބަރު 2023 ގެ ތާރީހުގައި ހުށަހެޅި ފައިނޭޝަނަލް ސްޓޭޓްމަންޓަށް ބަލާ ނަމަ އެ ކުންފުންޏަށް އެ އަހަރު އާމްދަނީގެ ގޮތުގައި ލިބުނީނީ 1.4 މިލިއަން ޑޮލަރެވެ.
އެ އަދަދަކީ މޯލްޑިވްސް ގޭސްގެ ޤަވާއިދުގައި ބުނާ މިންގަނޑު ހަމަވުމަށް 3.6 މިލިއަން ޑޮލަރު މަދު އަދަދެކެވެ.
މޯލްޑިވްސް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާތައް ވީނުވީއެއް ނޭނގި ގެއްލުނު މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ވަނީ ތަހުގީގުކުރަން ފަށާފަ އެވެ.
