މިއަދު ޕީއެންސީ އާއި ކުރަންވީ ސުވާލަކީ ބަޖެޓް އެހާ ބޮޑު އިރު ކުރާ މަސައްކަތެއް ނުފެންނަނީ ކީއްވެގެންތޯ: ފުވައްމުލައް ސީޓީގެ މޭޔަރ
ބަޖެޓުގެ ތަފްސީލުތައް ސިޓީ ކައުންސިލްތަކަށް ސާފުނުވާތީ، ތަރައްގީގެ މަޝްރޫއުތަކާ މެދު ސަރުކާރާ ސުވާލުކުރުމަށް ހުރަސްތަކެއް ކުރިމަތިވެފައިވާ ކަމަށް ފުވައްމުލައް ސިޓީގެ މޭޔަރު އިސްމާއީލް ރަފީގު ވިދާޅުވި. ދައުލަތުގެ އާމްދަނީ ދަށްނުވި ނަމަވެސް ރަށްރަށުގެ ތަރައްގީއަށް މި ސަރުކާރުން މަސައްކަތް ނުކުރާ ކަމަށް ތުހުމަތުކުރައްވައި، ކުރިއަށް އޮތް ކައުންސިލް އިންތިޚާބަކީ ސަރުކާރުގެ ސިޔާސަތުތަކަށް ނޫނެކޭ ބުނަން ލިބޭ ފުރުސަތެއްގެ ގޮތުގައި އޭނާ ފާހަގަކުރެއްވި.
ފުވައްމުލައް ސިޓީގެ މޭޔަރ އިސްމާއީލް ރަފީޤު، ފުވައްމުލަކުގައި ބޭއްވި އެމްޑީޕީގެ "ހޭވައްލާ ތައްޔާރު" ޖަލްސާގައި ވާހަކަދައްކަވަނީ. | ސްކްރީން އިމޭޖް
މި ސަރުކާރުން އެކުލަވާލާ ބަޖެޓް އެހާ ބޮޑު އިރު ވެސް ސަރުކާރުން ކުރާ މަސައްކަތެއް ނުފެންނަނީ ކީއްވެގެންތޯ ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އާއި މިއަދު ސުވާލު ކުރަަން ޖެހޭ ކަމަށް ފުވައްމުލައް ސިޓީގެ މޭޔަރ އިސްމާއީލް ރަފީޤު ވިދާޅުވެއްޖެ އެވެ.
ހޯމަ ދުވަހުގެ ރޭ ފުވައްމުލަކުގައި ބޭއްވި އެމްޑީޕީގެ "ހޭވައްލާ ތައްޔާރު" ޖަލްސާގައި ވާހަކަދައްކަވަމުން އޭނާ ވިދާޅުވީ ކުރިން ސަރުކާރުން ފާސްކުރާ ބަޖެޓާއި އެ ބަޖެޓުން ސިޓީތަކާއި ރަށްތަކަށް ކަނޑައަޅާ ކަންކަން ސާފުކޮށް އެނގެން އޮންނަ ކަމަށެވެ. ނަމަވެސް މި ސަރުކާރު ވެރިކަމަށް އައި ފަހުން އެކަން ބަދަލުވެފައިވާ ކަމަށާއި ކައުންސިލަށް ވެސް އެ ރަށަކަށް ނުވަތަ ސިޓީ އަކަށް ކަނޑައަޅާ ކަންކަމުގެ ތަފްސީލްތައް އެނެގް ނެތް ކަމަށް މޭޔަރ ވިދާޅުވި އެވެ.
މޭޔަރ ވިދާޅުވީ ސަރުކާރުން ކަނޑައަޅާ ބަޖެޓުގެ ތަފްސީލީ މައުލޫމާތު އެނގެން ނެތުމަކީ ސިޓީގެ ތަރައްގީ އާއި މެދު ސަރުކާރާއި ސުވާލުކޮށް ކަންކަން އޮޅުން ފިލުވުމަށް އޮތް ހުރަހެއް ކަމަށެވެ. އަދި 2023 އިން ފެށިގެން މިހާތަނަށް ފުވައްމުލަކުގެ ކުރިއެރުމަށް މި ސަރުކާރަށް މަސައްކަތް ކޮށް ނުދެވޭ ކަމަށް އޭނާ ވަނީ ވިދާޅުވެފަ އެވެ. އެހެންކަމުން ކުރިއަށް އޮތް ކައުންސިލް އިންތިޚާބަކީ ސަރުކާރުން ކުރަމުންދާ ނުރަނގަޅު ކަންކަމަށް ޖަވާބުދިނުމަށް ރައްޔިތުންނަށް ލިބޭ ފުރުސަތެއްގެ ގޮތުގައި ބަަލަން ޖެހޭ ކަމަށް އޭނާ ވަނީ ވިދާޅުވެފަ އެވެ. ކުރިއަށް އޮތް ކައުންސިލް އިންތިޚާބުގައި އެމްޑީޕީގެ ކައުންސިލެއް ހޮވައިގެން ނޫނީ ރައްޔިތުން ބޭނުންވާ ތަރައްގީ ނުލިބޭނެ ކަމަށް ވެސް އޭނާ ވިދާޅުވި އެވެ.
"ސަރުކާރުގެ ގޮތެއް ފޮތެއް ނެތް ޕޮލިސީތައް ގަބޫލު ނުކުރާކަން ބުނަން ފުރުސަތު ލިބޭ ފުރުސަތެއް މިއީ. އެކަންކަމާއި އޯކޭ ނޫންކަން ބުނަން ލިބޭ ފުރުސަތެއް މިއީ. މީހުން ދޮގު ވެސް ހަދާ އެކަމަކު މި ވަރު ކަމެއް ނުދެކެން. ދޮގު ފޮތެއް ވެސް އެބަ އޮތް ލިޔެފައި." އޭނާ ވިދާޅުވި އެވެ.
މީގެ އިތުރުން ކޮވިޑްގެ ހާލަތުގައި ދިމާވި ބޮޑެތި ގޮންޖެހުންތަކާއި އެކު ވެސް ރާއްޖޭގައި ތަރައްގީގެ ކަންކަން ކުރިއަށް ދިޔަ ކަމަށް މޭޔަރ ވަނީ ފާހަގަކުރައްވާފަ އެވެ. މޭޔަރ ވިދާޅުވީ ކުރިއާއި އަޅާ ބަލާ އިރު ރާއްޖޭގެ އާމްދަނީ ދަށް ވެފައި ނުވާ ކަމަށެވެ. އެހެންކަމުން ތަރައްގީގެ މަޝްރޫޢުތައް ނުހިނގާ ސަބަބާއި މެދު މޭޔަރ ސުވާލު އުފެއްދެވި އެވެ. މޭޔަރ އިސްމާއިލް ވަނީ މި ސަރުކާރަށް އިޚުލާސްތެރިކަމާއި އެކު މަސައްކަތް ނުކުރެވޭ ކަމަށް ވެސް ވިދާޅުވެފަ އެވެ.
