ސިޓީސް މިނިސްޓްރީ އިން ކެނދިކުޅުދޫގައި ތަރައްގީ ކުރާ ޕާކުގެ މައުލޫމާތަކީ ސިއްރެއް!

ސިޓީސް މިނިސްޓްރީ އިން ނ. ކެނދިކުޅުދޫގައި ތަރައްގީ ކުރާ ޕާކުގެ މަސައްކަތް ހުއްޓިފައި އޮތް އިރު އެ މަޝްރޫއާއި ގުޅޭ މައުލޫމާތު ކައުންސިލުން އެދިގެން ވެސް މިނިސްޓްރީ އިން ފޯރުކޮށް ނުދިން ކަމަށް އެރަށު ކައުންސިލްގެ މެންބަރު މުހައްމަދު ޝާހިދު ވިދާޅުވެއްޖެ އެވެ. 

މި މަޝްރޫއަކީ މިދިޔަ އަހަރު ރައީސް ޑރ. މުހައްމަދު މުއިއްޒު އެރަށަށް ވަޑައިގެން ފެއްޓެވި މަޝްރޫއެކެވެ. މިކަމާއި ގުޅިގެން ކެނދިކުޅުދޫ ކައުންސިލްގެ މެންބަރު މުހައްމަދު ޝާހިދު ވިދާޅުވީ އެރަށުގައި ސިޓީސް މިނިސްޓްރީ އިން ކުރިއަށްގެންދާ ކުޑަކުދިންގެ ޕާކުގެ މަޝްރޫއުގެ ވެލިއުއެއް، ނިންމަންޖެހޭ ތާރީހެއްގެ މައުލޫމާތެއް މިނިސްޓްރީއަށް ލިޔެގެން ވެސް ނުލިބުނު ކަމަށެވެ.

ޝާހިދު ވިދާޅުވީ ލާމަރުކަޒީ ގާނޫނުގައި ބުނާ ގޮތުން، 5 މިލިއަނަށްވުރެ ކުދި ޕްރޮޖެކްޓް ހިންގާނީ ކައުންސިލަށް ދީގެން ކަމަށެވެ. ނަމަވެސް ނުދީގެން އުޅެނީ ދެ ޕްރޮޖެކްޓް ނުވަތަ 3 ޕްރޮޖެކްޓް އެއްކޮށްލައިގެން އަގު ބޮޑުކޮށްފައި ދޭތީ ކަމަށް ލަފާ ކުރެވޭ ކަމަށް އޭނާ ވިދާޅުވި އެވެ. 

5 މިލިއަނަށްވުރެ މިތަނުގެ އަގު ބޮޑީބާވައޭ ހިތަށް އަރަނީ، ކައުންސިލަށް މިކަހަލަ ޕްރޮޖެކްޓް ހިންގަން ނުދެނީ. އަޅުގަނޑަކަށް ދެން ބުއްދި ގަބޫލެއް ނުކުރެވޭ އެވަރުގެ ހަރަދެއް ހިނގާފާނެ ކަމަށް މިވަރުގެ ޕާކެއް އަޅަން. ކައުންސިލުން ވޮލީކޯޓެއް އަޅާފައި ހުންނާނެ 8 ލައްކަ އަށް. ސަރުކާރުން މި އަޅާ ވޮލީކޯޓުތަކާ ވަރަށް ތަފާތުވާނެ. ރޮސްޓްރަމް ލާފައި ކުޅިބަލާ މީހުންނަށް ތިބެވޭނެ ގޮތަށް ހަދާފައި ހުންނާނީ. ނަރުދަލުގެ ބަދަލުގައި އެހެންކަހަލަ ޕެނަލްތަކެއް ފެންސަކަށް ވެސް ޖަހާފައި ހުންނާނީ. މިހާރު ވެސް ސަރުކާރުން އެންމެ ކުޑަކޮށް ވެސް ވޮލީކޯޓެއް އަޅަން އެދެނީ 1.4 މިލިއަން ރުފިޔާ އަށް. 

ކެނދިކުޅުދޫ ކައުންސިލްގެ މެންބަރު މުހައްމަދު ޝާހިދު

ޝާހިދު ވިދާޅުވީ ކުޑަކުދިންގެ ޕާކުގެ މަސައްކަތް ފެށީ 2025 ވަނަ އަހަރުގެ ޖުލައި މަހު ރައީސް ޑރ. މުހައްމަދު މުއިއްޒު ކެނދިކުޅުދޫ އަށް ކުރެއްވި ޒިޔާރަތެއްގައި ކަމަށެވެ. ނަމަވެސް މަސައްކަތް ނުނިމި މިހާ ދުވަސްވެގެން ދަނީ ކީއްވެގެން ކަމެއް ކައުންސިލަށް ނޭނގޭ ކަމަށާއި، ނިންމަންޖެހޭ ތާރީހެއް ވެސް އެންމެ ކުޑަމިނުން ކައުންސިލަށް ނޭނގޭ ކަމަށެވެ.