ކައުންސިލް އިންތިޚާބުގައި ތިނަދޫގެ މޭޔަރ ސައުދު އަށް ތާއީދު ކުރާތީ ވަޒީފާ އަދާ ކުރާތަން ބަދަލު ކުރި ނާބިތު ކުޅުދުއްފުށްޓަށް ފޮނުވާލީ 6 މަސް ދުވަހަށް
ސަރުކާރު ހިންގާ ޕީއެންސީގެ ކެންޑިޑޭޓުންނަށް ވޯޓު ނުދޭނެ ކަމަށް ބުނުމުން ނުވަތަ އެމްޑީޕީގެ ކެނޑިޑޭޓަށް ތާއީދުކުރުމުން ވަޒީފާ އިން ވަކިކުރުމާއި މަޤާމް ދަށް ކުރުން އަދި ވަޒީފާ އަދާކުރާ ތަން ބަދަލުކުރުމުގެ މައްސަލަތައް ދަނީ ފެންމަތި ވަމުން.
ބަދަލުކޮށްފައިވާ މުވައްޒަފުން ތިނަދޫގެ މޭޔަރ، މޭޔަކެނޑިޑޭޓް ސައުދު އާއި އެކު ނަގާފައިވާ ފޮޓޯ އެއް. | ސޯޝަލް މީޑިއާ
ކުރިއަށް އޮތް ކައުންސިލް އިންތިޚާބުގައި ތިނަދޫގެ މޭޔަރ ސައުދު އަލީ އަށް ތާއީދު ކުރާތީ ސިޔާސީ ބޭނުމަށް ވަޒީފާ އަދާ ކުރާ ތަން ބަދަލު ކުރި އަލީ ނާބިތު މުހައްމަދު ވަޒީފާ އަދާ ކުރާތަން ބަދަލު ކުރީ 6 މަސް ދުވަހަށް ކަން ހާމަވެއްޖެ އެވެ.
މި ނޫހަށް ވަނީ އޭނާގެ ވަޒީފާ ބަދަލުކުރިކަން އަންގާ، ވެމްކޯ އިން ފޮނުވާފައިވާ ޗިޓު ލިބިފަ އެވެ.
ވަގުތީ ގޮތުން ވަޒީފާ ބަދަލުކޮށްފައިވާ އަލީ ނާބިތު ވަޒީފާ އަދާކުރަމުން އައީ ތިނަދޫގައި ހުންނަ ސަދަން އޮޕަރޭޝަންގެ ކޭޝިއަރެއްގެ މަޤާމުގަ އެވެ. އޭނާ ބަދަލުކޮށްފައި ވަނީ ކުޅުދުއްފުށީ ސިޓީގައި ހުންނަ ނޮދަން އޮޕަރޭޝަން އަށެވެ.
އޭނާގެ ވަޒީފާ ބަދަލު ކުރީ 15 ފެބްރުއަރީ 2026 އިން ފެށިގެން 6 މަސް ދުވަހުގެ މުއްދަތަށް ކަމަށް ވެމްކޯ އިން ވަނީ އޭނާ އަށް އަންގާފަ އެވެ.
އިދިކޮޅު މޯލްޑިވިއަން ޑިމޮކްރެޓިކް ޕާޓީ، އެމްޑީޕީ ގެ ކެންޑިޑޭޓަށް ތާއީދު ކުރި ވެމްކޯގެ 3 މުވައްޒަފެއްގެ ވަޒީފާ މި ސަރުކާރުން ހަމަ މިގޮތައް ވަނީ ބަދަލުކޮށްފަ އެވެ. ރާއްޖެ އެމްވީ އަށް އިތުބާރު ހުރި މަސްދަރަކުން މައުލޫމާތު ދީފައިވާ ގޮތުގައި މި މުވައްޒަފުން މަސައްކަތް ކުރާ ތަން ބަދަލުކުރުމުގެ ކުރިން ސަރުކާރާއި ދެކޮޅަށް ކެމްޕެއިން ކުރަމުންދާ ކަަމަށް ބުނެ ވަނީ އިންޒާރު ދީފަ އެވެ.
ސަރުކާރު ހިންގާ ޕީއެންސީގެ ކެންޑިޑޭޓުންނަށް ވޯޓު ނުދޭނެ ކަމަށް ބުނުމުން ނުވަތަ އެމްޑީޕީގެ ކެނޑިޑޭޓަށް ތާއީދުކުރުމުން ވަޒީފާ އިން ވަކިކުރުމާއި މަޤާމް ދަށް ކުރުން އަދި ވަޒީފާ އަދާކުރާ ތަން ބަދަލުކުރުމުގެ މައްސަލަތައް ދަނީ ފެންމަތި ވަމުންނެވެ. އާއްމުން ދަނީ މިފަދަ ފިއްތުންތަކަކީ ސިޔާސީ ގޮތުން ނާޖާއިޒް ނުފޫޒު ފޯރުވަން ކުރާ ކަންކަން ކަމަށް ބުނެ އެކަމަށް ފާޑުކިޔަމުންނެވެ. މިވާހަކަތައް މި ގޮތައް އާންމުވެފައި ވިޔަސް އެންޓި ކަރަޕްޝަން ކޮމިޝަން އާއި އިލެކްޝަންސް ކޮމިޝަން ފަދަ ކަމާ ބެހޭ މުއައްސަސާތައް އޮތީ ހިމޭނުންކަން ފާހަގަ ކުރެވެ އެވެ.
