ނ.ކެނދިކުޅުދޫ މަގު ހެދުމުގެ މަސައްކަތް ދެ ފަހަރަށް ފަށައިގެން ވެސް ހަމަހިލާ ކުރިއަކަށް ނުދިޔަ

ނ.ކެނދިކުޅުދޫ މަގު ހެދުމުގެ މަސައްކަތް ދެ ފަހަރު ފެށި ކަމަށާއި، އެ މަސައްކަތް މިހާރު ވެސް އޮތީ ހުއްޓިފައިވާ ކަމަށް އެ ރަށު ކައުންސިލުން ބުނެފި އެވެ.

ކެނދިކުޅުދޫ މަގު ހެދުމުގެ މަސައްކަތް އެންމެ ފުރަތަމަ ފަށާފައި ވަނީ އެޕްރިލް 2024ގަ އެވެ. އަދި ޖުލައި 2025ގައި އަނެއްކާވެސް އެ މަސައްކަތް ވަނީ ފަށާފަ އެވެ.

އެ ރަށު ކައުންސިލް ގެ ރައީސް މުހައްމަދު ޝާހިދު ރާއްޖެޓީވީ އަށް މައުލޫމާތުދެއްވަމުން ވިދާޅުވީ އެންމެ ފުރަތަމަ އެ މަސައްކަތް ފެށީ މަޖިލިސް އިންތިޚާބާއި ދިމާކޮށް، އިންޑޯ ހޯލެއްގައި ކަމަށެވެ. އަދި ދެ ވަނަ ފަހަރު މަސައްކަތް ފަށަން ދެއްކި މަންޒަރުގެ ތެރޭގައި ހެދި ކާނެއް މިހާރު ވެސް މަގުގައި ވަޅުލާފައި އެބަ އޮތް ކަމަށް އޭނާ ވިދާޅުވި އެވެ.

"މިތަނުގެ އަޑީގައި ވެއްޖެ ކާނެއް ވަޅުލާފަ. އެއީ ދެ ވަނަ ފަހަރު މަސައްކަތް ފަށަން ސީދާ މަގުގެ މަސައްކަތް ކުރިއަށް ދާ ތަނުގެ މަސައްކަތް އާރްޑީސީ އިން މަސައްކަތް ކޮށް، ފަށަން އުޅުނު ތަނުގައި ކާނެއް ހެދީ،" އޭނާ ވިދާޅުވި އެވެ.

އާރްޑީސީ މަސައްކަތް ކުރާ ސައިޓަށް ރާއްޖެ ޓީވީ އިން ގޮސް ބެލި ބެލުމުން  އެއް ހެކްޓަރުގެ  ބޮޑު ސަރަހައްދެއް ސައިޓުގެ ގޮތުގައި ކައުންސިލުން އާރްޑީސީ އަސް ހަމަޖައްސާދީފައިވާކަން ފާހަގަވި އެވެ. އެއީ ކެނދިކުޅު އަވަށުގެ ބޯޅަ ދަނޑު އޮތް ސަރަހައްދެވެ.  އެ ތަނުގައި މަގު ހެދުމަށް ބޭނުންވާ ގާތައް އެޅުމުގެ މަސައްކަތް ކުރިއަށް ގެންދިއުމަށް ހަމަޖެހިފައި ވީ ނަމަވެސް މިހާރު ވެސް މަސައްކަތް އޮތީ ހުއްޓިފަ އެވެ. 

"އަނެއްކާ ވެސް ތަކެތި ނެތިގެން ހުއްޓިފައި އޮތް ކަމަށް މައުލޫމާތު ލިބެނީ. ކާބް ސްޓޯން 15 ތައްގަނޑު ސައިޓުގައި އިންނަނީ. ދުވާލަކަށް އެޅެނީ 15 ގައު. 9،000 ގައު ބޭނުންވާނެ ކަމަށް ލަފާ ކުރެވޭ. މި ރޭޓުން ހުއްޓާ ނުލާ ގާ އެޅިޔަސް 2 އަހަރު ދުވަހުން ގައު އަޅާ ނިމޭނީ. ދައުރު މި އޮތީ ދެ ބައިވެފައި. އެހެންވީމަ ޕްރޮޖެކްޓް ދާ ސްޕީޑް ވިސްނާލައްވާ." ކެނދިކުޅުދޫ ކައުންސިލް ރައީސް ވިދާޅުވި އެވެ.

އާރްޑީސީ އިން ޤާއިމް ކުރި ސައިޓުގެ މަސައްކަތަކީ ވެސް ކުރީ ސަރުކާރުން ކޮށްފައިވާ މަސައްކަތް ކަން އޭނާ ފާހަގަކުރެއްވި އެވެ. އަދި އެ ތަނުގައި ހުރި ގާތައް ބެލެހެއްޓުމަށް 10 ސެކިއުރިޓީ އޮފިސަރުން ތިބޭ ކަަމަށް ވެސް ވިދާޅުވި އެވެ.

އެ މަސައްކަތަކީ އެމްޑީޕީ ވެރިކަމުގައި 2023 ވަނަ އަހަރުގެ ޖޫން މަހު ރޯޑް ޑިވެލޮޕްމެންޓް ކޯޕަރޭޝަން، އާރް.ޑީ.ސީ އާއި ހަވާލު ކުރި މަސައްކަތެކެވެ. 

ކެނދިކުޅުދޫ މަގުތައް ހެދުމުގެ މަސައްކަތުގެ ދަށުން އެ ރަށުގެ 8 މަގެއް ޒަމާނީ ފެންވަރެއްގައި ތަރައްޤީކުރަން ހަމަޖެހިފައި ވެއެވެ. މިގޮތުން 3.7 ކިލޯމީޓަރުގެ މަގުގެ ފެން ހިންދާ ނިޒާމު ޤާއިމްކޮށް އެ މަގުތަކުގެ ޔޫޓިލިޓީ ޖަންކްޝަންތަކެއް ޤާއުމްކުރުމަށް ވަނީ ހަމަޖެހިފަ އެވެ.

މީގެ އިތުރުން ތާރުއަޅައި ދުވާރާއެކު މަގުގެ ޓްރެފިކް ސައިންތައް ހަރުކުރުމަށާއި، މަގު ބައްތި ޖެހުމާއި ސްޕީޑް ބްރޭކަރުތައް ޤާއިމްކުރުމަށް ނިންމާފައިވެ އެވެ.  90.8 މިލިއަން ރުފިޔާ އަށް ހަވާލު ކުރި މި މަސައްކަތް ހުއްޓިފައި އޮތުމަކީ ކައުންސިލްގެ ބޮޑު ކަންބޮޑުވުމެކެވެ.