ބާރުތައް އެއްކޮށްގެން ރައީސް އޮފީހުގައި އިންނަވައިގެން ރައީސް ޑރ. މުހައްމަދު މުއިއްޒު ވެރިކަން ކުރައްވާ ގޮތަށް ވެރިކަން ކުރެއްވުމަކީ ވަރަށް ފަސޭހަކަމެއް: ރައީސް ސޯލިހު
ރާއްޖެ ތަރައްގީކުރެވޭނީ ބާރުތައް ރަށްރަށަށް ދޫކޮށްލައިގެން ކަމަށްވީ ނަމަވެސް، މިހާރުގެ ސަރުކާރުން މަސައްކަތް ކުރަނީ ހުރިހާ ބާރެއް ރައީސް އޮފީހަށް ޖަމާކުރަން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ. ރައީސް ޑރ. މުއިއްޒު ވެވަޑައިގަންނަވާ ވައުދުތަކަކީ އަމަލީގޮތުން ކުރެވޭނެ ކަންކަންތޯ ރައްޔިތުން ސުވާލު އުފައްދަންޖެހޭ ކަމަށާއި، ތިނަދޫގައި ފަށާފައިވާ ތަރައްގީގެ މަޝްރޫއުތައް ހުއްޓާނުލައި ކުރިއަށް ގެންދިއުމަށް އެމަނިކުފާނު ގޮވާލެއްވި.
ތިނަދޫ ސިޓީގައި އެމްޑީޕީ އިން ބާއްވާ ކެމްޕެއިން އިފްތިތާހުކުރުމުގެ ޖަލްސާގައި ރައީސް ސޯލިހު ވާހަކަ ދައްކަވަނީ. | މުންޝިދް
ބާރުތައް އެއްކޮށްގެން ރައީސް އޮފީހުގައި އިންނަވައިގެން ރައީސް ޑރ. މުހައްމަދު މުއިއްޒު ވެރިކަން ކުރައްވާ ގޮތަށް ވެރިކަން ކުރެއްވުމަކީ ވަރަށް ފަސޭހަކަމެއް ކަމަށާއި، އެމްޑީޕީގެ ސިޔާސަތަކީ ބާރުތައް ދޫކޮށް ލާމަރުކަޒީ ނިޒާމުގެ ތެރެއިން ތަރައްގީ ގެނައުން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ތިނަދޫ ސިޓީގައި އެމްޑީޕީ އިން ބޭއްވި ކެމްޕޭން އިފްތިތާހު ކުރުުމުގެ ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ އެމްޑީޕީގެ ސިޔާސަތުތަކާއި، ލޯގޯ ބަދަލުވަމުން އަންނަ ޕާޓީގެ ސިޔާސަތުތަކުގައި ބޮޑެތި ތަފާތުތަކެއް އެބަހުރި ކަމަށެވެ. ރައީސް ސޯލިހު ވިދާޅުވީ އެމްޑީޕީ އިން އަބަދުވެސް ގަބޫލުކުރަނީ ރާއްޖެ ތަރައްގީ ކުރެވޭނީ ބާރުތައް ރަށްރަށަށް ދީގެން މިލްކުވެރިކަން އެ ރަށެއްގެ ރައްޔިތުންނަށް ދީގެން ކަމަށެވެ. އެއީ ދަތި އުނދަގޫ މަސައްކަތެއް ކަމަށާއި، އެއީ ޑިމޮކްރަސީ ތެރޭގައި އޮންނަ ރީތި އުސޫލު ކަމަށް ރައީސް ސޯލިހު ވިދާޅުވި އެވެ. ރައީސް ސޯލިހު ވިދާޅުވީ ރައީސް ޑރ. މުހައްމަދު މުއިއްޒު މަސައްކަތް ކުރައްވާ ގޮތަށް ވެރިކަން ކުރުމަކީ ވަރަށް ފަސޭހަ ކަމެއް ކަމަށާއި، ހުރިހާ ބާރެއް އެއްކޮށް ރަށްރަށް ދޫކޮށްފައި އޮތް ބާރުތައް ވެސް ކަނޑާލައިގެން އެކަނިމާ އެކަނި ރައީސް އޮފީހުގައި އިނދެގެން ވެރިކަން ކުރުމަކީ ވަރަށް ފަސޭހަ ކަމެއް ކަމަށެވެ. ރައީސް ސޯލިހު ވިދާޅުވީ އެއީ މިއަދު ރައްޔިތުން ބޭނުންވެގެން އުޅޭ ގޮތް ނޫން ކަމަށެވެ.
އެހެންވީމާ މިރަށުގެ ރައްޔިތުން ވިސްނާ، އަޅުގަނޑު މި ދެންނެވިހެން މި ލޯގޯ [ތިލަފަތަށް] ވޯޓުދީ. ކައުންސިލަށް މި އިންތިހާބުކުރާ މެންބަރުންނަކީ ވެރިންނަށް ސަނާކިޔަން އަޅުގަނޑުމެން އިންތިހާބުކުރާ ބައެއް ނޫން. ވެރިން އެ ބުނާހާ އެއްޗެއް ބުނާ ގޮތަކަށް އާން ބަސް ބުނަން ތިބޭ ބައެއް ވެސް ނޫން. ކަމެއްގެ ވާހަކަ ބުނީމާ އެއީ ކުރެވޭނެ ކަމެއްތޯ އަމިއްލަ ސިނކުޑިން ވިސްނަން ޖެހޭ. ހާއްސަކޮށް ކަންކަމައި ހަވާލުވެ ތިބި އިސްވެރިން. މިސާލަކަށް މިދިޔަ ރިޔާސީ އިންތިހާބުގައާއި މަޖިލިސް އިންތިހާބުގައި ވެފައި ހުރި ބޮޑެތި ވައުދުތައް އެއީ ކުރެވޭނެ ކަމެއްތޯ އަމިއްލައަށް ސުވާލުކުރަންޖެހޭ. ފުރަތަމަ ރިޔާސީ އިންތިހާބުގައި ރައީސުލްޖުމްހޫރިއްޔާ ވަޑައިގެން ވިދާޅުވީ މިރަށާއި ކާޑެއްދޫ އާއި ގުޅާލާ ވާހަކަ ބުރިޖަކުން. ޖެހިގެން 3 މަސްފަހުން ވަޑައިގެން ވިދާޅުވީ މިރަށުގައި ބިން ހިއްކައިގެން ފްލޯޓިންގ ޓަރމިނަލްއަކާ އެކީގައި، މި ސަރަހައްދުގައި ނެތްވަރުގެ ސިޓީއެއް ތިނަދޫގައި ގާއިމްކުރާ ވާހަކަ. އެ ވިދާޅުވާ އިންވެސްޓަރުން އަޅުގަނޑުމެންގެ ވެރިކަމުގައި ވެސް އައި. އަޅުގަނޑުމެން ބަލާ ހެދިން އެއީ ކޯއްޗެއްތޯ؟ ކުކުޅެއް ގެންގުޅޭ ބަޔަކަށް ކިހިނެއްތޯ ރަަށެއްގައި އެއަރޕޯޓެއް އަޅައި ސިޓީއެއް ތަރައްގީ ކުރެވޭނީ.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ ރައީސް މުއިއްޒު ވަޑައިގެން ދެއްކެވި މަންޒަރުތައް ބިލާހަކަށް ވެެފައިވާ ކަމަށެވެ. އެހެންކަމުން ވެރިއަކު އައިސް ދައްކާ ވާހަކައާއި މެދު ވިސްނާ ފިކުރު ކުރަންޖެހޭ ކަމަށާއި، އެއީ ކުރެވޭ ވަރުގެ ކަމެއްތޯ ބަލަންޖެހޭ ކަމަށެވެ. ރައީސް ސޯލިހު ވިދާޅުވީ ވިލިމާލެއާއި ގުޅީފަޅު ހިއްކާ ބުރިޖުން ގުޅާލަދޭން މާލެ ސިޓީގެ މޭޔަރު އެދިވަޑައިގަތުމުން، ރަސްމާލެއެއް ހިއްކާ ވާހަކަ ރައީސް މުއިއްޒު ދައްކަވާ، 200 މީޓަރު އަޑީގައި ބިއްލޫރި ޓަނަލްއެއް އަޅައިގެން ގުޅުވާލާ ވާހަކަ ދެއްކި ކަމަށެވެ.
އަދި މީގެ އިތުރުން އެ ޓަނަލްއިން ދަތުރުކުރާއިރު މިޔަރުތަކާއި ފެމުނާއި މަސްމަހާމެހި ފެންނާނެ ކަމަށް ވިދާޅުވި ކަމަށެވެ. މިކަހަލަ އެތައް އެތައް ބަހަނާތަކެއް ދެއްކި ކަމަށާއި، އެންމެފަހުގެ ރިޔާސީ ބަޔާނުގައި ވެސް 10 ރިސޯޓެއް ބިނާ ކުރާ ވާހަކަ ދެއްކެވި ކަމަށެވެ.
ވިދާޅުވީ ތިމަންނަމެން އަހަރަކު 400 ޑޮލަރު ދޭނަމޭ. އެހެންކަމުގައިވާނަމަ އެ ދައްކަނީ 1 ބިލިއަން ޑޮލަރުގެ އިންވެސްޓްމަންޓެއް ކުރާ ވާހަކަ. 800 މިލިއަން ޑޮލަރާއި 1 ބިލިއަން ޑޮލަރުގެ އިންވެސްޓްމަންޓެއް ކޮށްގެން އަހަރަކު 200 މިލިއަން ޑޮލަރުގެ ނެޓް ޕްރޮފިޓް ރެއިސް ކުރާ ވާހަކަ. އެކަން ކުރާނެ ގޮތެއް ރިސޯޓް ހިންގަވާ ބޭފުޅުން ކައިރި އައްސަވާ. އެކަހަލަ އެތައްއެތައް ބިލާހި ވާހަކައެއް ދައްކަވަމުން އެދަނީ. އެހެންވީމަ އެވާހަކަ ގަބޫލުކުރާ ބަޔަކު ހޮވައިގެން ވެގެންދާނެ ގޮތް ތިބޭފުޅުން ވިސްނާ ވަޑައިގަންނަވާ.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ ތިނަދޫ އަކީ ތާރީހެއް އޮތް ރަށެއް ކަމަށެވެ. މަސައްކަތްތެރި ހިންގުންތެރި ހީވާގި މުރާލި އެތައް ރައްޔިތުންނެއް އުފެދިފައި އޮތް ރަށެއް ކަމަށެވެ. 70، 80 ވަރަކަށް އަހަރު ކުރިއަށް ޖެހިލާއިރު ތިނަދޫއަކީ ރާއްޖޭގައި އޮތް އެންމެ މުއްސަނދި ރަށް ކަމަށެވެ. ތިނަދޫ އަށް ދިމާވި ހާދިސާއަށް އަލިއަޅުވާލައްވާ ރައީސް ސޯލިހު ވިދާޅުވީ ތިނަދޫ ރައްޔިތުން މިހާރު ތިބީ އެކަމުން ހިނދެމިލައިގެން ކަމަށެވެ. އެހެންކަމުން އެވަރުގެ ރަށެއް ހިންގުމަށް އެރަށުގެ ރައްޔިތުންނަށް ދޫނުކޮށްލަންވީ ސަބަބެއް ނެތް ކަމަށާއި، ތިނަދޫ ހިންގާނެ ހިންގުންތެރިންނާއި ރައްޔިތުން އެބަތިބި ކަމަށެވެ.
ބާރުތައް ޖަމާކޮށްގެން ކިހިނެއްތޯ ރާއްޖެ ތަރައްގީ ކުރާނީ. ދޫކޮށްލަންވީ. އޯނަރޝިޕް ދޭންވީ. ގާނޫނު ހަދާ ގާނޫނާ އެއްގޮތަށް ކަންކުރޭތޯ ބަލަންވީ މައި ސަރުކާރުން. އަޅުގަނޑުމެން ފެށީ އެ މަސައްކަތް. އަޅުގަނޑުގެ ތަސައްވުރެއް އޮތް ތިނަދޫއާއި ދޭތެރޭގައި. އޭގެ ދަށުން އިންޑަސްޓްރިއަލް ރަށެއް ތަރައްގީ ކުރީ. އޭގެ ދަށުން ވިޔަފާރި ބަނދަރެއް ތަރައްގީކުރަން ފެށީ. އޭގެ ދަށުން މިރަށުގައި 1000 ޓަނުގެ ކޯލްޑް ސްޓޯރޭޖެއް ގާއިމްކުރަން ފެށީ. އަޅުގަނޑުމެން ކުރާ ކޮންމެ ކަމެއް ވެސް ކުރަން ފެށީ، ރައްޔިތުންނާއި މަޝްވަރާކޮށްފައި ލަފާ ހޯދައިގެން ޕްލޭން ކޮށްގެން އެއަށް ބޭނުންވާ ފައިސާ ވެސް ހޯދައިގެން. އެކަން ކުރަން ފެށި އިރު އެއަށް ބޭނުންވާ ފައިސާ ވެސް ހުންނާނެ. އޭގެ ތެރެއިން ކޯލްޑް ސްޓޯރޭޖަކީ ސައުދީ ފަންޑުން ހޯދި ފައިސާއިން ކުރި ކަމެއް. ސައުދީ ފަންޑުން މަސްވެރިކަން ތަރައްގީ ކުރުމަށް މި ރަށުގެ އިތުރުން ކޫއްޑޫގެ ކޯލްޑް ސްޓޯރޭޖާއި ކަނޑު އޮތްގިރީގެ މަސައްކަތްވެސް ހިމެނޭ.ކުރީގެ ރައީސް އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ ސަރުކާރުން މިއަދު ކުރަންވީ ކަމަކީ ފަށާފައި ހުރި ޕްރޮޖެކްޓްތައް ނިންމުން ކަމަށެވެ. ރައީސް ސޯލިހު ވިދާޅުވީ ތިނަދޫ އަކީ ބޮޑު ސިޓީއެއްގެ ގޮތުގައި ތަރައްގީ ކުރެވޭނެ ތަނެއް ކަމަށެވެ. ކުރީ ސަރުކާރުތަކުން ތިނަދޫގެ ބޯހިޔާވަހިކަމުގެ އެއްވެސް ކަމެއް ނުކުރާ ކަމަށާއި، އެކަންކަން ކޮށްފައިވަނީ ވެސް އެމްޑީޕީގެ ވެރިކަމުގައި ކަމަށެވެ. ރައީސް ސޯލިހު ވިދާޅުވީ ރަށްރަށަށް ތަރައްގީކޮށް ބާރުތައް ދޫކުރުމުގެ ވިސްނުމެއް މިހާރު އޮތް ސަރުކާރުގައި ނެތް ކަމަށެވެ.
