ގާދިއްފުށީ ފެނަކަ އަދި އެމްޓީސީސީ އިން އިންތިޚާބަށް ނުފޫޒު ފޯރުވަން ވަޒީފާގެ ބިރު ދައްކާ އެހެން ރަށްތަކަށް ބަދަލުކޮށްފައިވާ މުވައްޒަފުންގެ ލިސްޓާ އެކު އޭސީސީ އަށް މައްސަލަ ވައްދައިފި
މި މައްސަލައިގައި ބުނެފައިވަނީ، ވޯޓަށް ނުފޫޒު ފޯރުވުމުގެ ގޮތުން އެ ރަށުގެ މުވައްޒަފުން އެހެން ރަށްރަށަށް ބަދަލުކުރަމުންދާ ކަމަށާއި މީގެ ސަބަބުން ވޯޓުގެ ސިއްރުކަން ގެއްލި މިނިވަންކަމާއެކު ވޯޓުލުމުގެ ހައްގަށް ހުރަސްއެޅޭ ކަމަށް. މި އަމަލަކީ އިންތިޚާބުތަކާބެހޭ ގާނޫނާ ޚިލާފު ކަމެއްކަން ފާހަގަކޮށް، މިކަމުގައި ޝާމިލްވާ މުވައްޒަފުންގެ ލިސްޓު ވެސް ކޮމިޝަނަށް ވަނީ ހުށަހަޅާފައި.
އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް. | ރާއްޖެއެމްވީ
`ތ.އަތޮޅު ގާދިއްފުށީގެ ފެނަކަ އޮފީހުންނާއި އަދި އެމްޓީސީސީގެ އޮފީހުން އެތަންތަނުގައި ވަޒީފާ އަދާކުރަމުންދާ އެރަށުގެ ރައްޔިތުންނަށް ވަޒީފާގެ ބިރާ ކުރިމަތިކުރުވާ މިނިވަންކަމާއި އެކު ވޯޓުލުމުގެ ހައްގުން މަހުރޫމް ކުރުވާފައިވާ ކަމަށް ތުހުމަތު ކުރެވޭ މައްސަލަ އެންޓި ކަރަޕްޝަން ކޮމިޝަން (އޭސީސީ)އަށް ހުށަހަޅައިފި އެވެ.
މި މައްސަލަ ހުށަހަޅުއްވާފައި ވަނީ އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) އެވެ.
އާދިއްތަ ދުވަހު މާޒް ސަލީމް ހުށަހެޅުއްވި މައްސަލައިގައި، ސަރުކާރުގެ އެކިއެކި ކުންފުނިތަކުގައި ތިބި އެކިއެކި ވެރިން މަގާމުގެ ނުފޫޒު ބޭނުންކޮށްގެން ލޯކަލް ކައުންސިލް އިންތިޚާބުގެ ވޯޓު ކާމިޔާބު ކުރުމަށް ގިނަގުނަ މަސައްކަތްތަކެއް ކުރަމުން ގެންދާއިރު، އެކިއެކި ރަށްރަށުގައި ގާއިމު ކުރެވިފައިވާ ފެނަކަ އަދި އެމްޓީސީސީގެ ބުރާންޗުތަކުން ވަޒީފާއިން ކަނޑާލާނެ ކަމަށްބުނެ ވަޒީފާގެ ބިރުދައްކައިގެން ވޯޓަށް ނުފޫޒު ފޯރުވަމުން ގެންދާ ކަމަށެވެ.
އެގޮތުން ވޯޓު ކަށަވަރު ކުރުމަށްޓަކައި ތ.އަތޮޅު ގާދިއްފުށީގެ ފެނަކަ އޮފީހުގައި މަސައްކަތް ކުރަމުންދާ ގާދިއްފުށީގެ ރައްޔިތުން އެއަތޮޅުގެ އެހެން ރަށްތަކަށާއި އަދި ލ. އަތޮޅުގެ ބައެއް ރަށްރަށައް ބަދަލު ކުރަމުން ގެންދާ ކަމަށް މާޒް ސަލީމް ވިދާޅުވި އެވެ. އަދި ތ.އަތޮޅު ގާދިއްފުށީގެ އެމްޓީސީސީގެ އޮފީހުގައި މަސައްކަތް ކުރަމުންދާ ގާދިއްފުށީގެ ރައްޔިތުން އެއަތޮޅުގެ އެހެން ރަށްތަކަށާއި އަދި ލ.އަތޮޅުގެ އެހެން ރަށްތަކަށް ބަދަލު ކުރަމުން ގެންދާ ކަމަށެވެ.
މިއަމަލަކީ ސީދާ އިންތިޚާބުތަކާބެހޭ ގާނޫނުގައި ކަނޑައެޅިގެން މަނާކަމެއްކަން ފާހަގަކުރައްވައި މާޒް ސަލީމް ވިދާޅުވީ، ހަތަރު ފަސްމީހަކު އޭނާ ދިރިއުޅޭ ރަށް ނޫން އެހެން ރަށަކަށް ބަދަލު ކުރުމުން އެވޯޓުގެ ސިއްރުކަން ގެއްލޭނެ ކަމަށެވެ. ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި ނަގާ ވޯޓަކީ ސިއްރުވޯޓެއް ކަމަށްވާއިރު، މިގޮތަށް ގާދިއްފުށިން އެހެން ރަށްރަށަށް ބަދަލުކުރާ ތިން ހަތަރު މީހަކު އެ ބަދަލުކުރާ ރަށެއްގެ ފޮށްޓަކަށް ވޯޓުލުމުން، މި ތިން ހަތަރު މީހުންގެ ވޯޓުއާއި އަދި ވޯޓު ދިންގޮތް ވަރަށް ސާފުކޮށް އެނގޭނެ ކަމަށް އޭނާ ވިދާޅުވި އެވެ.
އެހެންކަމުން ތ.އަތޮޅު ގާދިއްފުށީގެ ފެނަކަ އޮފީހުންނާއި އަދި އެމްޓީސީސީގެ އޮފީހުން އެތަންތަނުގައި ވަޒީފާ އަދާކުރަމުންދާ އެރަށުގެ ރައްޔިތުންނަށް ވަޒީފާގެ ބިރާ ކުރިމަތިކުރުވާ މިނިވަންކަމާއި އެކު ވޯޓުލުމުގެ ހައްގުން މަހުރޫމް ކުރުވާފައިވާކަމަށް ތުހުމަތު ކުރެވޭތީވެ މިމައްސަލަ އަވަސް މަސްއަލައެއްގެ ގޮތުގައި ބަލައިދިނުމަށް މާޒް ސަލީމް ވަނީ އެދިވަޑައިގެންފަ އެވެ.
މިދެންނެވި ގޮތަށް އެހެން ރަށްރަށައް ބަދަލުކޮށް ސަރުކާރުގެ ކެނޑިޑޭޓުންނަށް ވޯޓުދޭން އެންގީމާ އެމުވައްޒަފުންނަށް މިނިވަންކަމާއެކު ވޯޓުލުމުގެ ހައްގުން މަހުރޫމްވެ ވަޒީފާގެ ބިރާއެކު ސަރުކާރުގެ ކެނޑިޑޭޓުންނަށް ވޯޓުދޭން މަޖުބޫރުވީ.އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް
މީގެ އިތުރުން މާޒް ސަލީމް ވަނީ ތ.އަތޮޅު ގާދިއްފުށި ފެނަކަ އޮފީހުންނާއި އަދި އެމްޓީސީސީގެ އޮފީހުން އިންތިޚާބުތަކާއިބެހޭ ގާނޫނާއި ހިލާފަށް ވޯޓު ކަށަވަރު ކުރުމުގެ މަގުސަދުގައި ވަޒީފާގެ ބިރު ދައްކާ އެހެން ރަށްތަކަށް ބަދަލުކޮށްފައިވާ މީހުންގެ ލިސްޓެއް ވެސް އޭސީސީ އަށް ހުށަހަޅާފަ އެވެ.
ގާދިއްފުށި ފެނަކަ އޮފީސް
01) މުޙައްމަދު އިމްތިޔާ / ވާގަލި
02) މަރިޔަމް ރަޝީދު / އަނޯނާގެ
03) ސަމީނާ އިބްރާޙިމް / ޖަވާހިރުމާގެ
04) މުޙައްމަދު އިބުރާޙިމް /ހުވަނދުމާގެ
05) އިބުރާހިމް ފައިސަލް / ފެހިވިނަ
06) މުޙައްމަދު ހާރޫނު / ގޯލްޑަންލައިޓު
07) އަޙުމަދު ރަޝީދު / އަނޯނާގެ
08) އަޙުމަދު އަސްލަމް / ފިނިވައިގެ
09) މުޙައްމަދު ޝިވާޒު / މަތަރެސްމާގެ
10) އިބްރާޙިމް ޝިޔާޒު / މަތަރެސްމާގެ
11) ފާތިމަތު އިޔާޝާ / މިނވަން އައްސޭރި
ގާދިއްފުށި އެމްޓީސީސީ
01) ޝިޔާޒު އާދަމް / މިރިހިމާގެ
02) މާޖިދު އިސްމާޢީލް / ދޫރިޔާ
03) ރާފިލް ރަހީފު / ވެނީލާގެ
04) މާޖިދާ ޢަބުﷲ ސާދިޤު / ގޯލްފޭސް
05) ނަސީމް އިބްރާޙިމް
06) އިލްހާމް މުޙައްމަދު ރޯޒް
މީގެ އިތުރުން އިންތިޚާބަށް ނުފޫޒު ފޯރުވުމަށް ވަޒީފާ އިން ވަކި ކުރުމާއި، ވަޒީފާ ދިނުމާއި، ޕްރޮމޯޝަން ދިނުމާއި، ބޮޑެތި އަދަދުތަކުން ފައިސާ ހުށަހަޅާ ކަމުގެ ތުހުމަތު ވެސް ރައީސް މުއިއްޒުގެ ސަރުކާރުގެ މައްޗަށް ވަނީ ކުރެވިފަ އެވެ.
