ކީރިތި ރަސޫލާގެ ހިޖުރައިގެ ތާރީޚީ މަގު ދައްކުވައިދޭ މަޝްރޫއު ސައުދީން ފަށައިފި

ކީރިތި ރަސޫލާ (ޞައްލަﷲ ޢަލައިހި ވަސައްލަމަ) މައްކާއިން މަދީނާއަށް ކުރެއްވި ހިޖުރައިގެ ތާރީޚީ މަގު ދައްކުވައިދޭ "ޢަލާ ޚުޠާ" މަޝްރޫއު ސައުދީ އަރަބިއްޔާއިން އާދީއްތަ ދުވަހުގެ ރޭ އިފްތިތާހުކޮށްފި އެވެ. މި މަޝްރޫއަކީ މައްކާއާއި މަދީނާއާ ދެމެދު 470 ކިލޯމީޓަރުގެ ދިގު ރާސްތާއެއްގައި ހިމެނޭ 11 ސަރަހައްދެއް ހިމެނޭހެން ފަރުމާކޮށްފައިވާ މަޝްރޫއެކެވެ.

އިނގިރޭސި ބަހުން "އިން ދަ ޕްރޮފެޓްސް ސްޓެޕްސް" ގެ ނަމުން ނަންދީފައިވާ މި މަޝްރޫއަކީ، "ޢަލާ ޚުޠާ" ގެ ރަސްމީ ވެބްސައިޓުގައި ބަޔާންކޮށްފައިވާ ގޮތުގައި، މާތްވެގެންވާ ހިޖުރައިގެ ތާރީޚީ ހަނދާންތައް އާލާކުރުމަށް ފަރުމާކޮށްފައިވާ މަޝްރޫއެކެވެ. މިއީ އިސްލާމީ ތާރީޚުގެ އެންމެ މުހިންމު އެއް ހާދިސާގެ ރޫހާނީ އަދި ތާރީޚީ އަސަރުތަކާ ގުޅިލާމެހި، އެކަންކަމާ މެދު ފުންކޮށް ވިސްނާލުމުގެ ފުރުސަތު ކޮންމެ ދަތުރުވެރިއަކަށް ވެސް ލިބިގެންދާނެ މަޝްރޫއެކެވެ.

ސައުދީ އަރަބިއްޔާގެ ޖެނެރަލް އެންޓަޓެއިންމަންޓް އޮތޯރިޓީ (ޖީ.އީ.އޭ) ގެ ރައީސް ތުރުކީ އާލް އައްޝައިޚް ވަނީ މި މަޝްރޫއު އިފްތިތާހު ކުރުމަށް ބޭއްވި ރަސްމިއްޔާތުގެ ވީޑިއޯ ކްލިޕެއް އޭނާގެ ރަސްމީ އެކްސް (ކުރީގެ ޓްވިޓާ) ޕޭޖުގައި ހިއްސާކުރައްވާފަ އެވެ.

ޖީ.އީ.އޭ ގެ ރައީސް ވިދާޅުވި ގޮތުގައި، މަދީނާގައި އިފްތިތާހު ކުރެވުނު "ޢަލާ ޚުޠާ" މަޝްރޫއަކީ ކީރިތި ރަސޫލާ ކުރެއްވި ހިޖުރައިގެ މަގު ދައްކުވައިދޭ 470 ކިލޯމީޓަރުގެ ތާރީޚީ މަސައްކަތެކެވެ. މި މަޝްރޫއުގެ ދަށުން، ރަސޫލާގެ ސީރަތަށް އޮންނަ ހޭލުންތެރިކަން އިތުރުކުރުމަށްޓަކައި، ތަރުތީބުކުރެވިފައިވާ އިލްމީ އޮނިގަނޑެއްގެ ތެރެއިން ހިޖުރައިގެ ތާރީޚީ މުހިންމު މަރުހަލާތައް ފެންނާނެހެން ވަނީ ލިޔެކިޔުންތަކުން ބަލަހައްޓާފަ އެވެ.

މި ރަސްމިއްޔާތުގެ ތެރެއިން، މަދީނާގެ ގަވަރުނަރު އަދި މަދީނާ ރީޖަން ޑިވެލޮޕްމަންޓް އޮތޯރިޓީގެ ބޯޑު އޮފް ޑައިރެކްޓަރުންގެ ރައީސް، އަމީރު ސަލްމާން ބިން ސުލްތާން ބިން އަބްދުލްއަޒީޒް ވަނީ "ހިޖުރަ: އިން ދަ ފުޓްސްޓެޕްސް އޮފް ދަ ޕްރޮފެޓް" މައުރަޒު ހުޅުވައިދެއްވާފައިވާ ކަމަށް ސައުދީ ޕްރެސް އެޖެންސީ (އެސް.ޕީ.އޭ) އިން ރިޕޯޓުކޮށްފައިވެ އެވެ.

އެސް.ޕީ.އޭ އިން ބުނި ގޮތުގައި، މި މައުރަޒުގައި ކީރިތި ރަސޫލާގެ ހިޖުރައިގެ ދަތުރުފުޅު ދައްކުވައިދެނީ ސައުދީ އަދި ބައިނަލްއަގުވާމީ މާހިރުންނާއި ދިރާސާކުރާ ފަރާތްތަކުގެ އެހީތެރިކަމާއެކު ފަރުމާކޮށްފައިވާ 14 އިންޓަރެކްޓިވް ސްޓޭޝަނެއްގެ އެހީގަ އެވެ.

މީގެ އިތުރުން، "ހިޖުރަ: އިން ދަ ފުޓްސްޓެޕްސް އޮފް ދަ ޕްރޮފެޓް" މި ނަމުގައި އަރަބި އަދި އިނގިރޭސި ބަހުން ތައްޔާރުކޮށްފައިވާ ފޮތަކާއި، ވާޗުއަލް ރިއަލިޓީ (ވީ.އާރް) މެދުވެރިކޮށް ރަސޫލާގެ ދަތުރުފުޅުގެ ވާހަކަ އެކި ކަހަލަ މީޑިއާތަކުގެ އެހީގައި ތަޖުރިބާކޮށްލެވޭނެ އިންތިޒާމު ހަމަޖެހިފައިވާ ކަމަށް އެސް.ޕީ.އޭ ގެ ރިޕޯޓުގައިވެ އެވެ.

މި މަޝްރޫއުގައި ތާރީޚީ ލިޔެކިޔުންތަކާއި އިންޓަރެކްޓިވް ތަޖުރިބާތައް އެކުލަވާލައިގެން ޒަމާނީ ގޮތަކަށް މައުލޫމާތުތައް ހުށަހަޅައިދެއެވެ. އަދި ހިޖުރައިގައި އެކުލެވޭ އިންސާނީ އަދި ހަޟާރީ ވެލިއުތަކާއި، ރޭވުންތެރިކަމާއި، ކެތްތެރިކަމާއި، މުޖުތަމައު ބިނާކުރުމުގެ ފިލާވަޅުތަކަށް މި މަޝްރޫއުގައި އަލިއަޅުވާލާފައިވާ ކަމަށް އެ ރިޕޯޓުގައި އިތުރަށް ބަޔާންކޮށްފައިވެ އެވެ.

ކީރިތި ރަސޫލާގެ ހިޖުރައިގެ ދަތުރުފުޅަކީ އަށް ދުވަހުގެ ތެރޭގައި 400 އަށްވުރެ ގިނަ ކިލޯމީޓަރު ކަޑައްތުކުރެއްވި ދަތުރުފުޅެކެވެ. މި ދަތުރުފުޅަކީ އަރަބި ކަރައިގެ އިޖުތިމާއީ، ސިޔާސީ އަދި އިގްތިސާދީ މަޝްރަހަށް ބޮޑެތި ބަދަލުތަކެއް ގެނުވި ދަތުރުފުޅެއް ކަމަށް އެސް.ޕީ.އޭ އިން ފާހަގަކޮށްފައިވެ އެވެ.