މަސްޖިދުލް ހަރާމްގެ މަތީ ފަންގިފިލާ އިން މީހަކު ފުންމާލައިގެން މަރުވާން އުޅެފި
މަސްޖިދުލް ހަރާމްގެ މަތީ ފަންގިފިލާއަކުން މީހަކު ފުންމާލައި އަމިއްލަ އަށް މަރުވާން އުޅުނު ހާދިސާ ގައި ސަލާމަތީ އޮފިޝަލަކަށް ވެސް އަނިޔާވި.
ސައުދީ އަރަބިއްޔާގެ މައްކާގައި ހުންނަ މުގައްދަސް މިސްކިތް މަސްޖިދުލް ހަރާމް
ސައުދީ އަރަބިއްޔާގެ މައްކާގައި ހުންނަ މުގައްދަސް މިސްކިތް - މަސްޖިދުލް ހަރާމްގެ މަތީ ފަންގިފިލާ އިން މީހަކު ބިންމައްޗަށް ފުންމާލައިގެން އަމިއްލަ އަށް މަރުވާން އުޅެފި އެވެ.
ބުރާސްފަތި ދުވަހުގެ ރޭ ހިނގި މި ނުރައްކާތެރި ހާދިސާ ގައި ސަލާމަތީ އޮފިޝަލަކަށް ވެސް ވަނީ އަނިޔާވެފަ އެވެ.
މަސްޖިދުލް ހަރާމްގެ ސަލާމަތީ ޚިދުމަތުން ބުނެފައިވަނީ މި ހާދިސާއަށް އަވަހަށް އިޖާބަދީފައިވާ ކަމަށާއި، ފުންމާލި މީހާ ވެއްޓިގެންދިޔަ ވަގުތު އެކަން ހުއްޓުވުމަށް މަސައްކަތްކުރަނިކޮށް ސަލާމަތީ އޮފިސަރަކަށް އަނިޔާވެފައިވާ ކަމަށެވެ.
ކަމާބެހޭ ފަރާތްތަކުން ހާމަކޮށްފައިވާ ގޮތުގައި، ފުންމާލި މީހާ އާއި ސަލާމަތީ އޮފިސަރު ވެސް ވަނީ ފަރުވާ ދިނުމަށް ގެންގޮސްފަ އެވެ.
ހަރާމްގެ ސަލާމަތީ ޚިދުމަތުން ނެރެފައިވާ ބަޔާނެއްގައިވާ ގޮތުގައި، "މަސްޖިދުލް ހަރާމްގެ މަތީ ފަންގިފިލާއިން މީހަކު އަމިއްލަ އަށް މަރުވާން އުޅުމުގެ ހާދިސާ އެއް ވަނީ ހިނގާފައެވެ."
މަސްޖިދުލް ހަރާމްގެ އިމާމް ޝައިޚް ޑރ. ޢަބްދުއްރަޙްމާން އައް ސުދާއިސް މި ހާދިސާއާ ގުޅިގެން، "ޤަވާޢިދުތަކާއި އިރުޝާދުތަކަށް ބޯލެނބުމަށާއި، ތަނުގެ ކަރާމާތަށް އިހުތިރާމް ކުރުމަށާއި، އިސްލާމީ ރަނގަޅު އަޚްލާޤް ދެމެހެއްޓުމަށާއި، އަޅުކަމަށާއި ކިޔަމަންތެރިކަމަށް ސަމާލުކަން ދިނުމަށް" ވަނީ ގޮވާލައްވާފައެވެ.
