ހޫނުގެ ސަބަބުން ހެނދުނު 10:00 އިން ހަވީރު 4:00 އަށް ހައްޖުވެރިން އެމީހުންގެ ކޭމްޕްތަކުން ބޭރަށް ނުނިކުންނަށް ސައުދީ ސަރުކާރުން އިލްތިމާސް ކޮށްފިއެވެ.

މި ފިޔަވަޅު އެޅީ ޢަރަފާތު ދުވަހުގެ ފިނިހޫނުމިން ވަރަށް މައްޗަށް ހިނގައިދާނެ ކަމަށް ލަފާކޮށް، ހޫނުގެ ސަބަބުން ސިއްހީ މައްސަލަތައް ކޮންޓްރޯލު ކުރުމަށް ކަމަށް ސައުދީ އަރަބިއްޔާގެ ޙައްޖާއި ޢުމްރާ އާ ބެހޭ މިނިސްޓަރ ތައުފީޤް އަލް ރަބީޢާ ވިދާޅުވިއެވެ.

މައްކާގެ ފިނިހޫނު މިން ދުވާލުގެ ގަޑީގައި 40 ޑިގުރީ ސެލްސިއަސް އަށް އަރާކަމަށް ރެކޯޑް ކުރެވިފައިވެއެވެ.

ހުސްވި އަހަރުގެ ހައްޖުގެ ތެރޭގައި ގަދަ ހޫނުގެ ސަބަބުން އެތައް ބަޔަކު ނިޔާވެފައިވާއިރު، ހުސްވި އަހަރު 51.8 ޑިގުރީ ސެލްސިއަސް އަށް ފިނިހޫނު މިން އަރައިގެން ދިޔަކަން ފާހަގަ ކުރެވެއެވެ.

ހޫނު ގަދަ ގަޑިތަކުގައި ބޭރުގައި ނޫޅުމަށް ސައުދީ ހައްޖާ ބެހޭ މިނިސްޓަރު ވިދާޅުވީ އާދީއްތަ ދުވަހު ޖިއްދާގައި ނިމުނު 49 ވަނަ ޙައްޖު ސިމްޕޯޒިއަމްގެ ހަވާސާ ގައި އެކި ޤައުމުތަކުގެ ޙައްޖު މިޝަންތަކުގެ އިސްވެރިންނާއެކު ބޭއްވުނު ބައްދަލުވުމެއްގައި ކަމަށް ސައުދީ މީޑިއާ އިން ރިޕޯޓު ކޮށްފައިވެއެވެ.

މުޤައްދަސް ތަންތަނުގައި ހައްޖުވެރިންގެ ހަރަކާތްތަކާ ގުޅޭގޮތުން ގަވާއިދުތަކަށް ކަނޑައެޅިގެން ޢަމަލު ކުރުމަށް ޙައްޖުގެ ކަންތައްތަކާ ބެހޭ އޮފީސްތަކަށް އަލް ރަބީޢާ ވަނީ އަންގަވާފައެވެ. އަދި ހައްޖުވެރިންގެ ސަލާމަތާއި ރައްކާތެރިކަމާ އެކު އެންމެ ފުރިހަމަ ގޮތުގައި އަޅުކަން އަދާކުރުމުގެ މުހިންމުކަން އޭނާ ފާހަގަ ކުރެއްވިއެވެ. ޢަރަފާތުން މުޒްދަލިފާ އަށް ދަތުރު ކުރުމުގައި ހިނގާފައި ދިއުމުގެ ބަދަލުގައި ކަނޑައެޅިފައިވާ ދަތުރުފަތުރުގެ ވަސީލަތްތައް ބޭނުންކުރުމުގެ މުހިންމުކަން މިނިސްޓަރު ފާހަގަ ކުރެއްވިއެވެ.

މަސްޖިދުލް ޙަރާމަށާއި، މުޤައްދަސް އެހެން ތަންތަނަށް ވަނުމަށާއި، އާންމު ދަތުރުފަތުރުގެ ވަސީލަތްތައް ބޭނުން ކުރުމަށް ނުސުކް ކާޑު ބޭނުން ކުރުން ލާޒިމު ކޮށްފައިވާ ކަމަށާއި، އެ ކާޑުގެ މުހިންމު ދައުރު އަލް ރަބީޢާ ފާހަގަ ކުރެއްވިއެވެ. އަޅުކަން އަދާކުރުމާއި ގަވާއިދާ ޚިލާފުވުން ހުއްޓުވުމަށް މިހާރު އެ ކާޑަކީ މުހިންމު ވަސީލަތެއް ކަމަށް އޭނާ ވިދާޅުވިއެވެ.

ހައްޖުވެރިންގެ ރައްކާތެރިކަމާއި ފުރިހަމަ ޙައްޖުގެ ތަޖުރިބާއެއް ކަށަވަރު ކުރުމަށްޓަކައި، ޙައްޖު ހުއްދަ ޗެކްކުރުން ވަރަށް ބޮޑަށް އިތުރު ކުރެވޭނެ ކަމަށް މިނިސްޓަރު ވިދާޅުވިއެވެ.