ރަމަޟާން މަހު މައްކާ އާއި މަދީނާގެ ހޫނުމިން މަތިވާނެ

ސައުދީ އަރަބިއްޔާގެ ނޭޝަނަލް ސެންޓަރ ފޯ މީޓިއޮރޮލޮޖީ (އެންސީއެމް) އިން 1447 ވަނަ އަހަރުގެ ރަމަޟާން މަހަށް ލަފާކުރާ މޫސުމީ ރިޕޯޓް އާންމުކޮށްފި އެވެ. މި ރިޕޯޓުގައި ވާގޮތުން، ކުރިއަށް އޮތް ރަމަޟާން މަހު މައްކާ އާއި މަދީނާއަށް ވާރޭ ވެހޭނެ ކަމަށް ލަފާކުރެވެނީ އާންމުކޮށް ވާރޭ ވެހޭ މިންވަރަށް ވުރެ މަދުންނެވެ. އަދި އެ ދުވަސްވަރު އެ ދެ ސިޓީގެ ހޫނުމިން އާންމު މިންގަނޑަށް ވުރެ ކުޑަކޮށް މަތިވާނެ ކަމަށް ވެސް ވަނީ ލަފާކޮށްފަ އެވެ.

އެ ސެންޓަރުން ހާމަކޮށްފައިވާ ގޮތުގައި، މައްކާ އާއި މަދީނާއަށް މި އަހަރުގެ ރަމަޟާން މަހު ވާރޭ ވެހޭނެ ކަމަށް ބެލެވެނީ އެ ދުވަސްވަރުގެ މޫސުމީ އެވްރެޖަށް ވުރެ ދަށް މިންވަރަކަށެވެ.

އާންމު ގޮތެއްގައި ރަމަޟާން މަހުގެ ތެރޭގައި މައްކާއަށް އެވްރެޖްކޮށް 4.2 މިލިމީޓަރުގެ ވާރޭ ވެހޭއިރު، މަދީނާއަށް ވެހެނީ 4.3 މިލިމީޓަރުގެ ވާރޭ އެވެ. ނަމަވެސް، މި އަހަރުގެ ރަމަޟާން މަހު ވާރޭ ވެހުނު ކަމުގައި ވިޔަސް، އެއީ ހިމަފޮދު ވާރޭ ކަމަށް އެ ސެންޓަރުން ލަފާކުރެ އެވެ.

ހޫނުމިނަށް ބަލާއިރު، ކުރިއަށް އޮތް ރަމަޟާން މަހު މައްކާ އާއި މަދީނާގެ ހޫނުމިން ހުންނާނީ އާންމު މިންގަނޑަށް ވުރެ މަތީގަ އެވެ.

މޫސުމީ ލަފާކުރުންތަކުން ދައްކާ ގޮތުގައި، މައްކާގެ ހޫނުމިން އެވްރެޖަށް ވުރެ ގާތްގަނޑަކަށް 1 ޑިގްރީ ސެލްސިއަސް މަތިވާނެ އެވެ. އަދި މަދީނާގެ ހޫނުމިން އެވްރެޖަށް ވުރެ 1.2 ޑިގްރީ ސެލްސިއަސް މަތިވާނެ ކަމަށް ވެސް ވަނީ ލަފާކޮށްފަ އެވެ.

މާޒީގެ ތަފާސްހިސާބުތަކަށް ބަލާއިރު، ރަމަޟާން މަހުގެ ތެރޭގައި މައްކާގެ އެވްރެޖް ހޫނުމިން ހުންނަނީ 26.8 ޑިގްރީ ސެލްސިއަސްގަ އެވެ. އަދި މަދީނާގެ އެވްރެޖް ހޫނުމިން ހުންނަނީ 23.1 ޑިގްރީ ސެލްސިއަސްގަ އެވެ.

އެންސީއެމް އިން ބުނި ގޮތުގައި މިފަދަ މޫސުމީ ލަފާކުރުންތަކެއް އާންމުކުރުމުގެ މަގްސަދަކީ، ރަމަޟާން މަހު ދެ ހަރަމްފުޅަށް ޒިޔާރަތްކުރާ ފަރާތްތަކަށް ޚިދުމަތްދޭ އިދާރާތަކުން ދުރާލައި ތައްޔާރުވުމަށާއި، އޮޕަރޭޝަނަލް ކަންކަން ރޭވުމަށް އެހީތެރިވެދިނުމެވެ.