ގުބާ ހައްޖު އެންޑް އުމުރާ މޯލްޑިވްސްގެ ހަވާލުގައި އުމުރާއަށްދާ އުމުރާވެރިން ސަޢޫދީއަރަބިއްޔާއަށް ގެންދިޔުމަށް ޤައުމީ އެއާލައިން މޯލްޑިވިއަން އާއި އެކު އެއްއަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ.

މިއެއްބަސްވުމުގައި ގުބާ ހައްޖު އެންޑް އުމުރާ މޯލްޑިވްސްގެ ފަރާތުން ސޮއިކުރެއްވީ މެނޭޖިންގ ޑައިރެކްޓަރ މުޙައްމަދު މަނިކެވެ. މޯލްޑިވިއަންގެ ފަރާތުން މިއެއްބަސްވުމުގައި ސޮއިކުރެއްވީ ޖެނެރަލްމެނޭޖަރ އިންޓަރނޭޝަލް މުޙައްދު ޝައްފާޙްއެވެ.

މިއެއްބަސްވުމުގެ ދަށުން އުމުރާވެރިން ގޮވައިގެން ކުރާ ޗާޓަރ ދަތުރުތަކަކީ މާލެ ޖިއްދާ އަދި ޖިއްދާ މާލެ، ސީދާ ދަތުރުތަކެކެވެ. އަދި ޢުމުރާވެރިންނަށް ޤައުމީ އެއާލައިނުން ފޯރުކޮށްދޭ ހުރިހާ ޚިދުމަތެއް ޤުބާގެ އުމުރާވެރީންނަށްވެސް މިއަދު ސޮއިކުރެވުނު އެއްބަސްވުމުގެ ދަށުން ލިބިގެންދާނެއެވެ.

ޖެނުއަރީ މަހު ޢުމުރާއަށްދާ ޢުމުރާވެރިންގެ ތެރެއިން ޖިއްދާއިން މައްކާއަށް ރޭލުގައި ދަތުރުކުރައްވަން ބޭނުންފުޅުވާ ޢުމުރާ ވެރިންނަށް ރޭލުގައި ދަތުރުކުރުމުގެ ފުރުޞަތުވެސް ޤުބާއިން ވަނީ ހުޅުވާލާފައެވެ.

މީގެ އިތުރުން މިފަހަރުވެސް ޤުބާގެ ހަވާލުގައި ޢުމުރާއަށްދާ އުމުރާވެރިން ތިބުމަށް ހަމަޖެހިފައި ވަނީ ދިވެހިންނަށް ޙަރަމްފުޅާއި އެންމެ ކައިރީގައި ތިބެވޭ ހޮޓާތަކުގައެވެ.

ޤުބާ ހައްޖު އެންޑް އުމުރާ މޯލްޑިވްސްގެ ހަވާލުގައި ޖެނުއަރީ މަހު އުމުރާއަށް ވަޑައިގަންނަވަން ބޭނުންފުޅުވާ ބޭފުޅުންނަށް ގުރޫޕުން ވަނީ ފުރުޞަތު ހުޅުވާލާފައެވެ.