އެތައް މިލިއަން މުސްލިމުން އަރަފާތު ދުވަސް ފާހަގަ ކުރަނީ
އަރާފާތު ދުވަހަކީ ހައްޖުގެ އެންމެ މުހިންމު ދުވަހަށް ވުމުގެ އިތުރުން ޙައްޖަށް ނުދާ މުސްލިމުންނަށް ވެސް ޢަރަފާ ދުވަހަކީ އަޅުކަމާ ތަގުވާގެ މުހިންމު ދުވަހެކެވެ.
އަރަފާތު ފަރުބަދައިގައި ހައްޖުވެރިން ޖަމާވެ ދުއާ ކުރުމުގައި - 5 ޖޫން 2025
ދުނިޔޭގެ އެކި ކަންކޮޅުތަކުގައިވާ އެތައް މިލިއަން މުސްލިމުންނަށް މިއަދަކީ އިސްލާމީ ކަލަންޑަރުގެ އެންމެ މުޤައްދަސް ދުވަސްތަކުގެ ތެރެއިން އެއް ދުވަސް ކަމުގައިވާ ޢަރަފާ ދުވަހެވެ.
މި ދުވަހަކީ ޙައްޖުވެރިންނަށާއި ދުނިޔޭގެ އެކި ކަންކޮޅުތަކުގައިވާ މުސްލިމުންނަށް އަހަރުގެ ތެރޭގައި ބައްދަލު ކުރާ އެންމެ މުހިންމު އެއް ދުވަހެވެ.
އިސްލާމީ ހިޖުރީ ކަލަންޑަރުގެ އެންމެ ފަހު މަސް ކަމުގައިވާ ޛުލްޙިއްޖާ މަހުގެ 9 ވަނަ ދުވަހު ފާހަގަކުރާ ޢަރަފާ ދުވަހަކީ ޙައްޖު އަޅުކަމުގެ އެންމެ މުހިންމު ދުވަސް ކަމުގައި ބެލެވެއެވެ. މި ރުކުން އަދާ ނުކޮށްފިނަމަ ޙައްޖު ބާޠިލު ވާނެއަތީ މިރުކުނުގެ މުހިންމުކަން ހާމަވެއެވެ.
މި ދުވަހު ޙައްޖުވެރިން ސަޢޫދީ ޢަރަބިއްޔާގެ މައްކާ އާ ކައިރީގައިވާ ޢަރަފާތު ފަރުބަދައިގެ މައިދާނަށް ހާޒިރުވެ، ފާފަފުއްސެވުމަށް އެދި މާތް ﷲ އަށް ދުއާ ކޮށް ދީނީ އަގީދާ ވަރުގަދަ ކުރުމުގެ އަޒުމް އައު ކުރެއެވެ. ޢަރަފާތުގައި ވަގުތު ކޮޅެއްގައި ހުރުން ނުވަތަ ވުޤޫފު އަކީ ޙައްޖުގެ އެންމެ މައިގަނޑު ރުކުނެވެ.
މެންދުރުން ފެށިގެން އިރު އޮއްސެންދެން، ޙައްޖުވެރިން ޢަރަފާތު މައިދާނަށް ޖަމާވަމުން ދެއެވެ. މިއީ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމް އެންމެ ފަހު ޚުޠުބާ އިއްވެވި ތަނެވެ.
ޙައްޖަށް ނުދާ މުސްލިމުން ވެސް ޢަރަފާ ދުވަސް ވަރަށް މުހިންމު ދުވަހެއްގެ ގޮތުގައި ފާހަގަ ކުރެއެވެ.
ގިނަ މީހުން މި ދުވަހު ރޯދަ ހިފައެވެ. އެއީ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަ ޙައްޖަށް ނުދާ މީހުންނަށް މި ދުވަހު ރޯދަ ހިފުމަށް ހިތްވަރު ދެއްވާފައިވާތީއެވެ.
އިސްލާމީ ޢަޤީދާގައިވާ ގޮތުން، މި ދުވަހު ރޯދަ ހިފުމުން ވޭތުވެދިޔަ އަހަރާއި އަންނަން އޮތް އަހަރުގެ ފާފަތައް ފުހެވިގެންދެއެވެ.
ދީނީ ޢިލްމުވެރިން މި ދުވަސް ސިފަކުރައްވަނީ އަހަރުގެ އެހެން އެއްވެސް ދުވަހަކާ އަޅާނުކިޔޭ ވަރުގެ ރަޙުމަތާއި ފާފަފުއްސެވުމުގެ ދުވަހެއްގެ ގޮތުގައެވެ. މި ދުވަހު މާތް ﷲ މުއުމިނުންގެ ދުޢާ އިޖާބަ ކުރައްވައި، ފާފަ ފުއްސަވައި، އަދި ތެދު ހިތަކުން ތައުބާވާ މީހުންނަށް ރޫޙާނީ މަތިވެރިކަން ދެއްވާ ކަމަށް އިލްމުވެރިން ވިދާޅުވެއެވެ.
މި ދުވަހުގެ މުހިންމުކަން ފާހަގަ ކުރުމުގެ ގޮތުން، ގިނަ މުސްލިމު އަޣުލަބިއްޔަތު އޮންނަ ޤައުމުތަކުން ޢަރަފާ ދުވަސް ސަރުކާރު ބަންދު ދުވަހެއްގެ ގޮތުގައި އޮންނަނީ ކަނޑައަޅާފައެވެ.
އެމިރޭޓްސް، ކުވެއިތު، ޤަޠަރު، ބަޙްރެއިން، އަދި ޢުމާނުން ވެސް ޢަރަފާ ދުވަސް ފާހަގަކުރާނީ ސަރުކާރު ބަންދު ދުވަހެއްގެ ގޮތުގައެވެ. އަދި މުސްލިމު ދުނިޔޭގެ އެހެން ޤައުމުތަކުންވެސް މިފަދައިން ޢަމަލުކުރެއެވެ.
ދުނިޔޭގެ އެކި ކަންކޮޅުތަކުގައިވާ މިސްކިތްތަކާއި ގޭގޭގައި މުސްލިމުން މި ދުވަސް ހޭދަކުރަނީ ނަމާދުކުރުމާއި، ޤުރުއާން ކިޔެވުމާއި، އަދި ދުޢާކުރުމުގައެވެ.
މުސްލިމުންނަށް ޢަރަފާ ދުވަހަކީ ހަމައެކަނި ޙައްޖުގެ އެންމެ މުހިންމު ރުކުން އަދާކުރާ ދުވަހެއް ނޫނެވެ. އެއީ އީމާންކަމާއި، ތަވާޟުޢުވެރިކަމާއި، އަދި ﷲ ތަޢާލާގެ ރަޙުމަތަށް އެދުމުގެ މުހިންމު ދުވަހެކެވެ.
ޢަރަފާ ދުވަހުގެ ފަހުން އަންނަނީ ޢީދުލް އަޟްޙާ އެވެ. މިއަހަރު ޢީދުލްއަޟްޙާ ފެށޭނީ މާދަމާ ހުކުރު ދުވަހު، ޖޫން 6 ގައެވެ.
ދުނިޔޭގެ އެކި ކަންކޮޅުތަކުގައިވާ މުސްލިމުން މި މުނާސަބަތު ފާހަގަކުރަނީ ޚާއްޞަ ނަމާދަކާއި އަދި ނައަމްސޫފި ޤުރުބާން ކުރުމުގެ ދުވަހެއްގެ ގޮތުގައެވެ. މި ޤުރުބާނީގެ ޝިޢާރަކީ ﷲ ތަޢާލާގެ އަމުރުފުޅަށް ކިޔަމަންވުމުގެ ގޮތުން އިބްރާހީމް ޢަލައިހިއްސަލާމް އެކަލޭގެފާނުގެ ލޮބުވެތި ދަރިކަލުން ޤުރުބާން ކުރައްވަން ތައްޔާރުވެވަޑައިގަތުމެވެ.
