ބަންގްލަދޭޝްގެ އާ ސަރުކާރު ހުވާކުރުމުގެ ރަސްމިއްޔާތަށް ސާކްގެ ފޮރިން މިނިސްޓަރުންނަށް ދައުވަތު އަރުވައިފި

ބަންގްލަދޭޝްގެ އާ ސަރުކާރު ހުވާކުރުމުގެ ރަސްމިއްޔާތަށް ސާކްގެ ގައުމުތަކުގެ ފޮރިން މިނިސްޓަރުންނަށް ދައުވަތު އަރުވައިފިއެވެ. މިކަން ހާމަކުރެއްވީ އާދީއްތަ ދުވަހު ނޫސްވެރިން ކުރި ސުވާލުތަކަށް ޖަވާބު ދެއްވަމުން، އެ ގައުމުގެ އިންތިގާލީ ސަރުކާރުގެ ލޯ އެޑްވައިޒަރުގެ މަގާމުން ވަކިވެވަޑައިގަންނަވާ އާސިފް ނަޒްރޫލް އެވެ.

އާދީއްތަ ދުވަހުގެ ހެނދުނު، އިންތިގާލީ ސަރުކާރުގެ އެޑްވައިޒަރުންގެ ފަހު ބައްދަލުވުން ވަނީ ޗީފް އެޑްވައިޒަރުގެ އޮފީހުގައި ބާއްވާފަ އެވެ. މިއީ އެ ބޭފުޅުންގެ ވަދާއީ ބައްދަލުވުންކަން ފާހަގަކުރައްވައި، ލޯ އެޑްވައިޒަރު ވިދާޅުވީ މި ބައްދަލުވުމުގައި މުހިންމު ނިންމުންތަކެއް ނިންމާފައި ނުވާ ކަމަށެވެ. ނަމަވެސް، މަސައްކަތުގެ ތަޖުރިބާ ހިއްސާކުރުމުގެ އިތުރުން، އާ ސަރުކާރު ހުވާކުރުމުގެ ރަސްމިއްޔާތާ ގުޅޭ މައުލޫމާތު ހުރިހާ ބޭފުޅުންނަށް މި ބައްދަލުވުމުގައި ވަނީ ހިއްސާ ކޮށްފަ އެވެ.

އާސިފް ނަޒްރޫލް އިތުރަށް ވިދާޅުވީ، އަންގާރަ ދުވަހުގެ ހެނދުނު 10:00 ގައި އާ މަޖިލިސް މެންބަރުން ހުވާކުރެއްވުން އޮންނާނެ ކަމަށާއި، ބޮޑަށް ބެލެވޭ ގޮތުގައި މެންބަރުންނަށް ހުވާލައިދެއްވާނީ ޗީފް އިލެކްޝަން ކޮމިޝަނަރު ކަމަށެވެ. 

ކެބިނެޓްގެ ވަޒީރުން ހުވާކުރުމުގެ ރަސްމިއްޔާތު އޮންނާނީ އަންގާރަ ދުވަހުގެ ހަވީރު 4:00 ގައި ޕާލިމަންޓްގެ ސައުތު ޕްލާޒާގައި ކަމަށް ލޯ އެޑްވައިޒަރު ވިދާޅުވި އެވެ. އަދި އޭނާއަށް މައުލޫމާތު ލިބިފައިވާ ގޮތުގައި ވަޒީރުންނަށް ހުވާލައިދެއްވާނީ އެ ގައުމުގެ ރައީސްއެވެ. 

މި ރަސްމިއްޔާތަށް ދައުވަތު އެރުވުމުގެ ކަންކަން ކެބިނެޓް ޑިވިޜަނުން ކުރިއަށްގެންދަނީ އާންމުކޮށް އަމަލުކުރާ ޕްރޮޓޮކޯލްގެ ދަށުން ކަމަށް ލޯ އެޑްވައިޒަރު ވިދާޅުވިއެވެ. އިންޑިއާގެ ބޮޑުވަޒީރަށް ދައުވަތު އެރުވިތޯ ނޫސްވެރިން ސުވާލުކުރުމުން އޭނާ ވިދާޅުވީ، އެކަމާ ގުޅޭ އެއްވެސް މައުލޫމާތެއް ލިބިވަޑައިގެންފައި ނުވާ ކަމަށެވެ. ނަމަވެސް، ފޮރިން މިނިސްޓްރީން މިހާތަނަށް ދިވެހިރާއްޖެ ހިމެނޭހެން ސާކްގެ ގައުމުތަކުގެ ފޮރިން މިނިސްޓަރުންނަށް ދައުވަތު އަރުވާފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށާއި، އެއްވެސް ގައުމެއްގެ އިސްވެރިއަކަށް (ހެޑް އޮފް ގަވަރމަންޓް) ދައުވަތު އެރުވިކަން އެނގިވަޑައިގެންފައި ނުވާ ކަމަށް އާސިފް ނަޒްރޫލް ވިދާޅުވިއެވެ.