ބިދޭސީންގެ އަތުން މަކަރާއި ހީލަތުން ފައިސާ ހޯދަމުންދިޔަ ބިދޭސީންތަކެއް ހައްޔަރުކޮށްފި
ވޯކް ޕާމިޓާ ހިލާފަށް ވިޔަފާރިކުރުމާއި ވޯކް ޕާމިޓް ހޯދައިދޭނެ ކަމަށް ބުނެ އޮޅުވާލައިގެން ފައިސާ ހޯދާ މައްސަލައެއްގައި ބަނގްލަދޭޝްއަށް ނިސްބަތްވާ 6 ބިދޭސީއަކު ހައްޔަރުކޮށްފި. އެމީހުން ހައްޔަރުކޮށްފައިވަނީ ޑިސެންބަރު 22 އިން 30 އަށް ކުރެވިފައިވާ އޮޕަރޭޝަންތަކުގަ. 6 ބިދޭސީން އަދިވެސް ތިބީ ކޯޓު އަމުރެއްގެ ދަށުން ފުލުހުންގެ ބަންދުގަ.
އޮޅުވާލައިގެން ފައިސާ ހޯދި ބިދޭސީން | ޕޮލިސް މީޑިޔާ
އޮޅުވާލައިގެން އެހެން ބިދޭސީންގެ އަތުން ގިނަ އަދަދެއްގެ ފައިސާ ހޯދައި މަނީ ލޯންޑަރިންގްގެ އަމަލުތައް ހިންގަމުންދާ ކަމަށް ތުހުމަތުކުރެވޭ މައްސަލައެއްގައި 6 ބިދޭސީއަކު ހައްޔަރުކޮށްފި އެވެ.
ފުލުހުން ބުނީ، މި މީހުންނަށް ތުހުމަތު ކުރެވެނީ ވޯކް ޕާމިޓާ ހިލާފަށް ރާއްޖޭގައި ވިޔަފާރިކުރުމާއި، ރާއްޖޭގައި މަސައްކަތް ކުރުމަށް ވޯކް ޕާމިޓް ހޯދައިދޭނެ ކަމަށް ބުނެ އޮޅުވާލައިގެން ފައިސާ ހޯދަމުންދާ މައްސަލަ ކަމަށެވެ.
މި މައްސަލައާ ގުޅިގެން ހައްޔަރުކޮށްފައިވަނީ ބަނގްލަދޭޝްއަށް ނިސްބަތްވާ މުޙައްމަދު އިމޮން ކަޒި (32އ) އާއި އަފްޖަލް ހޮސައިން (31އ) އާއި ޙަބީބުއްރަޙްމާން (35އ) އާއި މުޙައްމަދު ޙަނީފް ބަޕަރީ (46އ) އާއި ކަޒި ރައިހާން (22އ) އަދި މުޙައްމަދު ޔޫސުފް ޕްރޮދަން (35އ) އެވެ.
އެމީހުންގެ ތެރެއިން މުހައްމަދު އިމޮން ކަޒި އާއި ކަޒި ރައިހާން އަދި މުހައްމަދު ޔޫސުފް ޕްރޮދަން ހައްޔަރުކޮށްފައިވަނީ 2025 ޑިސެންބަރު 22 ވަނަ ދުވަހު އެވެ. އަފްޖަލް ހޮސައިން އާއި ހަބީބުއްރަޙްމާން ހައްޔަރުކޮށްފައިވަނީ 2025 ޑިސެންބަރު 23 ވަނަ ދުވަހު އެވެ. އަދި މުޙައްމަދު ހަނީފް ބަޕަރީ ހައްޔަރުކޮށްފައިވަނީ 2025 ޑިސެންބަރު 30 ވަނަ ދުވަހު އެވެ.
އެ އެންމެން އަދިވެސް ތިބީ ކޯޓު އަމުރެއްގެ ދަށުން ފުލުހުންގެ ބަންދުގަ އެވެ.
