ބަންގްލަދޭޝްގެ އިންތިޚާބު ބީއެންޕީން ކާމިޔާބުކޮށްފި ކަމަށް އެ ޕާޓީން ބުނެފި

ތާރިގު ރަހުމާންގެ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ބުރާސްފަތި ދުވަހު ބޭއްވި ތާރީޚީ އިންތިޚާބުގެ އަޣުލަބިއްޔަތު ކާމިޔާބުކޮށްފައިވާ ކަމަށާއި، ކުރިއަށް އޮތް ސަރުކާރު އެކުލަވާލާނީ އެ ޕާޓީން ކަމަށް ބުނެފި އެވެ.

އިންތިޚާބުން ބަލިވިކަން އަދި ގަބޫލުކޮށްފައިނުވާ ޖަމާއަތޭ އިސްލާމީން ބުނީ، ވޯޓު ގުނުމުގެ ކަންކަން ދިޔަ ގޮތާމެދު "ހިތްހަމަނުޖެހޭ" ކަމަށާއި، ނަތީޖާ އިއުލާންކުރުމުގެ މަރުހަލާގެ ސައްހަކަމާ މެދު "ސީރިއަސް ސުވާލުތަކެއް" އުފެދޭ ކަމަށެވެ.

ބީއެންޕީން ހޯދި ކާމިޔާބީއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ އާއި ޕާކިސްތާނުގެ ރައީސް އާސިފް އަލީ ޒަރުދާރީގެ އިތުރުން ބޮޑުވަޒީރު ޝެހްބާޒް ޝަރީފް ވަނީ ތާރިގު ރަހުމާނަށް މަރުހަބާ ވިދާޅުވެފަ އެވެ. މި ބޭފުޅުން ވަނީ ބީއެންޕީގެ ކާމިޔާބީ އަކީ "ބޮޑު" އަދި "ވަރުގަދަ" ކާމިޔާބީއެއްގެ ގޮތުގައި ސިފަކުރައްވާފަ އެވެ.

ބަންގްލަދޭޝްގެ އިލެކްޝަން ކޮމިޝަނުން އަދި ރަސްމީ ނަތީޖާ އިއުލާންކޮށްފައެއް ނުވެއެވެ. ނަމަވެސް މީޑިއާތަކުން ރިޕޯޓުކޮށްފައިވާ ނުރަސްމީ ވަގުތީ ނަތީޖާތަކުން ދައްކާ ގޮތުގައި، ގާނޫނު ހަދާ މަޖިލީހުގެ 299 ދާއިރާގެ ތެރެއިން 200 އަށްވުރެ ގިނަ ގޮނޑި ބީއެންޕީން ވަނީ ކާމިޔާބުކޮށްފަ އެވެ. ވާދަވެރި ޖަމާއަތޭ އިސްލާމީ އިއްތިހާދަށް ލިބިފައިވަނީ 70 ގޮނޑި އެވެ.

މި އިންތިޚާބާ އެކު، ސިޔާސީ އިސްލާހުތަކާ ގުޅޭ ފެންނަ ނުފެންނަ ވޯޓެއްވެސް ވަނީ ކުރިއަށް ގެންގޮސްފަ އެވެ. މީގެ ތެރޭގައި ބޮޑުވަޒީރުގެ މަގާމު އަދާކުރެވޭނެ ދައުރުގެ އަދަދު ކަނޑައެޅުމާއި، ސަރުކާރުގެ ބާރުތައް ހިފެހެއްޓުމަށް މިހާރަށްވުރެ ވަރުގަދަ ނިޒާމެއް ގާއިމުކުރުމާއި، މަޖިލީހުގެ ތެރެއިން ބާރުތައް އެއްކުރުން ހުއްޓުވުމަށް ބޭނުންވާ ހަރުދަނާ ފިޔަވަޅުތައް ހިމެނެ އެވެ.

ރަސްމީކޮށް ނަތީޖާ އިޢުލާންކުރާނީ ހޮނިހިރު ދުވަހެއްގެ ވަގުތެއްގައި ކަމަށް ބެލެވެ އެވެ.

ނުރަސްމީ ގޮތުން ބަލާއިރު، މިހާތަނަށް ނަތީޖާ އިޢުލާންކުރި 284 ގޮނޑީގެ ތެރެއިން 208 ގޮނޑި ކާމިޔާބުކޮށްފައިވަނީ ބީ.އެން.ޕީ (BNP) އިން ކަމަށް ވުމާއެކު، އެ ޕާޓީއަށް ސަރުކާރު އެކުލަވާލުމަށް ބޭނުންވާ ތިންބައިކުޅަ ދެބައިގެ ބޮޑު އަޣުލަބިއްޔަތެއް ލިބިގެންދާނެ އެވެ.

ދިހަ އަހަރު ދުވަހުގެ މަނާކުރުންތަކާއި ހުރަސްތަކަށްފަހު، ޖަމާއަޭ އިސްލާމީ އިން ވަނީ މި އިންތިޚާބުގައި ފާހަގަކޮށްލެވޭ ފަދަ ކާމިޔާބީއެއް ހޯދާފަ އެވެ. އެ ޕާޓީން 70 ގޮނޑި ކާމިޔާބުކޮށްފައިވާއިރު، މިއީ މަޖިލީހުގައި ވަރުގަދަ އިދިކޮޅު ޕާޓީއެއްގެ ގޮތުގައި ފެނިގެންދާނެ ބާރެކެވެ.