ތިލަފުށިން މަރުވެފައި އޮއްވާ ފެނުނީ ބަންގްލަދޭޝްގެ ރައްޔިތެއް ކަމަށްވާ އަމީން މިއާ

ކ.ތިލަފުށިން މަރުވެފައި އޮއްވާ ފެނުނު މީހާގެ ވަނަވަރު ފުލުހުން ހާމަ ކޮށްފި އެވެ. 

ބުރާސްފަތި ދުވަހު ފުލުހުން ބުނީ، ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނިފައިވަނީ ބަންގްލަދޭޝްގެ ރައްޔިތެއް ކަމަށްވާ 24 އަހަރުގެ އަމީން މިއާ ކަމަށެވެ.

މިހާތަނަށް ބެލި ބެލުމުން، އަމީން މިއާ މަރުވުމުގެ ހާދިސާ ހިނގާފައިވަނީ 2026 ޖެނުއަރީ 26 ވަނަ ދުވަހުކަން އެނގިފައިވާ ކަމަށް ފުލުހުން ބުނެ އެވެ. 

މީގެ އިތުރުން ފުލުހުން ބުނީ، މި މައްސަލައިގެ ތަހުގީގު ކުރިއަށްދާ މިންވަރަކުން ހާމަކުރެވެންހުރި މައުލޫމާތު ހާމަކުރަމުންދާނެ ކަމަށެވެ.

އަމީން މިއާ ގެ މަރު ގައި ޝާމިލްވާ ކަމަށް ތުހުމަތު ކުރެވެނީ ތިލަފުށީގައި ހައިމާކު ޑްރައިވަރެއްގެ ގޮތުގައި މަސައްކަތްކުރާ ސްރީލަންކާ އަށް ނިސްބަތްވާ މީހެއް ކަމަށް އިތުބާރުހުރި މަސްދަރަކުން ރާއްޖެ އެމްވީ އަށް މައުލޫމާތު ދީފައިވެ އެވެ.  އަދި އަމީން މިއާ މަރުވީ، ލަންކާ މީހާ އޮޕަރޭޓް ކުރި ހައިމާކުގެ ދަތްގަނޑުން ޖެހިގެން ނެވެ. މި މަހުގެ 26 ވަނަ ދުވަހު ހައިމާކުގެ ދަތްގަނޑުން މަރުވި އަމީން މިއާ ގައިގަ ޖެހޭ މަންޒަރު އެ ސަރަހައްދުގެ ސީސީޓީވީ ގެ ފޫޓޭޖެ ތަކުން ފެނެ އެވެ.

އަމީން މިއާ އަދި، މި މައްސަލައިގަ ތުހުމަތު ކުރެވޭ ލަންކާ މީހާ ވެސް މަސައްކަތް ކުރަނީ ތިލަފުށީ ވެމްކޯ ސައިޓެއްގަ ކަމަށް ވެސް ވަނީ މައުލޫމާތު ލިބިފައިވެ އެވެ.