ކުރިއަށް އޮތް ލޯކަލް ކައުންސިލް އިންތިހާބަކީ އަޅުވެތިކަމަށް ނޫނެކޭ ބުނަން ލިބޭ ފުރުސަތެއް: އަހުމަދު އަބްދުﷲ
ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނަށް ރ. ދުވާފަރަށް ކުރެއްވި ޒިޔާރަތަށްފަހު ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވީ، ސަރުކާރުގެ ނުފޫޒާއި ވަޒީފާގެ ބިރުދެއްކުންތަކާ މެދު ރައްޔިތުންގެ މެދުގައި ބޮޑު ނުރުހުމެއް އޮތްކަން ފާހަގަކުރެވޭ ކަމަށް. މީގެ އިތުރުން، ފެންނަ ނުފެންނަ ވޯޓާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމުގައި އިލެކްޝަންސް ކޮމިޝަނުން އިހުމާލުވަމުންދާ ކަމަށް ވިދާޅުވެ އޭނާ ވަނީ އެކަން ކުށްވެރިކުރައްވާފަ. އެހެންކަމުން، އެކަށީގެންވާ މައުލޫމާތު ނުދީ އިންތިޚާބު ބޭއްވުމަކީ ބަލައިގަނެވޭނެ ކަމެއް ނޫންކަމަށް އޭނާ ވިދާޅުވި.
ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ | ރާއްޖެ އެމްވީ
އަންނަ އޭޕްރީލް މަހު އޮންނަ ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަކީ ރައްޔިތުން އަޅުވެތިކަމަށް ނޫނެކޭ ބުނަން ލިބޭ ފުރުސަތެއް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނަށް އެމްޑީޕީގެ ލީޑަރޝިޕްގެ ބޭފުޅުން އަތޮޅު ތެރެއަށް ކުރައްވާ ދަތުރުގެ ތެރެއިން ރ. ދުވާފަރުގައި ދޮރުން ދޮރަށް ހަރަކާތް ނިންމަވާލެއްވުމަށްފަހު ރާއްޖެ އެމްވީ އަށް ދެއްވި އިންޓަވިއުއެއްގައި އަހުމަދު އަބްދުﷲ ވިދާޅުވީ، ދުވާފަރުގައި ކުރިއަށް ގެންދިޔަ ދޮރުން ދޮރަށް ހަރަކާތުގެ ތެރެއިން އެންމެ ބޮޑަށް ފާހަގަވި އެއްކަމަކީ، މިހާރުގެ ވެރިކަންކުރާ ފިކުރަށް ތާއީދު ކުރާ ވަރަށް ގިނަބައެއްގެ ހިތުގައި ނަފުރަތާ ރުޅިވެރިކަން އޮތްކަމާއި މިސަރުކާރު ބަލިކުރުމުގެ ވިސްނުން ހުރިކަން ކަމަށެވެ.
އެހެންނަމަވެސް އެމީހުން އެބަ ފާހަގަކުރޭ ނުފޫޒާ އަރާއި ބަރާ އޮތީމަ ވަޒީފާގެ ބިރު ދެއްކުމާ އަދި ފައިސާގެ އަޅުންނަށް ރައްޔިތުން ހެދުމަށްޓަކައި ކުރަމުންގެންދާ ވިޔާނުދާ އަމަލުގެ ވާހަކަ.ބާރަށު ދާއިރާގެ ކުރީގެ މެމްބަރު އަހުމަދު އަބްދުﷲ
މީގެ އިތުރުން އަހުމަދު އަބްދުﷲ ވިދާޅުވީ، ފެންނަ ނުފެންނަ ވޯޓުގެ ކަންތަކުގައި ރައްޔިތުންނަށް އެއްވެސް މައުލޫމާތެއް ލިބިފައިނެތް ކަމަށެވެ. އަދި ރައްޔިތުންނަށް އެކަށީގެންވާ މައުލޫމާތު ފޯރުކޮށްދިނުމަކީ ގާނޫނީ ގޮތުން އިލެކްޝަން ކޮމިޝަނަށް ލާޒިމު ކަމެއް ކަމަށް އަހުމަދު އަބްދުﷲ ވިދާޅުވި އެވެ.
އިލެކްޝަން ކޮމިޝަނުން ރައްޔިތުންނަށް އެކަށީގެންވާ މައުލޫމާތު ހިއްސާނުކޮށް އިންތިހާބު ބެއްވުމަކީ ބަލައިގަނެވޭނެ ކަމެއް ނޫންކަން ފާހަގަކުރައްވާ އަހުމަދު އަބްދުﷲ ވިދާޅުވީ އިލެކްޝަން ކޮމިޝަނުން އެކަންކަމުން އެއްކިބާވެގެން ތިބެ އެ ހިންގަނީ ޖަރީމާއެއް ކަމަށެވެ.
