ސްޓެލްކޯ އިން އިންތިޚާބު ބޯމަތިވެފައިވަނިކޮށް ރޯދަ މަހަށް 400ރ. ގެ ބިލެއް ހަދަނީ
ރަމަޟާން މަހުގެ ކަރަންޓު ބިލު 400 ރުފިޔާއަށް ވުރެ ބޮޑުނުވާނެހެން ޑިސްކައުންޓް ދިނުމަށް ރައީސުލްޖުމްހޫރިއްޔާ ނިންމެވުމާ ގުޅިގެން، އެ މަހަށް ވަކި ބިލެއް ތައްޔާރުކުރުމަށް ރީޑިންގ ނެގުމުގެ މަސައްކަތް ސްޓެލްކޯއިން ފަށާފައިވާ ކަމަށް ބުނޭ. ސަރުކާރުގެ ކުންފުނިތައް މެދުވެރިކޮށް ރައީސްގެ ނަންފުޅުގައި މިފަދަ އިނާޔަތްތައް ދެމުންދާއިރު، މިއީ ދަރަނީގައި ހިނގާ ކުންފުނިތަކަށް އިތުރު ބުރައެއް ކުރިމަތިވެދާނެ ކަމެއް ކަމަށް ތަޖުރިބާކާރުން ފާހަގަކުރޭ.
ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ، ޑރ. ޢަލީ އަޒްވަރު (ވ) އާއި ކުންފުނީގެ ބައެއް އިސްވެރިން ކ. ގުޅީފަޅަށް ޒިޔާރަތްކުރައްވައި، އެ ރަށުގައި ކަރަންޓުގެ ޚިދުމަތް ދެމުންދާ ގޮތް ބައްލަވާލައްވަނީ. | ސްޓެލްކޯ
ސްޓެލްކޯ އިން އިންތިޚާބު ބޯމަތިވެފައިވަނިކޮށް ރޯދަ މަހަށް 400ރ. ގެ ބިލެއް ހަދައިދޭ ގޮތަށް ހަމަ ޖައްސައިފި އެވެ.
ރައީސް މުހައްމަދު މުއިއްޒު އަށް ކްރެޑިޓް ލިބޭ ގޮތަށް އެ ކުންފުނިން އެކްސް ގައި ކޮށްފައިވާ ޕޯސްޓެއްގައި ބުނެފައިވަނީ "ރަމަޟާން މަހުގެ ކަރަންޓު ބިލު 400 ރުފިޔާ އަށް ވުރެ ބޮޑު ނުވާނެހެން ޑިސްކައުންޓް ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާތީ، ރަމަޟާން މަހަށް ވަކި ބިލެއް ތައްޔާރުކުރުމަށް ރީޑިންގ ނެގުމުގެ މަސައްކަތް 2026 ފެބުރުވަރީ 16 އަދި 17 ވަނަ ދުވަހު ކުރިއަށްދާނެ," ކަމަށެވެ.
މިކަމުގައި ހުރިހާ ކަސްޓަމަރުން ވެސް ސްޓެލްކޯ އަށް އެއްބާރުލުން ދިނުން އެދޭ ކަމަށް ވެސް ބުނެފައިވެ އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރެކޯޑްތައް ދައްކާ ގޮތުގައި 2024 ވަނަ އަހަރު ސްޓެލްކޯ އަށް 115،793،426ރ ސަބްސިޑީގެ ގޮތުގައި ސަރުކާރުން ދީފައިވެ އެވެ.
ސަރުކާރުގެ ކުންފުނިތަކުގެ ވަސީލަތްތައް ބޭނުން ކޮށްގެން ރައްޔިތުނަށް ރައީސުލްޖުމްހޫރިއްޔާ ދެއްވާ އިނާޔަތުގެ ގޮތުގައި ކަންކަން ސިފަ ކުރަމުން މި ސަރުކާރުން ކުރިއަށް ގެންދާއިރު، ރައީސުލްޖުމްހޫރިއްޔާ ދެއްވާ ރޯދަ ހަދިޔާ ގެ ނަމުގައި ރޯދަ މަހާ ދިމާކޮށް މަސް ދަޅު ކޭސް ވެސް ގެންދަނީ ބަހަމުންނެވެ. މިއީ ވެސް ދަރަނީގައި ހިންގަމުންދާ ކުންފުންޏަކުން ރައީސް މުއިއްޒު އަށް ކްރެޑިޓް ލިބޭ ގޮތަށް ހިންގަމުންދާ ޕްރޮގްރާމެއް ކަން ފާހަގަ ކުރެވެ އެވެ.
ހިލޭ މަސްކޭސް ބެހި މިފްކޯ އަށް 2024 ވަނަ އަހަރު 355،496،140ރ. ސަބްސިޑީގެ ގޮތުގައި ސަރުކާރުން ދީފައިވާ އިރު 2024 ވަނަ އަހަރު މިފްކޯ އަށް 166 މިލިއަން ރުފިޔާ ގެއްލުންވެފައިވާކަން ޕީސީބީގެ ރެކޯޑްތަކުން ދައްކަ އެވެ.
ކުންފުނިތަކުން މި ގޮތަށް ބަހާ ތަކެއްޗާއި ދޭ ޑިސްކައުންޓް ހަގީގަތުގައި ވެގެން ދަނީ ކުންފުނީގެ އިތުރު ދަރަންޏަށް ކަމަށް ތަޖުރިބާކާރުން ފާހަގަ ކުރެ އެވެ. އަދި ކުންފުނިތައް އިތުރަށް ދަރަނިވެރިވުމަކީ އޭގެ ޒިންމާ އާޚިރުގައި ރައްޔިތުންގެ ބޮލުގައި އެޅޭ އެއްޗެއް ކަމަށް ވެސް އެ ފަރާތްތަކުން ބުނެ އެވެ.
ސަރުކާރުގެ ކުންފުނިތަކުގެ މާލީ ހާލަތާ ބެހޭ ގޮތުން ޕީސީބީ އިން އެންމެ ފަހުން ނެރެފައިވާ "އެސްއޯއީ ސެކްޓަރ ރިޕޯޓް 2024" ގައި ފާހަގަކުރެވުނު ގޮތުގައި، ދައުލަތުގެ ބައެއް ކުންފުނިތަކުގެ މުދަލުގެ ޖުމްލަ އަގާ އަޅާބަލާއިރު ދަރަނީގެ ނިސްބަތް 50 އިންސައްތައަށްވުރެ މަތީގައި ހުރިކަން ފާހަގަކުރެވެ އެވެ. މިއީ އެ ކުންފުނިތަކުގެ ރައުސްމާލުގެ ދެބައިކުޅަ އެއްބަޔަށްވުރެ ބޮޑު ބައެއް ހިއްސާކުރަނީ ދަރަނިކަން އަންގައިދޭ ކަމެއް ކަމަށް ވެސް ބުނެފައިވެ އެވެ. މި ނިސްބަތް މަތިވުމަކީ، ވިޔަފާރީގެ ހާލަތާ ނުބައްދަލު މިންވަރަކަށް ދަރަނި އިތުރުވެފައިވާކަމުގެ ނިޝާނެއް ކަމަށް ވެސް ބުނެފައިވެ އެވެ. ޖުމްލަގޮތެއްގައި ފާހަގަކުރެވެނީ، ފަހި ދިރިއުޅުން ކޯޕަރޭޝަން (އެފް.ޑީ.ސީ) އާއި (އައްޑޫ އިންޓަރނޭޝަނަލް ޕްރައިވެޓް ލިމިޑެޓް (އޭ.އައި.އޭ) ފިޔަވައި، އެހެން ހުރިހާ ކުންފުނިތަކެއްގެ ދަރަނި ހުރީ 50 އިންސައްތައާ ގާތްކުރާ މިންވަރެއްގައި ކަން ވެސް ޕީސީބީ އިން ވަނީ ފާހަގަ ކޮށްފަ އެވެ.
2024 ވަނަ އަހަރަށް ބަލާއިރު ޖުމްލަ އެސެޓާއި ކުންފުނީގެ ދަރަނީގެ ނިސްބަތް ސްޓެލްކޯ ގައި ހުރީ 117 އިންސައްތައިގަ އެވެ. އަދި މިފްކޯ ގައި މި މިންގަނޑު ހުރީ 22- އިންސައްތައިގަ އެވެ.
