ކެނދިކުޅުދޫ 30 އެނދުގެ ޓާޝަރީ ހޮސްޕިޓަލްގެ މަސައްކަތް ފައިސާ ހަމަނުޖެހޭތީ މަޑުޖެހިއްޖެ: ކައުންސިލްގެ ރައީސް ރައޫފް
ކޮންޓްރެކްޓަރ ފައިނޭންސް އުސޫލުން ކުރިއަށްގެންދާ މި މަޝްރޫއުގެ މަސައްކަތް ލަސްވަނީ ބޭންކު މެދުވެރިކޮށް ފައިސާ ހަމަޖެހުމުގައި ހުރި ދަތިތަކާ ގުޅިގެން ކަމަށްވާއިރު، ކުރިން 100 އެއްހާ މުވައްޒަފުން މަސައްކަތްކުރި ސައިޓުގައި މިހާރު ތިބީ އެންމެ 8 މުވައްޒަފުން. މިކަމުގެ ސަބަބުން ރަނގަޅު ސިއްހީ ހިދުމަތެއް ލިބޭނެ ކަމަށް އުއްމީދުކޮށްގެން ތިބި ކެނދިކުޅުދޫ އާއި ކައިރި ރަށްރަށުގެ ރައްޔިތުންގެ ކަންބޮޑުވުން ވަނީ އިތުރުވެފައި.
އެމްޑީޕީ ސަރުކާރުގައި ކެނދިކުޅުދޫގައި ހަދަން ފެށި 30 އެނދުގެ ޓާޝަރީ ހޮސްޕީޓަލް. | ރާއްޖެ އެމްވީ
އެމްޑީޕީ ސަރުކާރުގައި ފެށި ކެނދިކުޅުދޫ 30 އެނދުގެ ޓާޝަރީ ހޮސްޕިޓަލްގެ މަސައްކަތް މި ސަރުކާރުން ކަންކަން ކުރާގޮތުން ފައިސާ ހަމަނުޖެހި މަސައްކަތް މަޑުޖެހިފައިވާ ކަމަށް ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވެއްޖެ އެވެ.
ކެނދިކުޅުދޫ 30 އެނދުގެ ޓާޝަރީ ހޮސްޕިޓަލަކީ 2023 ވަނަ އަހަރުގެ ޖެނުއަރީ މަހު ޕްރޮޖެކްޓް އިއުލާންކޮށް އެއަހަރުގެ އޮގަސްޓް މަހު ބިންގާ އެޅި މަޝްރޫއެކެވެ. ނަމަވެސް ސަރުކާރު ބަދަލުވި ފަހުން ޕްރޮޖެކްޓުގެ މަސައްކަތް ކުރިއަށް ދަނީ ވަރަށް ލަސް ސްޕީޑުގަ އެވެ. މިކަމާއި ގުޅިގެން ރާއްޖެޓީވީ އާއި ވާހަކަ ދައްކަވަމުން ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވީ 2023 ވަނަ އަހަރު ޕްރޮޖެކްޓުގެ މަސައްކަތް ފެށުނު ކަމަށެވެ. އަދި ޕްރޮޖެކްޓުގެ ކޮންކްރީޓް މަސައްކަތް ވަރަށް ބާރު ސްޕީޑުގައި ކުރިއަށް ދިޔަ ކަމަށާއި، ވެރިކަން ބަދަލުވެއްޖެ ނަމަ މަސައްކަތަށް ލަސްކަމެއް އައިސްދާނެ ކަމުގެ ބިރު އެއިރު ވެސް އޮތް ކަމަށެވެ.
ކައުންސިލްގެ ރައީސް ވިދާޅުވީ ހޮސްޕިޓަލުގެ މަސައްކަތް އެކިފަހަރު މަތިން ހުއްޓި 100 ވަރަކަށް މުވައްޒަފުން މަސައްކަތް ކުރަމުންދިޔަ އެ ޕްރޮޖެކްޓުގައި މިހާރު މަސައްކަތް ކުރަމުންދަނީ އެންމެ 8 މުވައްޒަފުން ކަމަށެވެ.
މިއީ 193 މިލިއަން ރުފިޔާގެ ޕްރޮޖެކްޓެއް. މި ޕްރޮޖެކްޓް ހަވާލުކުރީ ބޭންކު ލޯން ކޮންޓްރެކްޓަރަށް ލިބޭ ގޮތަށް، ކޮންޓްރެކްޓަރ ފައިނޭންސް އުސޫލުން. ބޭންކު ބޯޑު ބަދަލުކުރުމާއި ސަރުކާރުގެ ތެރެއިން ހިނގައި ދިޔަ ކަންތަކާއި ގުޅިގެން ފައިސާ ނުލިބޭ ކަމަށް ކޮންޓްރެކްޓަރ ސައިޑުން މައުލޫމާތުދޭ. އެހެންވީމާ ލަސްކަމެއް އެބަ އާދޭ.ކެނދިކުޅުދޫ ކައުންސިލްގެ ރައީސް މުހައްމަދު ރައޫފް
ކައުންސިލް ރައީސް ވިދާޅުވީ ހޮސްޕިޓަލް ޕްރޮޖެކްޓަކީ މުހިންމު މަސައްކަތެއް ކަމަށެވެ. އަދި ހޮސްޕިޓަލުގެ މަސައްކަތް ފެށުމުން ރައްޔިތުން ތިބީ ވަރަށް އުފަލުން ކަމަށާއި، ރައްޔިތުން އުއްމީދުކުރީ ރަށުގައި ތިބެގެން ރަނގަޅު ސިއްހީ ހިދުމަތްތަކެއް ލިބިގެންދާނެ ކަމަށެވެ. އޭނާ ވިދާޅުވީ ކެނދިކުޅުދޫގެ އިތުރުން ކައިރި ރަށްރަށުގެ ރައްޔިތުން ވެސް ހޮސްޕިޓަލާ ދޭތެރޭގައި އުއްމީދު ކުރި ކަމަށެވެ.
ރައޫފް ވިދާޅުވީ މި ޕްރޮޖެކްޓަކީ އެމްޑީޕީގެ ރިޔާސީ ވައުދެއް ނޫން ނަމަވެސް ވެރިކަމުގެ ތެރޭގައި އެމްޑީޕީ އިން ކެނދިކުޅުދޫ އަށް ދިން ސަމާލުކަމުގެ ސަބަބުން އެ ޕްރޮޖެކްޓް އެރަށަށް ލިބިގެންދިޔަ ކަމަށެވެ. އޭނާ ވިދާޅުވީ ސިއްހީ ދާއިރާއިން އުފުލަމުން ދިޔަ ތަކުލީފުތަކަށް ހައްލެއް ލިބިގެންދާނެ ކަމަށް އުއްމީދު ކުރި ކަމަށާއި ނަމަވެސް މަަސައްކަތް އަދިވެސް ނުނިމޭ ކަމަށެވެ.
