މުވައްޒަފުންނަށް ބިރު ދައްކައި ވޯޓު ކަށަވަރު ކުރުމަށް އެހެން ރަށްރަށަށް އެމީހުން ރީ ރަޖިސްޓަރީ ކުރުވުން ސަރުކާރުން ހުއްޓާލަން ޖެހޭ: ފައްޔާޒު
ކައުންސިލް އިންތިޚާބާ ދިމާކޮށް ސަރުކާރު ކުންފުނިތަކުގެ މުވައްޒަފުންނަށް ބިރުދައްކައި، ނުފޫޒު ފޯރުވަމުންދާ ކަމަށް ބުނެ އިދިކޮޅު އެމްޑީޕީގެ ކުރީގެ ޗެއާޕަރސަން ފައްޔާޒް އިސްމާއިލް ކަންބޮޑުވުން ފާޅުކޮށްފި. ސިޔާސީ ފިކުރު ތަފާތުވުމުގެ ސަބަބުން ވަޒީފާގެ ކުރިއެރުން ހުއްޓުވުމާއި، މަގާމުން ވަކިކުރުން ފަދަ އަމަލުތައް އިތުރުވަމުންދާކަން ފާހަގަކޮށް، މިއީ ވޯޓަށް ނުފޫޒު ފޯރުވުމަށް ހިންގާ ނާތަހުޒީބު އަމަލުތަކެއް ކަމަށް އެމްޑީޕީ އިން ތުހުމަތުކުރޭ. އެހެންކަމުން، މުވައްޒަފުންގެ ހައްގުތަކަށް އަރައިގަތުން ހުއްޓާލުމަށް ފައްޔާޒް ވަނީ ސަރުކާރަށް ގޮވާލާފަ.
ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕަރސަން ފައްޔާޒު އިސްމާއިލް | އިބްރާހިމް ޝާބިލް
ކައުންސިލް އިންތިޚާބާ ދިމާކޮށް ސަރުކާރު ކުންފުނިތަކުގެ މުވައްޒަފުންނަށް ބިރުދައްކައި ޖެއްސުން ކޮށް އެމީހުންގެ ވޯޓު ކަށަވަރު ކުރުމަށް އެމީހުން ތިބި ރަށް ނޫން އެހެން ރަށްރަށަށް އެމީހުން ރީ ރަޖިސްޓަރީ ކުރުވުމުގެ މަސައްކަތް ސަރުކާރު ހިންގާ ޕީއެންސީ އިން ކުރަމުންދާ ކަމަށާ އެކަން ހުއްޓާލަން ޖެހޭ ކަމަށް ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕަރސަން ފައްޔާޒު އިސްމާއިލް ވިދާޅުވެއްޖެ އެވެ.
އެކްސް ގައި ކުރެއްވި ޕޯސްޓެއްގައި ފައްޔާޒް ވިދާޅުވީ ކައުންސިލް އިންތިޚާބާ ދިމާކޮށް ޕީއެންސީ އަށް ނިސްބަތްވާ ފަރާތްތަކުން ސަރުކާރު ކުންފުނިތަކުގެ މުވައްޒަފުންނަށް ބިރުދައްކައި ޖެއްސުން ކުރަމުންދާ ކަމަށެވެ. އަދި އެމީހުންގެ ވޯޓު ކަށަވަރު ކުރުމަށް އެމީހުން ތިބި ރަށް ނޫން އެހެން ރަށްރަށަށް އެމީހުން ރީ ރަޖިސްޓަރީ ކުރުވުމުގެ މަސައްކަތް ވެސް ރައީސް ޑރ. މުހައްމަދު މުއިއްޒު ފައްޓަވާފައިވާ ކަމަށެވެ.
މިއީ މި އިންތިޚާބު ރައީސް މުއިއްޒަށް ގެއްލިދާނެ ކަމުގެ ސިހުން އޮތް މިންވަރު ކަމަށާ މުވައްޒަފުންގެ ވޯޓު ލުމުގެ ހައްގު ގެއްލުވާލަން ސަރުކާރުން ހިންގަމުންދާ ނާތަހުޒީބު އަމަލު ހުއްޓާލުމަށް ގޮވާލާ ކަމަށް ވެސް ފައްޔާޒު ވިދާޅުވި އެވެ.
މިފަހުން ވެސް ފައްޔާޒް ވަނީ މިފަދަ މައްސަލަތަކަކާ ގުޅިގެން ކަންބޮޑުވުން ފާޅުކުރައްވާފަ އެވެ. އެގޮތުން ސިޔާސީ ފިކުރު ދިމާ ނުވާ މީހުން ވަޒީފާ އިން ވަކި ކުރުމާއި ވަޒީފާތައް ސިޔާސީ މަންފާ އަށް ބެހުމުގެ މައްސަލަ މި ފަހަކަށް އައިސް އިތުރުވެފައިވާ ކަމަށާ ގއ.ކޮލަމާފުށި އިންޖީނުގެއާއި ފެނަކަ އޮފީސް ހިންގުމާއި ހަވާލުވެ ހުރި އަބްދުﷲ ނާސިރު މަޤާމުން ވަކިކުރީ ވަޒީފާގެ މަގާމު ދަށްކުރުމުން ވެސް މިނިވަން ސިޔާސީ ފިކުރު ފާޅުކުރުން ހުއްޓާނުލުމުން ކަމަށް ފައްޔާޒް ވިދާޅުވި އެވެ.
މި ނޫނަސް، ސަރުކާރު ހިންގާ ޕީއެންސީގެ ކެންޑިޑޭޓުންނަށް ވޯޓު ނުދޭނެ ކަމަށް ބުނުމުން ނުވަތަ އެމްޑީޕީގެ ކެނޑިޑޭޓަށް ތާއީދުކުރުމުން ވަޒީފާ އިން ވަކިކުރުމާއި މަގާމު ދަށް ކުރުން އަދި ވަޒީފާ އަދާކުރާ ތަން ބަދަލުކުރުމުގެ މައްސަލަތައް ދަނީ ފެންމަތި ވަމުންނެވެ. އާއްމުން ދަނީ މިފަދަ ފިއްތުންތަކަކީ ސިޔާސީ ގޮތުން ނާޖާއިޒް ނުފޫޒު ފޯރުވަން ކުރާ ކަންކަން ކަމަށް ބުނެ އެކަމަށް ފާޑުކިޔަމުންނެވެ.
