ރައީސް މުއިއްޒު މަސައްކަތް ކުރައްވަނީ ރިޝްވަތާއި ފަސާދަ ފަތުރައިގެން ވެރިކަމުގައި ހުރެވޭނެ ގޮތަކަށް މުޅި ނިޒާމު ބައްޓަން ކުރުމަށް، ހާލަތު ބަދަލު ކުރަނީ ރައްޔިތުން: މެންބަރު މައުރޫފް
ސަރުކާރުން ތަރައްގީގެ މަޝްރޫއުތައް ހުއްޓާލައި، ރައްޔިތުންގެ އަމިއްލަ މުހުތާދުތައް ފުއްދައިދިނުމަށް ފައިސާ ބަހަމުންދަނީ ސިޔާސީ ތާއީދު ހޯދުމުގެ މަގުސަދުގައި ކަމަށް މެންބަރު މައުރޫފް ތުހުމަތު ކުރެއްވި. މީގެ އިތުރުން، ބޭރުގެ ކުންފުނިތަކަށް މަޝްރޫއުތައް ހަވާލުކޮށްގެން ކަރަޕްޝަނާއި މަނީ ލޯންޑަރިންގެ އަމަލުތައް ހިންގަމުންދާ ކަމަށް މެންބަރު މައުރޫފް ވިދާޅުވި. އަދި މިވާނުވާ ރައްޔިތުންނަށް އެނގެން ޖެހޭ ކަމަށާއި، މިހާލަތު ބަދަލު ކުރުމަކީ ރައްޔިތުންގެ އަތް މަތީގައި އޮތް ބާރެއް ކަމަށް އޭނާ ވިދާޅުވި.
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވާހަކަ ދައްކަވަނީ | ރާއްޖެއެމްވީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ މުޅި ގައުމުގައި ރިޝްވަތާއި ފަސާދަ ފަތުރައިގެން ވެރިކަމުގައި ހުރެވޭނެ ގޮތަކަށް މުޅި ނިޒާމު ބައްޓަން ކުރުމަށް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު މައުރޫފް ވިދާޅުވީ، ރައީސް މުއިއްޒު ރައްޔިތުންނާއެކު ބާއްވަވާ ބައްދަލު ކުރެއްވުންތަކުގައި ގިނަ ރައްޔިތުން އެމީހުންގެ އަމިއްލަ މައްސަލަތަކުގެ ޝަކުވާ ހުށަހަޅާ ކަމަށާއި، މަސައްކަތް ކުރަނީ އެ މައްސަލަތަކަށް ނުވަތަ ހުރި ކަންބޮޑުވުމަކަށް ހައްލު ހޯދުމަށް ކަމަށެވެ. މުޅި މުޖުތަމައުއަށް ދިމާވެފައިވާ ނުވަތަ އެރަށެއްގެ އާއްމު ރައްޔިތުންނަށް ދިމާވެފައިވާ ބޮޑު މައްސަލައެއްގެ ވާހަކަ ދައްކާ ހައްލު ހޯދުމަށް ނުވަތަ ތަރައްގީގެ މަޝްރޫއުތައް ކުރިއަށް ނުދާތީ އެކަމުގެ ކަންބޮޑުވުމާއި ޝަކުވާ ހުށަހަޅާ ރައްޔިތުން މަދު ކަމަށް އޭނާ ވިދާޅުވި އެވެ.
އެހެންކަމުން މިހާރު މިސަރުކާރުން މަސައްކަތް ކުރަނީ އެމީހަކު އެ ބޭނުންވާ ކަމެއް ކުރުމަށް ފައިސާދީގެން އެކަމަކަށް ހައްލު ހޯދައިދިނުމަށް ކަމަށާއި، އެމީހަކަށް ޖެހިފައިވާ އެ މުހުތާދު ފައިސާ ބޭނުން ކޮށްގެން ފިލުވާ ދިނުމުން ވޯޓު ލިބޭކަން ރައީސް މުއިއްޒަށް ވެސް އެނގިވަޑައިގަންނަވާ ކަމަށް އޭނާ ވިދާޅުވި އެވެ.
ރައީސް މުއިއްޒަށް މިހާރު އެ ވިސްނިވަޑައިގެންނެވީ ޕަރސަނަލީ ސީދާ މީހުންނާ ޑީލް ކޮށްގެން އޭނާއަށް ޖެހިފައި ހުރި އެ މުހުތާދު ފައިސާ ބޭނުން ކޮށްގެން ފިލުވާ ދިނީމާ އޭނާ ގެ ވޯޓު އޭނާ ގެ ތާއީދު ލިބޭނޭ. އެހެންވީމަ އަމުދުން ފިއްޓެ އެ ބުނާހެން ކޮންމެ ރަށެއްގައި މިކަހަލަ ކޮމެޓީއެއް އުފައްދާ ސީދާ ޕަރސަނަލީ އެމީހުންނަށް ޖެހިފައި ހުރި މިކަހަލަ ކަންކަމަށް ހައްލު ކޮށްލާ ދިނުން. ވަގުތީ ގޮތުން ލާރި ކޮޅެއް ދީގެން. އަޅުގަނޑުމެން އަޑު އެހިން އެކަހަލަ ބައެއް ކޭސްތަކުގައި ސީދާ ރައީސުލްޖުމްހޫރިއްޔާ އެތައް ހާސް ޑޮލަރެއް ބައެއް ބޭބޭފުޅުންނަށް ދީގެން ބޭރަށް ދަތުރު ކުރޭ. އެންސްޕާ އާސަންދަ އޮއްވާ. އައިތަން ނުވެސް އެނގޭ. އެހެންވީމަ އެކަހަލަ ނިޒާމެއްގައި ސީދާ ރައްޔިތުންނާ ޑީލް ކުރަން ވެގެން އެކަހަލަ ކަންކަން ފޫބައްދަން ކުރާ ކަމެއް ފައިސާ ދީގެން.ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު
ރިޝްވަތުގެ ފައިސާއާއި ފަސާދަ ފަތުރައިގެން ވެރިކަމުގައި ހުރެވޭނެ ގޮތަކަށް މުޅި ނިޒާމު ބައްޓަން ކުރަމުންދާކަން ފާހަގަކުރައްވައި މެންބަރު މައުރޫފް ވިދާޅުވީ ކުންފުނިތައް އުފައްދަނީ އެ މަގުސަދުގައި ކަމަށެވެ. މިހާރު ވެސް ގިނަ ކުންފުނިތައް އުފައްދާ މަޝްރޫއުތައް ހަވާލު ކުރަމުންދަނީ ބޭރުގެ ކުންފުނިތަކާ ކަމަށާއި، އެއީ ކަޓް ނެގޭ ގޮތަށް ޑީލް ހެދުމުގެ މަގުސަދުގައި ކަމަށް އޭނާ ވިދާޅުވި އެވެ. އަދި ވިދާޅުވީ މަނީލޯންޑަރ ކުރުމަށް ބޭރުގެ ކުންފުނިތަކަށް ސީދާ ޑޮލަރުން ޓީޓީ ހަދައިގެން ރާއްޖެއިން ބޭރުން ފައިސާ ނަގާ ކަމަށެވެ.
މެންބަރު މައުރޫފް ވިދާޅުވީ ފައިސާތައް ހިފައްޓައި، ތަރައްގީގެ މަޝްރޫއުތައް ކުރިއަށް ނުގެންދިޔަ ނަމަވެސް އިންތިޚާބުތަކާ ދިމާކޮށް ރައްޔިތުންނަށް ފައިސާ ބަހަމުންދަނީ ވެރިކަމުގައި ހުންނެވުމަށް ކަމަށެވެ. އަދި މިވާނުވާ ރައްޔިތުންނަށް އެނގެން ޖެހޭ ކަމަށާއި، މިހާލަތު ބަދަލު ކުރުމަކީ ރައްޔިތުންގެ އަތް މަތީގައި އޮތް ބާރެއް ކަމަށް އޭނާ ވިދާޅުވި އެވެ.
