ސީޕީއައި ގައި ދިވެހިރާއްޖެ އަށް ލިބުނު ނަތީޖާ އިން ދައްކަނީ ބާރުތައް މަރުކަޒީވެ، ނޫސްވެރިކަމުގެ މިނިވަންކަން ހަނިވެ، ނިޒާމީ ގޮތުން ކޮރަޕްޝަނަށް މަގުފަހިވެފައިވާ މިންވަރު: ޓްރާންސްޕޭރެންސީ މޯލްޑިވްސް
2025 ވަނަ އަހަރުގެ ކޮރަޕްޝަން ޕާސެޕްޝަންސް އިންޑެކްސްގައި 39 ޕޮއިންޓާއެކު ރާއްޖެ އޮތީ 182 ގައުމުގެ ތެރެއިން 91 ވަނައިގަ. ވޭތުވެދިޔަ ފަސް އަހަރު ރާއްޖޭގެ ނަތީޖާ އެއް މިންވަރެއްގައި ހިފެހެއްޓިފައި ހުރުމަކީ ނިޒާމީ ކޮރަޕްޝަން ހުއްޓުވުމުގައި ކުރިއެރުން ލިބޭ މިންވަރު މަދުކަން ހާމަވާ ކަމެއް ކަމަށް ޓްރާންސްޕޭރެންސީ މޯލްޑިވްސް އިން ބުނޭ.
2025 ވަނަ އަހަރުގެ ސީ.ޕީ.އައިގައި ރާއްޖެ ހިމެނެނީ 182 ގައުމުގެ ތެރެއިން 91 ވަނައިގައި. | ރާއްޖެއެމްވީ
ކަރަޕްޝަން ޕަރސެޕްޝަން އިންޑެކްސް (ސީޕީއައި) 2025 ގައި ދިވެހިރާއްޖެ އަށް ލިބުނު ނަތީޖާ އިން ދައްކަނީ ބާރުތައް މަރުކަޒީވެ، ނޫސްވެރިކަމުގެ މިނިވަންކަން ހަނިވެ، ނިޒާމީ ގޮތުން ކޮރަޕްޝަނަށް މަގުފަހިވެފައިވާ މިންވަރު ކަމަށް ޓްރާންސްޕޭރެންސީ މޯލްޑިވްސް އިން ބުނެފި އެވެ.
ޓްރާންސްޕޭރެންސީ އިންޓަރނޭޝަނަލް އިން އާންމުކުރި 2025 ވަނަ އަހަރުގެ ކޮރަޕްޝަން ޕާސެޕްޝަންސް އިންޑެކްސް (ސީޕީއައި) ގައި ދިވެހިރާއްޖެ އަށް ލިބިފައިވަނީ 39 ޕޮއިންޓުގެ ނަތީޖާ އެކެވެ. ވޭތުވެދިޔަ 5 އަހަރަށް ބަލާއިރު، ރާއްޖޭގެ ސީޕީއައި ނަތީޖާ ހުރީ އެއް މިންވަރެއްގައި ހިފެހެއްޓިފައި ކަމަށާއި، މިއިން ދޭހަވަނީ ނިޒާމީ ކޮރަޕްޝަން ހުއްޓުވުމުގައި ލިބިފައިވާ ކުރިއެރުން މަދުކަން ކަމަށް ޓްރާންސްޕޭރެންސީ މޯލްޑިވްސް އިން ބުނެ އެވެ. ޓްރާސްންސްޕޭރެންސީ މޯލްޑިވްސް އިން ބުނީ މިއިން ދޭހަވަނީ ނިޒާމީ ކޮރަޕްޝަން ހުއްޓުވުމުގައި ލިބިފައިވާ ކުރިއެރުން މަދުކަމެވެ.
ސީޕީއައި އަކީ ދުނިޔޭގެ 182 ގައުމަކާއި ސަރަހައްދެއްގެ ދައުލަތުގެ އިދާރާތަކުގައި ކޮރަޕްޝަން އަށަގަނެފައިވާ މިންވަރު ބަލައި، ސާވޭތަކާއި މާހިރުންގެ ވަޒަންކުރުންތަކުގެ މައްޗަށް ބިނާކޮށް ކޮންމެ އަހަރު އެކުލަވާލާ އިންޑެކްސް ކަމަށް ޓްރާންސްޕޭރެންސީ އިން ބުނެ އެވެ. އަދި މި އިންޑެކްސްގައި ނަތީޖާ ދެނީ 0 އާއި 100 އާ ދެމެދުގައި ކަމަށާއި، 0 އަކީ ކޮރަޕްޝަން އެންމެ ބޮޑު ގައުމުތަކަށް ދެވޭ ނަތީޖާ ކަމަށް ބުނެ އެވެ. އަދި 100 އަކީ ކޮރަޕްޝަން އެންމެ ކުޑަ ގައުމުތަކަށް ދެވޭ ނަތީޖާ ކަމަށާއި، 39 ގެ ނަތީޖާއެކު 2025 ވަނަ އަހަރުގެ ސީޕީއައިގައި ރާއްޖެ ހިމެނެނީ 182 ގައުމުގެ ތެރެއިން 91 ވަނައިގައި ކަމަށް ޓްރާންސްޕޭރެންސީ އިން ބުނެ އެވެ.
ޓްރާސްންސްޕޭރެންސީ މޯލްޑިވްސް އިން ބުނީ 2025 ވަނަ އަހަރު ރާއްޖެ އަށް ލިބުނު ނަތީޖާ ބިނާވެފައިވަނީ ބައިނަލްއަގުވާމީ ތިން މަސްދަރަކުން ލިބުނު މައުލޫމާތުގެ މައްޗަށް ކަމަށެވެ. މި މަސްދަރުތަކަކީ ގްލޯބަލް އިންސައިޓް ކަންޓްރީ ރިސްކް ރޭޓިންގްސް، ވެރައިޓީޒް އޮފް ޑިމޮކްރަސީ ޕްރޮޖެކްޓް އަދި ވޯލްޑް ބޭންކް ކަންޓްރީ ޕޮލިސޫ އެންޑް އިންސްޓިޓިއުޝަނަލް އެސެސްމަންޓް އެވެ.
ޓްރާންސްޕޭރެންސީ އިން ބުނީ މި ނަތީޖާ އިން ދައްކައިދެނީ މިނިވަން މުއައްސަސާތަކުގެ މިނިވަންކަން ގެއްލި، ދައުލަތުގެ ކުންފުނިތަކާއި މަޝްރޫޢުތައް ހިންގުމުގައި ހާމަކަން ކުޑަވުމުން ރައްޔިތުންގެ އިތުބާރު ގެއްލިގެންދާ ކަންކަމެވެ.
މުއައްސަސާތަކުގެ ނަޒާހަތްތެރިކަން އަލުން ގާއިމުކޮށް، ކޮރަޕްޝަނާ ދެކޮޅަށް ހަރުދަނާ ފިޔަވަޅުތަކެއް އެޅުމަށް އެ ޖަމްއިއްޔާއިން ވަނީ ގޮވާލާފަ އެވެ.
