ކޮންމެ ނަމެއްގަ ފެންނަ ނުފެންނަ ވޯޓެއް ނެގިޔަސް، އޭގެ އަޑީގަ ވަނީ މަކަރާ ހީލަތާ އޮޅުވާލުމާ ދޮގު: އަބްދުﷲ ޝާހިދު

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގާނޫނުތަކަށް ބަދަލު ގެނެސްގެން، ކޮންމެ ނަމެއްގައި ފެންނަ ނުފެންނަ ވޯޓެއް ނެގި ކަމުގައި ވިޔަސް، އެކަމުގެ އަޑީގައި އޮތީ މަކަރާއި ހީލަތާއި އޮޅުވާލުމާއި ދޮގު ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ޝާހިދު މިހެން ވިދާޅުވީ އެމްޑީޕީގެ ފަރާތުން ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގެ ކެމްޕެއިން ލޯންޗުކުރުމަށް ބޭއްވި ޖަލްސާގައި ވާހަކަ ދައްކަވަމުންނެވެ.

ޝާހިދު ވިދާޅުވީ މި ސަރުކާރުގެ މިސްރާބު މިހާރު ހުރީ ހުދުމުހުތާރު ވެރިކަމަކާ ދިމާލަށް ކަމަށެވެ. ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއްކޮށްލުމަށް ސަރުކާރު ހިންގާ ޕީއެންސީގެ މެޖޯރިޓީ އޮންނަ މަޖިލީހުން ފާސްކޮށްފައިވާ ކުރުމަށް އިޝާރާތް ކުރައްވައި ޝާހިދު ވިދާޅުވީ، މިއީ ރައްޔިތުންގެ ކުރިމަތީގައި އޮތް ވަރަށް "ނުރައްކާތެރި" ސުވާލެއް ކަމަށެވެ. އަދި ދެ އިންތިޚާބު އެއްކޮށްލަން އުޅެނީ ވަކަރަށް ޖަހާ އުސޫލުން، ފުރަތަމަ މަޖިލީހުގެ ދައުރު ކުރުކޮށްލުމަށް ފަހު ރައްޔިތުންގެ ބަސް ބުނުމުގެ ހައްގު ނިގުޅައިގަތުމަށް ކަމަށް އޭނާ ތުހުމަތު ކުރެއްވި އެވެ.

މަޖިލިސް ދައުރު ކުރުކޮށްލަން ފެންނަ ނުފެންނަ ވޯޓެއް ނަގާ އުސޫލުން، ރިޔާސީ ދައުރު ދަންމާލުމަށް ވެސް މި ސަރުކާރުން ވޯޓެއް ނަގާނެ ކަމަށް ޝާހިދު ވިދާޅުވި އެވެ. އެގޮތުން އަންނަ އަހަރުގެ ތެރޭގައި ރިޔާސީ ދައުރު 10 އަހަރަށް ދަންމާލުމަށް ވޯޓެއް ނަގައި، އެ ވޯޓު ކާމިޔާބުކޮށްފި ނަމަ، ދެން މި ރާއްޖޭގައި ދުވަހަކު ވެސް ރިޔާސީ އިންތިޚާބެއް ނުބާއްވާނެ ކަމަށް ޝާހިދު ވިދާޅުވި އެވެ. މިއީ ރާއްޖޭގެ ޑިމޮކްރަސީއަށް އޮތް ބޮޑު ނުރައްކަލެއްގެ ގޮތުގައި އޭނާ ސިފަކުރެއްވި އެވެ.

ދިވެހި ރައްޔިތުންގެ ކުރިމަތީގައި މިހާރު އޮތީ މަގެއް އިޚްތިޔާރު ކުރުން ކަމަށާއި، އަންނަ އޭޕްރީލް މަހުގެ 4 ވަނަ ދުވަހު ރައްޔިތުންނާ ކުރިމަތިވާ ސުވާލަކީ ތަރައްގީގެ މަގު އިޚްތިޔާރު ކުރާނީތޯ، ނުވަތަ ހަލާކާއި ފަނާކުރަނިވި މަގު އިޚްތިޔާރު ކުރާނީތޯ ކަމަށް ޝާހިދު ވިދާޅުވި އެވެ. އަދި އެއީ ބާރުތައް ދޫކޮށްލުމުގެ ލާމަރުކަޒީ މަގުތޯ، ނުވަތަ ބާރުތައް އެކެއްގެ މުށުތެރެއަށް ޖަމާކުރާ ހުދުމުހުތާރު މަގުތޯ ނިންމަން ޖެހޭ ދުވަސް ކަމަށް ވެސް އޭނާ ވިދާޅުވި އެވެ.

ޝާހިދު އިތުރަށް ވިދާޅުވީ އެމްޑީޕީން ނުކުމެ މިތިބީ ތަރައްގީ އާއި، މިނިވަންކަމާއި، ލާމަރުކަޒީ ނިޒާމާއި، ހެޔޮ ވެރިކަމުގެ މަގު އިޚްތިޔާރު ކުރުމަށް ކަމަށެވެ. ލާމަރުކަޒީ ނިޒާމެއްގެ ފެށުމަކީ އެއްކޮށްފައިވާ ބާރުތައް ދޫކޮށްލުމަށް ގަބޫލުކުރެވޭ ހިސާބުން ކަމަށް ފާހަގަކުރައްވައި، ޝާހިދު ވިދާޅުވީ އެމްޑީޕީން އަބަދުވެސް މަސައްކަތް ކުރާނީ ރައްޔިތުންނާ އަތުގުޅާލައިގެން އެ މަގަށް ދިއުމަށް ކަމަށެވެ. މި ސަރުކާރުން ބާރުތައް މަރުކަޒުކޮށް، ރައްޔިތުންގެ ބާރު ކަނޑުވާލަން ކުރާ މަސައްކަތްތަކާ ދެކޮޅަށް ރައްޔިތުން ތެދުވުމަށް އޭނާ ގޮވާލެއްވި އެވެ. އަދި މިކަން ކުރެވޭނީ ކުރިޔަށް އޮތް ލޯކަލް ކައުންސިލް އިންތިހާބު ގައި އެމްޑީޕީ އަށް މެޖޯރިޓީ ދީގެން ކަމަށް ޝާހިދު ވިދާޅުވި އެވެ.