ޖަރުމަނުވިލާތުން ރައީސް މުއިއްޒު އަށް ރަސްމީކޮށް މަރުޙަބާ ދަންނަވައިފި
ޖަރުމަނުގެ ރިޔާސީ ގަނޑުވަރުގައި ބޭއްވި މި ރަސްމިއްޔާތުގައި ރައީސް މުއިއްޒު ވަނީ ޝަރަފުގެ ގާޑް އިންސްޕެކްޓް ކޮށްދެއްވައި، މެހުމާނުން ސޮއިކުރައްވާ ފޮތުގައި ސޮއިކުރައްވާފައި. މި ދަތުރުފުޅަކީ ރާއްޖެއާއި ޖަރުމަނާ ދެމެދު ޚާރިޖީ ގުޅުން ގާއިމުކުރިތާ 60 އަހަރު ފުރުމާ ދިމާކޮށް ކުރައްވާ ދަތުރުފުޅެއް.
ޖަރުމަނުވިލާތުން ރައީސް މުއިއްޒު އަށް ރަސްމީކޮށް މަރުޙަބާ ދެންނެވުން. | ރައީސް އޮފީސް
ޖަރުމަނުވިލާތުގެ ރައީސް ފްރޭންކް-ވޯލްޓަރ ޝްޓައިންމަޔަރގެ ދަޢުވަތަކަށް ރައީސް ޑރ. މުޙައްމަދު މުޢިއްޒު، މިހާރު އެގައުމަށް ކުރައްވާ ދަތުރުފުޅުގައި، ރައީސް މުއިއްޒު އަށާއި ވަފުދަށް ރަސްމީގޮތުން މަރުޙަބާ ދަންނަވައިފިއެވެ. މިރަސްމިއްޔާތު އޮތީ އަންގާރަ ދުވަހު ޖަރުމަނުގެ ރިޔާސީ ގަނޑުވަރު، ޝްލޮސް ބެލްވޫގަ އެވެ.
މި ރަސްމިއްޔާތުގައި ރައީސް މުޢިއްޒު އާއި ރައީސް ޝްޓައިންމަޔަރ ވަނީ އެ ދެބޭފުޅުންގެ ޝަރަފުގައި އޮތް ޝަރަފްގެ ގާޑް، އިންސްޕެކްޓް ކޮށްދެއްވާފަ އެވެ. އެއަށްފަހު ދެ ޤައުމުގެ ވަފުދުގެ ބޭފުޅުން ތަޢާރަފުކޮށްދެއްވައި، މެހުމާނުން ސޮއިކުރައްވާ ފޮތުގައި މުއިއްޒު ސޮއިކުރެއްވިއެވެ. މީގެ އިތުރުން މިރަސްމިއްޔާތުގައި ދެ ރައީސުން އެކުގައި ހަނދާނީ ފޮޓޯފުޅެއް ނެންގެވި ކަމަށް ރައީސް އޮފީހުން ހާމަ ކޮށްފައިވެ އެވެ.
ރައީސް މުޢިއްޒު ޖަރުމަނުވިލާތަށް މިހާރު ކުރައްވަމުން ގެންދަވާ ދަތުރުފުޅު ދިމާވަނީ ދިވެހިރާއްޖެ އާއި ޖަރުމަނުވިލާތާ ދެމެދު ޚާރިޖީ ގުޅުން ގާއިމުކުރިތާ 60 އަހަރު ފުރޭ މުނާސަބު ވަގުތާ އެވެ.
