ދަނޑުވެރިން ހައްދާ ތަކެތި ގަނެފަ ބެހެއްޓޭ ގޮތަށް މަނަދޫގައި އެގްރޯނެޓް އިން އިމާރާތް ކުރި ތަނުގެ ބޭނުން ނުހިފާ ހުރެ ވީރާނާވަނީ
ނ. މަނަދޫގައި އެގްރޯނެޓުން އިމާރާތްކުރި ކޯލްޑް ސްޓޯރޭޖާއި އޮފީސް ބޭނުންނުކޮށް ދޫކޮށްލާފައި ހުރުމުގެ ސަބަބުން އެތަން ވީރާނާވަމުންދާ ކަމުގެ ކަންބޮޑުވުން އެ ރަށު ކައުންސިލުން ފާޅުކުރޭ. އަދި ކައުންސިލަށް ލިބެންޖެހޭ ބިމު ކުލި ނުލިބޭތީ އެތަން ކައުންސިލާ ހަވާލުކުރުމަށް އެދިފައިވީ ނަމަވެސް، އެގްރޯނެޓުން މިހާތަނަށް އެއްވެސް ޖަވާބެއް ދީފައެއް ނުވޭ.
ނ. މަނަދޫގައި ރައީސް ސޯލިހުގެ ސަރުކާރުގައި އެގްރޯނެޓުން ދަނޑުވެރިން އަތުން ތަކެތި ގަނެ ރައްކާކުރެވޭ ގޮތަށް ހެދި އިމާރާތް | ރާއްޖެ އެމްވީ
ރައީސް އިބްރާހިމް މުހައްމަދު ސޯލިހުގެ ސަރުކާރުގައި، ދަނޑުވެރިން ހައްދާ ތަކެތި ގަނެފަ ބެހެއްޓޭ ގޮތަށް ނ. މަނަދޫގައި އެގްރޯނެޓް އިން އިމާރާތް ކުރި ތަނުގެ ބޭނުން ނުހިފާ ހުރެ ވީރާނާވަމުންދާ ކަމަށް އެ ރަށު ކައުންސިލް މެންބަރު މުއުމިނާ ސޯލިހު ވިދާޅުވެއްޖެ އެވެ.
ރާއްޖެޓީވީ އަށް މައުލޫމާތު ދެއްވަމުން މުއުމިނާ ސޯލިހު ވިދާޅުވީ އެ އިމާރތަކީ އެގްރޯނެޓްގެ ފަރާތުން އިމާރާތެ އެޅުމަށް އެދުމުން ކައުންސިލުން ކުލީގެ އުސޫލުން ބިމެއް ދީފައިވާ ބިމުގައި އިމާރާތްކޮށްފައިވާ ތަނެއް ކަމަށެވެ. އަދި އެ ބިމަކީ ކައުންސިލަށް ބިމު ކުލި ލިބެމުން ދިޔަ ތަނެއް ކަމަށާއި، އިމާރާތުގެ މަސައްކަތް ވެސް ހުރީ ނިމިފައި ކަމަށެވެ. މުއުމިނާ ވިދާޅުވީ އިމާރާތުގައި ކޯލްޑް ސްޓޯރޭޖް ގާއިމް ކުރެވި މެޝިނަރީތައް ބަހައްޓާ އޮފީސް އިމާރާތެއް ވެސް ހިމެނޭ ކަމަށެވެ.
މި ދެންނެވި ހުރިހާ ކަމެއް ވެސް ހުރީ ނިމިފައި. ކޯލްޑް ސްޓޯރޭޖް ވެސް ގާއިމް ކުރެވިފައި. ވެރިކަން ބަދަލުވި ފަހުން އަޅުގަނޑުމެންނަށް ވެސް ވާނުވާ ނޭނގޭ. އެހާ ހިސާބުން ކައުންސިލަށް ކުއްޔެއް ނުލިބޭ. ކައުންސިލުން ކަންބޮޑުވުން ވެސް ހުށަހެޅިން. އަނެއް ކޮޅުން ކުލީގެ އިތުރުން އެތަން ސާފުކޮށް ބެލެހެއްޓޭނެ ގޮތެއް ނެތި ދައުލަތުން ބޮޑުއަގެއް ދީފައި ހަރަދުތަކެއް ކޮށްފައި ހުރިތަނެއް ވީމަ، ސާފުކޮށް ބެލެހެއްޓޭނެ ގޮތެއް ނެތި އިމާރާތް ވިރާނާވަމުންދާތީ އެ ކަންބޮޑުވުން ވެސް ހުންނާނެ އެގްރޯނެޓާއި ހިއްސާކޮށްފައި.މަނަދޫ ކައުންސިލް މެންބަރު މުއުމިނާ ސޯލިހު
މުއުމިނާ ވިދާޅުވީ އެގްރޯނެޓަށް ކަންބޮޑުވުން ހިއްސާކުރި ނަމަވެސް މިހާތަނަށް ވެސް ޖަވާބެއް ނުލިބޭ ކަމަށެވެ. އަދި އެގްރޯނެޓުން އިމާރާތް ބޭނުން ނުކުރާނަމަ ކައުންސިލާއި އިމާރާތް ހަވާލުކޮށްދޭން ވެސް އެދިފައިވާނެ ކަމަށާއި، އެގޮތަށް އެދުނީ އިމާރާތް ކައުންސިލުން ބޭނުންކޮށް ތަން ބަލަހައްޓަން ކަމަށެވެ.
މުއުމިނާ ވިދާޅުވީ އިމާރާތް ބޭނުން ނުކޮށް ކައުންސިލަށް ކުލި ނުލިބޭ މައްސަލައިގައި ކައުންސިލްގެ ޖަލްސާއަކުން އިމާރާތް ނަގަން ވެސް ފާސްކޮށް އެންގުން ވެސް ފޮނުވި ކަމަށެވެ. ނަމަވެސް މިހާތަނަށް އައި އިރު އެއްވެސް ޖަވާބެއް ނުލިބޭ ކަމަށް މުއުމިނާ ވިދާޅުވި އެވެ.
