އީރާނުން މުއްސަނދިކޮށްފައިވާ ޔޫރޭނިއަމްގެ ބާރު ދަށްކުރަން ތައްޔާރު، ދަތިތައް އުވާލަންޖެހޭ
60 އިންސައްތައަށް މުއްސަނދިކޮށްފައިވާ ޔުރޭނިއަމް ޑައިލިއުޓްކޮށް، އޭގެ ކޮންސެންޓްރޭޝަން ދަށްކުރުމުގެ ފުރުސަތު އޮތްކަން ހާމަކުރި ނަމަވެސް، މިއީ ހަމައެކަނި އެމެރިކާގެ ފިޔަވަޅުތަކާ ގުޅޭގޮތުން ދެއްކި ވާހަކައެއްކަން ސާފެއް ނުވޭ.
އީރާނުގެ އެޓޮމިކް އެނާޖީ އޯގަނައިޒޭޝަނުން 4 ނޮވެމްބަރު 2019 ގައި އާންމުކޮށްފައިވާ މި ފޮޓޯއިން ފެންނަނީ، ވެރިރަށް ތެހެރާނުގެ ދެކުނުން ގާތްގަނޑަކަށް 300 ކިލޯމީޓަރު ދުރުގައި ހުންނަ ނަތާންޒް ނިއުކްލިއާ ރިސާޗް ސެންޓަރުގައި ގާއިމުކޮށްފައިވާ ނިއުކްލިއާ މުއްސަނދިކުރާ ފެސިލިޓީ. | އޭއެފްޕީ
އީރާނާ ދެކޮޅަށް އަޅާފައިވާ ހުރިހާ ދަތިކުރުމުގެ ފިޔަވަޅުތަކެއް އުވާލައިފިނަމަ، އެ ގައުމުން މުއްސަނދިކޮށްފައިވާ ޔުރޭނިއަމް ގެ ބާރު ދަށްކުރަން ތައްޔާރަށް އޮތް ކަމަށް އީރާނުގެ އެޓޮމިކް އެނާޖީ އެޖެންސީގެ އިސްވެރިޔާ ހޯމަ ދުވަހު ވިދާޅުވެއްޖެ އެވެ. އީރާނުން މިހެން ބުނެފައިވަނީ އެމެރިކާ އާ އެކު އަލުން މަޝްވަރާތައް ފަށާފައިވާ ދަނޑިވަޅެއްގަ އެވެ.
އީރާނުގެ ރަސްމީ ނިއުސް އެޖެންސީ "އިރްނާ" އިން ރިޕޯޓްކޮށްފައިވާ ގޮތުގައި، 60 އިންސައްތަ އަށް މުއްސަނދިކޮށްފައިވާ ޔުރޭނިއަމްގެ މިންވަރުގެ ބާރު ދަށްކުރުމުގެ ފުރުސަތާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން، އެޓޮމިކް އެނާޖީ އޯގަނައިޒޭޝަންގެ ވެރިޔާ މުޙައްމަދު އިސްލާމީ ވިދާޅުވީ، އެކަން ބިނާވެފައިވަނީ އޭގެ ބަދަލުގައި އީރާނާ ދެކޮޅަށް އަޅާފައިވާ ހުރިހާ ދަތިކުރުމުގެ ފިޔަވަޅުތަކެއް އުވާލުމުގެ މައްޗަށެވެ. ނަމަވެސް، މިއީ ހަމައެކަނި އެމެރިކާ އިން އަޅާފައިވާ ފިޔަވަޅުތައް ކަމެއް ނުވަތަ އީރާނާ ދެކޮޅަށް ބައިނަލްއަގުވާމީ ގޮތުން އަޅާފައިވާ ހުރިހާ ފިޔަވަޅުތަކެއް ކަމެއް އޭނާ ސާފުކޮށްދެއްވާފައެއް ނުވެ އެވެ.
ޔުރޭނިއަމްގެ ބާރު ދަށްކުރުމަކީ (ޑައިލިއުޓް ކުރުމަކީ) މުއްސަނދިކޮށްފައިވާ ޔުރޭނިއަމްގެ ތެރެއަށް ވަކި މާއްދާތަކެއް އެއްކޮށްގެން އޭގެ ކޮންސެންޓްރޭޝަން ނުވަތަ މުއްސަނދިކަމުގެ މިންވަރު ދަށްކުރުމެވެ. މިގޮތަށް ހެދުމުން ޔުރޭނިއަމްގެ މުއްސަނދިކަން ކަނޑައެޅިފައިވާ ވަކި މިންގަނޑަކަށްވުރެ މަތިވިޔަނުދީ ހިފެހެއްޓެ އެވެ.
