ސަރުކާރުގެ ހެޔޮކަން ދައްކަން ޖެހެނީ މަސް ދަޅު ކޭސް ބަހައިގެނެއް ނޫން!

ކުރިއަށް އޮތް ރަމަޟާން މަހާ ދިމާކޮށް ސަރުކާރުން މަސް ދަޅު ކޭސް ބަހަން ފަށައިފި އެވެ. މާލޭ އާއި ހުޅުމާލޭގެ އިތުރުން، އަތޮޅު ތެރޭގެ ސިޓީތަކާއި އެކި ރަށް ތަކުގައި ފޯރިޔަކާ އެކު މަސް ދަޅު ކޭސް ބަހަމުން ދަނީ އެވެ. ސަރުކާރުގެ ވަޒީރުންނާއި، އެކްޓިވިސްޓުންގެ ބަހުން ނަމަ، އިންތިހާ އަށް ޖޯޝާއި، ފޯރީގައި މަސް ދަޅު ކޭސް ބެހުން ކުރިއަށް ގެންދަނީ އެވެ. ހިންދަމާ ނުލައި، ބަހަނީ މަސް ދަޅު ކޭހެވެ. 

އެއާ އެކު، ސޯޝަލް މީޑިއާ އާއި، އެކި އެކި ވީޑިއޯ ކްލިޕް ތަކުން އަޑު އިވެމުން އަންނަނީ ސަރުކާރުގެ ހެޔޮ ވާހަކަ އެވެ. ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ އޯގާތެރިކަމާއި، ރައްޔިތުންނާ މެދު އެމަނިކުފާނުގެ ހިތުގައި އޮތް އިޙުސާންތެރި ކަމުގެ ވާހަކަ އެވެ. އެއް ބަޔަކު މަސް ދަޅު ކޭހާ އެކު އިންޓަވިޔުދީ ސަރުކާރަށް ސަނާ ކިޔަމުން ދާއިރު، އަނެއް ބަޔަކު ކިޔޫގައި ތިބެގެން ރައީސް މުޢިއްޒު އަށް ހުޝާމަދު ކުރަނީ އެވެ. 

ހިތަށް އެރި އެވެ. މަސް ދަޅު ކޭސް ބެހުން ގޯސް ކުރާކަށް ބޭނުމެއް ނޫނެވެ. އެކަމަކު، ސަރުކާރަކާ ހަވާލުވެ، ޤައުމުގެ ރައީސުލްޖުމްހޫރިއްޔާގެ މަސްއޫލިއްޔަތާ ހަވާލުވެ ހުންނަވަނީ، ކޮންމެ އަހަރެއްގެ ރަމަޟާން މަހު މަސް ދަޅު ކޭސް ބަހަން ވެއްޖިއްޔާ، ކަމަކު ނުދެ އެވެ. ރައްޔިތުންނަށް ބޭނުންވާ އެއްވެސް ކަމެއް ނުކޮށްދީ މުޅި އަހަރު ދުވަސް ބޭކާރަށް ދުއްވާލައި، އަހަރަށް ރައްޔިތުންގެ ޓެކްސް ފައިސާ އިން ފާސް ކުރާ ބަޖެޓު ދުމަށް އަރުވާލުމަށް ފަހު، އެކަން ހިންދާލަން މަސް ދަޅު ކޭސް ބަހާ ނަމަ، ލަދުވެތި ކަމުގެ އިންތިހާ އެވެ.

55 ބިލިއަނަށް ވުރެ ބޮޑު ބަޖެޓެއް ފާސް ކުރުމަށް ފަހު، ރައްޔިތުން ޤައުމު ހަވާލު ކުރީ ޚިދުމަތް ކުރުމަށެވެ. ރައްޔިތުންނަށް ލުއި ފަސޭހަ ކަންކަން ހޯދުމަށެެވެ. އަހަރަމެންގެ ރަށް ތަކުގެ ފެނާއި ނަރުދަމާ ޤާއިމު ކުރުމަށެވެ. ކުރީގެ ސަރުކާރަކުން ފެނާއި ނަރުދަމާގެ މަސައްކަތް ފަށައި، ކަނެކްޓިވިޓީ ހަދާލަން ޖެހޭ ހިސާބުގައި ހުރި އެތައް މަޝްރޫއު ތަކެއް ފުރިހަމަ ކުރުމަށެވެ. ބައުވެ، ގެދަބުޅި ވެފައިވާ އެތައް އިންޖީނު ގެތަކެއް، އެންމެ ޒަމާނީ ފެންވަރަށް ބަދަލުކޮށް، ކަންފަތުގެ ތޫރި އަށް އުނދަގޫވާ ވަރަށް އިވެމުން ދިޔަ އިންޖީނުގެ އަޑު މަޑުކޮށް، އެންމެ ޒަމާނީ ކޭބަލް މަގު ތަކުގައި އަޅައިގެން އައު އިންޖީނުގެ އިމާރާތް ކުރުމަށް އެ ސަރުކާރުން ފެށި މަޝްރޫއު އެއްކޮށް ނިންމުމަށެވެ. 

ޒަމާނީ ފެންވަރަށް މަގުތައް ތަރައްޤީކޮށް، ތާރު އަޅައި، ވިއްސާރަ މޫސުމުގައި ވެސް ހާސް ކަމެއް ނެތި މަގު މަތީގައި ރައްޔިތުންނަށް އުޅެވޭނެ ގޮތެއް ހޯދަން ކުރީ ސަރުކާރުން ފެށި މަޝްރޫއުތައް ނިންމައި ދިނުމަށެވެ. ލަފާ ފުރަން އޮތް ބަނދަރުގެ ޖާގަ ދަތިވެފައިވާތީ، ބަނދަރު ބޮޑު ކުރަން ކުރީ ސަރުކާރުން ފެށި މަޝްރޫއުތައް ނިންމައި، ކާފަމެން އުމުރުގެ ބޭބެމެންނަށް ފަސޭހަ އިން ލަފާ ފުރޭނެ އިންތިޒާމު ހަމަޖައްސައި ދިނުމަށެވެ.

ލަކުޑި ފެރީ ތަކުގައި ދަތުރު ކުރުމުގެ ދުވަސްތައް ނިމުމަކަށް ގެނެސް، އޭސީ ކޮށްފައި ހުރި، ގަދަ ކަނޑުގައި ދަތުރު ކުރާއިރު ވެސް ރީތިކޮށް ލެގިލައިގެން ތިބެވޭނެ، އެޕްލިކޭޝަން އަކުން ޓިކެޓު ނަގައިގެން، ބާކޯޑް ޖަހައިގެން ލޯންޗަކަށް އަރައިގެން ދަތުރު ކުރަން ހަމަޖެއްސި ލޯންޗު ފެރީގެ ނިޒާމު މުޅި ރާއްޖެ އަށް ފުރިހަމަ ކުރުމަށެވެ. 

ނިމުނީއެއް ނޫނެވެ. މަތީ ތައުލީމު ހާސިލު ކުރަން ބޭނުންވާ ދަރިވަރުންނަަށް ލޯނު ހަމަޖެއްސުމާއި، ހިލޭ ޑިގްރީ އަށް ކިޔެވުމުން ފެށިގެން ގޮސް، ހިލޭ ބޭސް ފަރުވާ ހޯދަން ޤާއިމު ކޮށްފައި އޮތް ނިޒާމު ފުރިހަމަ ކުރުމާއި، ރަށް ރަށުން ފަސޭހަ އިން އާދައިގެ ބޭސް ލިބޭނެ އިންތިޒާމު ހަމަޖެއްސުމާއި، ފަސޭހަ އިން އާސަންދަ ހަމަޖެއްސުމުން ފެށިގެން ގޮސް، ރައްޔިތުންގެ އަސާސީ ކަންކަމަށް އިސްކަން ދިނުމަށް ސަރުކާރަށް އޮންނަނީ ޒިންމާ މަތި ކޮށްފަ އެވެ. ފަސް އަހަރު ދުވަހުގެ ސަރުކާރެއްގައި ދަތި ނުވެ ބޭސް ލިބިއްޖެ އެވެ. އާސަންދަ އާއި އެންސްޕާ ވެސް ހަމަޖެހިއްޖެ އެވެ. މިއަދި ރައްޔިތުން ބޭނުން ވަނީ މި ފަސް އަހަރު ވެސް ދަތި ނުވެ އެކަންކަން ފަހިވުމެވެ.

މިއަދު އެކަންކަން ނުވެ އެވެ. ރައްޔިތުންނަށް ފަސޭހައެއް ނުވެ އެވެ. ރައްޔިތުންގެ ކުރިއެރުމާއި، ތަރައްޤީ އާާއި ލާބަޔަށް ފަށާފައި ހުރި މަޝްރޫއުތައް މަޑު ޖެހިއްޖެ އެވެ. މި ސަރުކާރުން، ރައީސް މުޢިއްޒު ވެވަޑައިގެންފައިވާ ވައުދުތައް ހިނގައި ގަންނާނެ ދުވަހެއް އިނގޭނެ މީހަކު މި އުޑު ބަޅު ކުރެއްވި ހިސާބުގައި ވެސް ނެތީ އެވެ. ކޮންމެ އިންތިޚާބަކާ ދިމާކޮށް ބިން ކޮޅެއް ހިއްކާލުމާއި، ފައިލެއްގައި އޮންނަ އޭފޯ ގަނޑެއްގައި ކަޅު ނުވަތަ ނޫ ކުލައިގެން ގަލަމަކުން ސޮއި ކޮށްލުން ފިޔަވައި، މި ދެ އަހަރު ދުވަހުގެ ތެރޭގައި ކުރެވުނު އެއްވެސް ކަމެއް ހަަމަ، ހަތް ޙަރާމުން ޙަރާމީ އެވެ. 

ރާއްޖޭގެ އުތުރާއު ދެކުނުން މިއަދު އިވެނީ ރައްޔިތުންގެ ޝަކުވާގެ އަޑެވެ. ކަންކަން ނުވާ ވާހަކަ އާއި، ރައްޔިތުން އުޅެމުން އަންނަ ދަތި ޙާލުގެ ވާހަކަ އެވެ. މި ހުރިހާ ވާހަކަ އަކާއި، ޝަކުވާ އަކާއި، ކަންބޮޑުވުމަކާއި، ކެކުޅުން ތަކެއްގެ ތެރޭގައި ރައްޔިތުން ތިއްބާާ، ރަމަޟާން މަހާ ދިމާކޮށް ދިއްކޮއްލާ މަސް ދަޅު ކޭހަކީ ރައްޔިތުންނަށް ހައްގުވާ މިންވަރެއް ނޫނެވެ. އެއީ ސަރުކާރާއި، ރައީސް މުޢިއްޒުގެ ހެޔޮފުޅު ކަމެއް ވެސް ނޫނެވެ. މަސް ދަޅު ކޭސް ވެސް ގަންނަނީ ނިކަމެތި ރައްޔިތު މީހާ ދައްކާ ޓެކްސް ފައިސާ ނޫން ދެން ކޮން ފައިސާ އަކުން ހެއްޔެވެ؟ 

ރައްޔިތުން ވެސް ކުޑަކޮށް ހޭވެރިވާން ވެއްޖެ ކަމަށް ދެކެމެ އެވެ. އިންތިހާ އަށް ސަރުކާރާ މެދު މާޔޫސްވެ، ކަންކަން ނުވާ ވާހަކަ ދައްކަން ފެށީމާ، އެ ދިއްކޮއްލާ މަސް ދަޅު ކޭހުން "ޗަލުވާލެވޭ" ބަޔަކަށް ނުވާށެވެ. ސަރުކާރަށް ކަންކަން ނުވަންޏާ، އެ ވާހަކަ ދައްކާށެވެ. އެކަމަށް ސަރުކާރު ޖަވާބުދާރީ ކުރުވަން ލިބޭ ފުރުސަތުގައި ވިސްނައިގެން ކަންކަން ކުރީމާ ރަނގަޅު ވާނީ ރައްޔިތު މީހާ އަށެވެ. ރަމަޟާން މަހު ދަސް ދަޅު ކޭހެއް ދީ، ކަރަންޓު ބިލު ހަތަރު ސަތޭކަ އަށް ވުރެ ބޮޑު ނުކޮށް ތިބެފައި، ދެން އަންނަ މަހު ފޮނުވާ ކަރަންޓު ބިލާ އެކު "ދެ ލޯ މުދުނަށް" އަރާނީ ވެސް ރައްޔިތުންގެ އެވެ.