ސަރުކާރުން ރައްޔިތުންނަށް ދޭ ތަފާތު އެހީތަކާއި، ފޯރުކޮށްދޭ އެއްވެސް ބާވަތެއްގެ ޚިދުމަތަކީ ޤާނޫނީގޮތުން “ހަދިޔާ” ގެ ނަމުގައި ސިފަކުރެވޭނެ އެއްޗެއް ނޫން: ކުރީގެ އުއްތަމަ ފަނޑިޔާރު
ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތަކާއި އެހީތަކަކީ ރައީސުލްޖުމްހޫރިއްޔާގެ "ހަދިޔާ" އެއްގެ ގޮތުގައި މިނިސްޓަރު އާދަމް ޝަރީފް ސިފަކުރައްވާތީ، ކުރީގެ އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީ އެކަމަށް ފާޑުވިދާޅުވި. ދައުލަތުގެ ބަޖެޓުން ޚަރަދުކޮށްގެން ދޭ އެހީތަކަކީ އިޖުތިމާޢީ ޢަދާލަތު ޤާއިމުކުރުމަށް ދައުލަތުން އުފުލަންޖެހޭ ދުސްތޫރީ މަސްއޫލިއްޔަތެއް ކަމަށާއި، އެއީ ރައްޔިތުންނަށް ލިބިދޭންޖެހޭ ޙައްޤެއް ކަމަށް އޭނާ ވިދާޅުވި. އެހެންކަމުން ސަރުކާރުގެ ޚިދުމަތްތަކަކީ ވަކި ބޭފުޅެއްގެ ދީލަތިކަމުން ދޭ އެއްޗެއްގެ ގޮތުގައި ނުބެލެވޭނެ ކަމަށްވެސް ޑރ. ދީދީ ފާހަގަކުރެއްވި.
1447 ވަނަ އަހަރުގެ ރޯދަ މަހަށް ގޭބިސީތަކަށް ސަރުކާރުން މަސްދަޅު ކޭސް ބަހަނީ. | ލޯކަލް ގަވަރމަންޓް މިނިސްޓްރީ
ސަރުކާރުން ރައްޔިތުންނަށް ދޭ ތަފާތު އެހީތަކާއި، ފޯރުކޮށްދޭ އެއްވެސް ބާވަތެއްގެ ޚިދުމަތަކީ ޤާނޫނީގޮތުން “ހަދިޔާ” ގެ ނަމުގައި ސިފަކުރެވޭނެ އެއްޗެއް ނޫން ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވެއްޖެ އެވެ.
ކުރީގެ އުއްތަމަ ފަނޑިޔާރު މިހެން ވިދާޅުވީ، ލޯކަލް ގަވަރންމަންޓް މިނިސްޓަރ އާދަމް ޝަރީފް އުމަރު ރޯދަ މަހަށް ސަރުކާރުން ބަހަމުންދާ މަސްދަޅުތަކަކީ ރައީސް މުއިއްޒު ދެއްވާ "ހަދިޔާ" އެއްގެ ގޮތުގައި ތަކުރާރުކޮށް ސޯޝަލް މީޑިއާ ގައި ޕްރޮމޯޓް ކުރައްވަމުން ގެންދަވާތީ އެކަމަށް ރައްދު ދެއްވަމުންނެވެ.
މަސްދަޅު ކޭސް ތައް ބަހަން ފެށީއްސުރެ ރައީސް މުއިއްޒު އަށް ސަނާ ވިދާޅުވެ އާދަމް ޝަރީފް އުމުރު ގެންދަވަނީ ސޯޝަލް މީޑިއާ ގައި މަސްދަޅު ބެހުން ޕްރޮމޯޓް ކުރައްވަމުންނެވެ.
ބުރާސްފަތި ދުވަހުގެ ރޭ އާދަމް ޝަރީފް އެކްސް ގައި ކުރެއްވި ޕޯސްޓެއް ގައި ވިދާޅުވެފައިވަނީ، "ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅާ އެއްގޮތަށް 1447 ވަނަ އަހަރުގެ ބަރަކާތްތެރި ރަމަޟާންމަހަށް ކޮންމެ ގޭބިސީއަކަށް ސަރުކާރުން ދޭ ރޯދަ ހަދިޔާ ގްރޭޓަރ މާލެ ސަރަޙައްދުގައި ދޫކުރުމުގެ މަސައްކަތް މިރޭގެ ނިޔަލަށް ނިމުނީ،" ކަމަށެވެ.
އޭގެ އިތުރުން "އެއްވެސް ސަބަބަކާހުރެ މިހާތަނަށް ރޯދަ ހަދިޔާ ހޯއްދަވާފައިނުވާ ފަރާތްތަކަށް ވެސް މުލަ ރޯދަ ދުވަހާ ހަމައަށް މާލޭގައި ހުންނަ މިފްކޯ މަރުކަޒުން ރޭގަނޑު 8.30 ން 11.00 ށް ދޫކުރުމުގެ އިންތިޒާމު ވާނީ ހަމަޖެހިފައި،" ކަމަށް ވެސް އާދަމް ޝަރީފް ވިދާޅުވި އެވެ.
ސަރުކާރުން ބަހަމުންދާ މަސްދަޅު ކޭސް ތަކަކީ ރައީސް މުއިއްޒު އަމިއްލަ ޚަރަދުގައި ބަހަމުންދާ އެއްޗެއް ކަމަށް ނުވާއިރު އާދަމް ޝަރީފް އެއީ ރައީސް މުއިއްޒު ދެއްވާ "ރޯދަ ހަދިޔާ" ގެ ގޮތުގައި ތަކުރާރުކޮށް ސިފަކުރައްވަމުން ގެންދަވާކަން ފާހަގަ ކުރެވެ އެވެ.
ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ވިދާޅުވީ، "އެއީ އެއްވެސް ޙާލެއްގައި ސަރުކާރުގެ ދީލަތިކަމުން ނުވަތަ ހެޔޮފުޅުކަމުން ދޭ އެއްޗެއް ނޫން." ކަމަށެވެ.
ދައުލަތާއި ރައްޔިތުންގެ ދެމެދުގައި އޮންނަ ގުޅުން ބިނާވެގެންވަނީ ޤާނޫނުން ލާޒިމްކުރާ ޙައްޤުތަކާއި އިލްތިޒާމްތަކެއްގެ މައްޗަށް ކަމަށްވާއިރު، ޢާންމު ޚިދުމަތްތަކާއި، އިޖްތިމާޢީ އެހީތަކާއި މަޞްލަޙަތުތަކާއި ސަބްސިޑީތަކަކީ އިޖްތިމާޢީ ޢަދާލަތު ޤާއިމުކުރުމަށް ދައުލަތުން އުފުލަންޖެހޭ ދުސްތޫރީ މަސްއޫލިއްޔަތު އުފުލުމަށްޓަކައި ދައުލަތުގެ ބަޖެޓުން ޚަރަދުކޮށްގެން ރައްޔިތުންނަށް ފޯރުކޮށްދެވޭ އެއްޗެއް ކަމަށް ވެސް އޭނާ ވިދާޅުވި އެވެ.
"ރައްޔިތުންނަށް ދައުލަތުން ފޯރުކޮށްދެނީ ހަދިޔާއެއް ނޫނެވެ. އެއީ ރައްޔިތުންގެ ޙައްޤެއް،" ކަމަށް ވެސް ކުރީގެ އުއްތަމަ ފަނޑިޔާރު އެކްސް ގައި ކުރެއްވި ޕޯސްޓެއްގައި ބުރާސްފަތި ދުވަހު ވިދާޅުވި އެވެ.
