ރޯދަ އަށް ހަނދު ބަލާނީ ފެބްރުއަރީ 17 ވާ އަންގާރަ ދުވަހު
މި އަހަރުގެ ރޯދަ މަހުގެ ހަނދު ބެލުމަށްޓަކައި އަންގާރަ ދުވަހުގެ ހަވީރުން ފެށިގެން ކޯޓުތަކާއި ކައުންސިލް އިދާރާތައް ހުޅުވާފައި ބެހެއްޓުމަށް ޑީޖޭއޭ އިން ވަނީ ނިންމާފައި. ހަނދު ފެނިގެން ހެކިބަސް ދޭން ބޭނުންވާ ފަރާތްތަކަށް މާލެ އާއި ރަށްރަށުގައި އެ ފުރުޞަތު ފަހިކޮށްދީފައިވާއިރު، ހެކިބަސް ދޭން އަންނަ ފަރާތްތަކުގެ ދަތުރުފަތުރުގެ ޚަރަދު ވެސް ސަރުކާރުން ހަމަޖައްސައިދޭ. ކަލަންޑަރުގައިވާ ގޮތުން މި އަހަރުގެ ރޯދަ މަހުގެ ފުރަތަމަ ދުވަހަކީ މި މަހުގެ 18 ވާ ބުދަ ދުވަސް.
ފުރިހަމަ ހަނދުގެ ކުރިމަތިން މަތިންދާބޯޓެއް އުދުހިފައި ދަނީ | ގެޓީ އިމޭޖަސް
މި އަހަރުގެ ރޯދަ މަހުގެ ހަނދު ބެލުން ފެބްރުއަރީ މަހުގެ 17 ވާ އަންގާރަ ދުވަހު ކުރިޔަށްދާނެ ކަމަށް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ހާމަ ކޮށްފި އެވެ.
ހަނދު ބެލުން އަންގާރަ ދުވަހުގެ ހަވީރު 5:30 ން ފެށިގެން ކުރިއަށް ގެންދާ ގޮތަށް ހަމަޖައްސާފައިވާއިރު، ޑީޖޭއޭ ގެ އިތުރުން، އަތޮޅު ކައުންސިލް އިދާރާތަކާއި، ރަށު ކައުންސިލް އިދާރާތަކާއި، ރަށްރަށުގެ މެޖިސްޓްރޭޓް ކޯޓުތައް އެ ގަޑީގައި ހުޅުވާފައި ބަހައްޓާ ގޮތަށް ވަނީ ހަމަ ޖައްސާފަ އެވެ.
ހަނދު ފެނިގެން ހެކިބަސް ދޭން ބޭނުންވާ ފަރާތްތަކުން މާލޭގައި ނަމަ ކޯޓެއްގެ ޤާޟީއެއްގެ ކުރި މަތީގައި އަދި ރަށްރަށުގައި ނަމަ މެޖިސްޓްރޭޓުންގެ ކުރިމަތީގައި ހެކިބަސް ދެވޭނެ ކަމަށާއި، މެޖިސްޓްރޭޓަކު ނެތް ރަށެއް ނަމަ، އެ ރަށެއްގެ ކައުންސިލް ހިންގުމާ ޙަވާލުވެ ހުންނެވި އިސްވެރިއެއްގެ ކުރިމަތީގައި ހެކިބަސް ދެވޭނެ އެވެ. ހަނދު ފެނިގެން ހެކިބަސް ދޭން އަންނަ ފަރާތްތަކުގެ ދަތުރުފަތުރުގެ ޚަރަދު ދޭ ގޮތަށް މި އަހަރު ވެސް ވަނީ ހަމަޖައްސާފަ އެވެ.
ހަނދު ފެނިގެން މަޢުލޫމާތު ދޭއިރު، ހަނދު ހުރި މިސްރާބާއި އުސްމިން ފަދަ މުހިންމު ތަފްސީލުތައް ދޭން ޖެހެ އެވެ.
ކަލަންޑަރު ގައި އޮންނަނީ މި އަހަރުގެ ރޯދަ މަހުގެ ފުރަތަމަ ދުވަހަކީ މި މަހުގެ 18 ވާ ބުދަ ދުވަސް ކަމަށެވެ.
