ރަމަޟާން މަހަށް މިދަނީ ވަރަށް ފުރިހަމަ އަށް ތައްޔާރުވަމުން، ހުރިހާ މިސްކިތްތަކެއް އާބާތުރަ ފިލުވައި ނިމޭނެ: މޭޔަރު އާޒިމް

ރަމަޟާން މަހަށް ވަރަށް ފުރިހަމަ އަށް ތައްޔާރު ވަމުންދާ ކަމަށާއި، ރަމަޟާން މަސް އައުމުގެ ކުރިން މާލެސިޓީ ކައުންސިލުން ބަލަހައްޓަމުންދާ ހުރިހާ މިސްކިތްތަކެއް އާބާތުރަ ފިލުވައި ނިމޭނެ ކަމަށް މޭޔަރު އާދަމް އާޒިމް ވިދާޅުވެއްޖެ އެވެ. 

ކުރިއަށް އޮތް ރަމަޟާން މަހަށް ތައްޔާރުވުމުގެ ގޮތުން މާލެސިޓީ ކައުންސިލުން ދަނީ ގިނަ މަސައްކަތްތައް ކުރަމުންނެވެ. ޚާއްސަ އިސްކަމެއްދީގެން މިސްކިތްތައް އާބާތުރަ ފިލުވައި، މަރާމާތުގެ މަސައްކަތްތައް ކުރިއަށް ގެންދެ އެވެ.

މި މަސައްކަތްތައް ކުރިއަށްދާ ގޮތް ހޮނިހިރު ދުވަހު ބައްލަވާ ލައްވައި މޭޔަރު އާޒިމް ވިދާޅުވީ، ރަމަޟާން މަސް އައުމުގެ ކުރިން ސިޓީ ކައުންސިލުން ބަލަހައްޓަމުންދާ ހުރިހާ މިސްކިތެއް އާބާތުރަ ފިލުވައި، މަރާމާތުގެ ހުރިހާ މަސައްކަތެއް ނިމޭނެ ކަމަށެވެ. މިހާރު ވެސް އާއްމު ރައްޔިތުންގެ ކަންބޮޑުވުންތައް އޮޅުން ފިލުވައި، އެ މައްސަލަތަކަށް ހައްލު ހޯދައިދިނުމަށް މަސައްކަތް ކުރާ ކަމަށް އޭނާ ވިދާޅުވި އެވެ. 

އެގޮތުން މިސްކިތުގެ ސައުންޑް ސިސްޓަމް ރަނގަޅު ކުރުމާއި، މިސްކިތްތައް އޭސީ ކުރުމާއި، މިސްކިތްތަކުގެ ފެން ފައިބާ ތަންތަނުގެ މައްސަލަ ހައްލު ކުރުމާއި، ފާޚާނާ މަރާމާތު ކުރަންޖެހޭ މިސްކިތްތަކުގެ ފާޚާނާ ތައް މަރާމާތު ކުރުމުގެ މަސައްކަތް ކުރަމުންދާ ކަމަށެވެ. ބޮޑެތި މަރާމާތުގެ މަސައްކަތްތައް ކުރިއަށްދާއިރު، ކުލަ ލުމުގެ މަސައްކަތްތައް ބަރަށް ކުރިއަށްދާ ކަމަށް މޭޔަރު އާޒިމް ވިދާޅުވި އެވެ. އަދި ރައްޔިތުންނަށް ދަތިނުވާނެ ގޮތަކަށް އަޅުކަން ކުރެވޭނެ ގޮތަށް މިސްކިތުގައި ހުރިހާ އިންތިޒާމެއް ހަމަ ޖައްސާނެ ކަމަށް ވެސް މޭޔަރ އާޒިމް ވިދާޅުވިވެ. 

ރޯދަ އަންނައިރު، މާލެސިޓީ ކައުންސިލުން ބަލަހައްޓާ ހުރިހާ މިސްކިތެއް ހުންނާނީ ހިތްފަސޭހަކޮށް ހުރިހާ އިންތިޒާމެއް ހަމަޖެހިފައި.  

މާލެސިޓީ ކައުންސިލްގެ މޭޔަރު އާދަމް އާޒިމް 

މާލެސިޓީ ކައުންސިލުން އަބަދުވެސް މިސްކިތްތައް މަރާމާތު ކުރުމުގެ މަސައްކަތްތައް ކުރިއަށް ގެންދެ އެވެ. އަދި ޚާއްސަކޮށް ކޮންމެ ރަމަޟާން މަހާ ދިމާކޮށް އެ މަސައްކަތް ފުޅާ ކުރެ އެވެ.