ހަމާސް ގެ ލީޑަރު: ހަތިޔާރު ބަހައްޓަން އެއްބަހެއް ނުވާނަން، ބޭރުގެ ބާރުތަކަކަށް ޣައްޒާ ނުހިންގޭނެ

އެމެރިކާ އާއި އިޒްރޭލުން ބާރުއަޅަމުންދާ ގޮތަށް، ހަމާސްގެ ހަތިޔާރުތައް ނުބަހައްޓާނެ ކަމަށާއި އަދި ޣައްޒާގެ ކަންކަމުގެ ތެރެއަށް ބޭރުގެ ފަރާތްތަކުން ވަދެ ނުފޫޒު ފޯރުވުމަށް ފުރުސަތު ނުދޭނެ ކަމަށް ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުގެ އިސް ލީޑަރަކު އާދީއްތަ ދުވަހު ވިދާޅުވެއްޖެ އެވެ.

ގަތަރުގެ ދޯހާގައި ބޭއްވި ކޮންފަރެންސެއްގައި ވާހަކަދައްކަވަމުން ހަމާސްގެ ކުރީގެ ލީޑަރު ޚާލިދު މަޝާލް ވިދާޅުވީ، އިޒްރޭލުގެ އިސްތިއުމާރާ ދެކޮޅަށް ކުރާ މަސައްކަތާއި، އެކަމަށް ބޭނުންކުރާ ހަތިޔާރާއި، އަދި އެ މަސައްކަތުގައި ބައިވެރިވާ މީހުންނަކީ ކުށްވެރިން ކަމުގައި ކަނޑައެޅުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ.

މަޝާލް އިތުރަށް ވިދާޅުވީ، އިޒްރޭލުގެ އިސްތިއުމާރު ދެމިއޮތްހާ ހިނދަކު އެކަމާ ދެކޮޅަށް ތެދުވުމާއި ހަނގުރާމަކުރުން ދެމިއޮންނާނެ ކަމަށެވެ. އަދި އިސްތިއުމާރުގެ ދަށުގައިވާ ރައްޔިތުންނަށް އެމީހުންގެ މިނިވަންކަމަށްޓަކައި މަސައްކަތް ކުރުމަކީ ލިބިގެންވާ ހައްގެއް ކަމަށާއި، އެއީ ގައުމުތަކުން ފަހުރުވެރިވާންޖެހޭ ކަމެއް ކަމަށްވެސް އޭނާ ފާހަގަކުރެއްވި އެވެ.

ފަލަސްތީނުގެ ބިންތަކަށް އިޒްރޭލުން ވެރިވެގަނެގެން އުޅޭ އުޅުމާ ދެކޮޅަށް ހަމާސްއިން ދަނީ ހަނގުރާމަ ކުރަމުންނެވެ. މިގޮތުން 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސްއިން ޣައްޒާގެ ބޯޑަރު ހުރަސްކޮށް އިޒްރޭލަށް ދިން ވަރުގަދަ ހަމަލާއާ ގުޅިގެން، މިހާރު ކުރިއަށްދާ ނުރައްކާތެރި ހަނގުރާމަ ވަނީ ފެށިފައެވެ.

އެމެރިކާ މެދުވެރިވެގެން ޣައްޒާގައި ގާއިމުކޮށްފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން މިހާރު އޮތީ ދެވަނަ މަރުހަލާގަ އެވެ. މި މަރުހަލާގައި ރޭވިފައިވަނީ ޣައްޒާގައި ހުރި ހަތިޔާރުތައް ނައްތާލުމަށާއި، ހަމާސްގެ ހަތިޔާރުތައް އަތުލުމުގެ އިތުރުން، އިޒްރޭލުގެ ސިފައިން  ޣައްޒާ އިން ފޭބުމަށެވެ.

ހަމާސް އިން ތަކުރާރުކޮށް ބުނަމުންދަނީ ހަތިޔާރު ބެހެއްޓުމަކީ އެއްވެސް ހާލެއްގައި ކުރާނެ ކަމެއް ނޫން ކަމަށެވެ. ނަމަވެސް، ކުރިއަށް އޮތް ތަނުގައި ފަލަސްތީނުގައި އުފެދޭ ރަސްމީ ސަރުކާރަކާ ހަތިޔާރު ހަވާލުކުރުމާ މެދު ވިސްނާފާނެ ކަމުގެ އިޝާރާތެއް އެ ޖަމާއަތުން ކުރިން ދީފައިވެ އެވެ.

އިޒްރޭލުގެ އޮފިޝަލުން ލަފާކުރާ ގޮތުގައި ގައްޒާގައި ހަމާސްގެ 20،000 އެއްހާ ހަނގުރާމަވެރިން އަދިވެސް އެބަތިއްބެވެ. އަދި އެމީހުންގެ އަތުގައި 60,000 އެއްހާ ކަލަޝްނިކޯވް ބަޑި ހުރި ކަމަށް އިޒްރޭލުން ބުނެ އެވެ.

ހަނގުރާމައިގެ ސަބަބުން ސުންނާފަތިވެފައިވާ ޣައްޒާގެ ދުވަހުން ދުވަހަށް ކުރަންޖެހޭ އިދާރީ ކަންކަން ބެލެހެއްޓުމަށްޓަކައި ފަލަސްތީނުގެ ފަންނީ މާހިރުންގެ ކޮމިޓީއެއް (ޓެކްނޮކްރެޓިކް ކޮމިޓީ) މިހާރު ވަނީ އެކުލަވާލާފަ އެވެ. ނަމަވެސް، ޣައްޒާގައި ހުރި ހަތިޔާރުތައް ނައްތާލުމުގެ މައްސަލައިގައި އެ ކޮމިޓީން އަމަލުކުރާނެ ގޮތެއް އަދި ސާފެއް ނުވެ އެވެ.

މި ކޮމިޓީ މަސައްކަތް ކުރަމުންދަނީ އެމެރިކާގެ ރައީސް ޑޮނަލްޑް ޓްރަމްޕް އިސްނަންގަވައިގެން އުފައްދާފައިވާ "ބޯޑް އޮފް ޕީސް" ނުވަތަ ސުލްހައިގެ ބޯޑުގެ ދަށުންނެވެ.

ޣައްޒާގެ ހަމަލާބަދަލުކުރުން ހުއްޓާލުމުގެ ކަންކަން ބެލެހެއްޓުމަށާއި ހަނގުރާމަ އަށް ފަހު ޣައްޒާ އަލުން އާރާސްތުކުރުމަށް އުފެއްދި މި ބޯޑުގެ ދައުރު މިހާރު ވަނީ ފުޅާކޮށްފަ އެވެ. މިއާއެކު، މި ބޯޑަކީ އދ. އާ ވާދަކުރާނެ އިދާރާއަކަށް ވެދާނެ ކަމުގެ ބިރު އޮތް ކަމަށް ބުނެ ބައެއް ފަރާތްތަކުން ދަނީ ފާޑުކިޔަމުންނެވެ.

ރައީސް ޓްރަމްޕް މި ބޯޑު އިފްތިތާހުކޮށްދެއްވީ މިދިޔަ މަހު ސްވިޒަލޭންޑުގެ ޑާވޯސްގައި ބޭއްވި ވޯލްޑް އިކޮނޮމިކް ފޯރަމްގަ އެވެ. އެ ރަސްމިއްޔާތުގައި ދުނިޔޭގެ ވިއްސަކަށް ގައުމުގެ ލީޑަރުންނާއި އިސް އޮފިޝަލުން ވަނީ ބޯޑުގެ އަސާސީ ގަވާއިދުގައި ސޮއިކުރައްވާފަ އެވެ.

"ބޯޑް އޮފް ޕީސް" ގެ އިތުރުން، ޓްރަމްޕް ވަނީ "ޣައްޒާ އެގްޒެކެޓިވް ބޯޑު" ގެ ނަމުގައި އިތުރު ބޯޑެއްވެސް އުފައްދަވާފަ އެވެ. މިއީ ފަލަސްތީނުގެ ފަންނީ ކޮމިޓީއަށް ލަފާދޭ ބޯޑެކެވެ. މި ބޯޑުގައި އެމެރިކާގެ މަންދޫބުން ކަމަށްވާ ސްޓީވް ވިޓްކޮފް އާއި ޖެރެޑް ކުޝްނަރްގެ އިތުރުން އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއާ ފަދަ ބައިނަލްއަގުވާމީ ފަރާތްތައް ހިމެނެ އެވެ.

އާދީއްތަ ދުވަހު ވާހަކަދައްކަވަމުން މަޝާލް ވަނީ، ޣައްޒާ އަލުން އާރާސްތުކުރުމަށާއި އެތަނުގައި ދިރިއުޅޭ 2.2 މިލިއަން ރައްޔިތުންނަށް އެހީ ފޯރުކޮށްދިނުމުގައި ހަމަހަމަ އުސޫލެއް ގެންގުޅުމަށް "ބޯޑް އޮފް ޕީސް" އަށް ގޮވާލައްވާފަ އެވެ. ހަމައެއާއެކު، ފަލަސްތީނުގެ ބިންތަކުގައި ބޭރުގެ އެއްވެސް ފަރާތެއްގެ ވެރިކަމެއް ހިންގުމަށް ހަމާސް އިން ފުރުސަތު ނުދޭނެ ކަމުގެ އިންޒާރު ވެސް އޭނާ ދެއްވި އެވެ.

މަޝާލް ވިދާޅުވީ، ހަމާސް އިން ދެމިއޮންނާނީ ގައުމީ އަސާސްތަކުގެ މަތީގައި ކަމަށާއި، ބޭރުގެ ނުފޫޒާއި، ބޭރުގެ ފަރާތްތަކުން ކަންކަން ނިންމުމާއި، ނުވަތަ އެއްވެސް ސިފައެއްގައި ބޭރުގެ ބާރެއްގެ ދަށަށް ފަލަސްތީނު ދިއުމަށް ދެކޮޅު ހަދާ ކަމަށެވެ.

"ފަލަސްތީނުގެ މީހުންގެ މައްޗަށް ވެރިކަން ކުރަންވާނީ ފަލަސްތީނުގެ މީހުން. ޣައްޒާ އަކީ ޣައްޒާގެ ރައްޔިތުންނާއި ފަލަސްތީނުގެ ބިމެއް. ބޭރުގެ އެއްވެސް ފަރާތެއްގެ ވެރިކަމެއް އަހަރެމެން ބަލައެއް ނުގަންނާނަން،" މަޝާލް ވިދާޅުވި އެވެ.