އެމެރިކާ-ކެނެޑާ ބްރިޖް ހުޅުވުން ހުއްޓާލަން އަންގައި، ޓްރަމްޕްގެ އިންޒާރެއް

އެމެރިކާ އާއި، ކެނެޑާއާ ދެމެދު ޤާއިމު ކުރަމުންދާ އައު ބްރިޖް ހުޅުވުން ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފި އެވެ. 

މީގެ ކުރިން ޓްރަމްޕް ވަނީ ކެނެޑާ އަކީ އެމެރިކާގެ 51 ވަނަ ސްޓޭޓް ކަމަށް ވެސް ވިދާޅުވެފަ އެވެ. އޭގެ ފަހުން އެ ވާހަކަ ތަކަށް މަޑު ޖެހުމަށް އައިސްފައިވާއިރު، މިއީ ކެނެޑާއާ ދެކޮޅަށް ޓްރަމްޕް ދެއްވި ފަހުގެ ހަމަލާ އެކެވެ. 

ޓްރަމްޕް ވިދާޅުވެފައި ވަނީ ކެނެޑާގެ އޮންޓޭރިއޯ ޕްރޮވިންސް އާއި، އެމެރިކާގެ މިޝިގަން ސްޓޭޓް ގުޅުވާ ގޯޑީ ހޯވް އިންޓަނޭޝަނަލް ބްރިޖުގެ އެންމެ މަދުވެގެން ދެބައި ކުޅަ އެއްބައި އެމެރިކާ އަށް ވެސް ލިބެން ޖެހޭ ކަމަށެވެ. މި ބްރިޖުގެ މަސައްކަތް މިހާރު ވެސް ކުރިއަށް ގެންދަމުން އަންނައިރު، މިއަހަރުގެ ފަހު ކޮޅުގެ ތެރޭގައި ބްރިޖު ހުޅުވޭނެ ކަމަށް ވަނީ ލަފާ ކޮށްފަ އެވެ. 

މިއަހަރުގެ ފަހު ކޮޅު މި ބްރިޖު ހުޅުވުމަށް ތައްޔާރު ވަމުން އަންނައިރު، ބްރިޖުގެ މަސައްކަތް ފަށާފައި ވަނީ 2018 ވަނަ އަހަރު އެވެ. 4.7 ބިލިއަން އެމެރިކާ ޑޮލަރު ޚަރަދު ކޮށްގެން ހަދާ މި ބްރިޖަކީ، ކެނެޑާގައި އުފަން ހޮކީ ކުޅުންތެރިޔާ ގޯޑީ ހޯވްގެ ނަމުން ނަން ދީފައިވާ ބްރިޖެކެވެ. 

ޓްރަމްޕްގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވެފައި ވަނީ، އެމެިރކާ އިން ކެނެޑާ އަށް ދީފައިވާ ހުރިހާ އެއްޗެއްގެ ފުރިހަމަ ބަދަލު ނުލިބޭ ހިނދެއްގައި، އެ ބްރިޖު ހުޅުވުމަށް ތާއީދު ނުކުރައްވާނެ ކަމަށާއި، ހުއްދަ ވެސް ނުދެއްވާނެ ކަމަށެވެ. އަދި ކެނެޑާ އިން އެމެރިކާ އަށް އިންސާފާއި، އިހުތިރާމް އާއެކު މުއާމަލާތް ކުރަން ޖެހޭ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕްގެ ކަންބޮޑުވުންތައް ފާޅު ކުރައްވަމުން އޭނާ ވިދާޅުވެފައި ވަނީ، އެ ބްރިޖުގެ ދެ ފަރާތް ވެސް ނިސްބަތް ވަނީ ކެނެޑާ އަށް ކަމަށާއި، އެ ބްރިޖު ހެދުމަށް އެމެރިކާގެ އެއްވެސް ބާވަތެއް ބޭނުން ނުކުރާ ކަމަށެވެ. 

ވިންޑްސާ ޑިޓްރޮއިޓް ބްރިޖު އޮތޯރިޓީ އިން ނެރުނު މައުލޫމަތު ފޮތުގައި ބުނެފައި ވަނީ، މި ބްރިޖަށް ބޭނުންވާ އެންމެހާ ފައިސާ ހޯދާފައި ވަނީ ކެެނެޑާ އިން ކަމަށާއި، ބްރިޖުގެ ކަންކަން ބަލަހައްޓައި، އިންތިޒާމުތައް ކުރިއަށް ގެންދާނީ ކެނެޑާގެ ސަރުކާރު އަދި މިޝިގަން ސްޓޭޓްގެ ސަރުކާރުން ކަމަށެވެ. 

އިތުރަށް ޓްރަމްޕް ވިދާޅުވެފައި ވަނީ، ކެނެޑާގެ ބޮޑު ވަޒީރު މާކް ކާނީ ޗައިނާ އާއެކު ވިޔަފާރީގެ އެއްބަސްވުމެއް ހަދަން ބޭނުން ވުމަކީ އޭނާ ކަންބޮޑުވެ ވަޑައިގަންނަވާ ކަމެއް ކަމަށެވެ. ޖަނަވަރީ މަހު ޗައިނާ އާއެކު ވިޔަފާރީގެ ފުރަތަމަ އެއްބަސްވުމުގައި ކާނީ ސޮއި ކުރައްވާފައިވާއިރު، އެމެރިކާާ އިން ވަނީ ކެނެޑާ އަށް 100 އިންސައްތައާ ހަމަށް ޓެރިފް ނަގާނެ ކަމަށް އިންޒާރު ދީފަ އެވެ. 

ކެނެޑާ އާއި އެމެރިކާއާ ދެމެދު އޮތް ގުޅުން ގޯސްވެފައިވާއިރު، ކާނީ ވެސް ވަނީ އެކި ފަހަރުން މަތިން ރައްދު ދެއްވައި ވާހަކަ ދައްކަވައިފަ އެވެ.