ވެރިކަން ބަދަލުވުމާއެކު ކެނދިކުޅުދޫ ބަނދަރުގެ މަސައްކަތް ކުރަނީ މަލާމާތް ކުރާ އުސޫލުން: ކައުންސިލުގެ ނައިބު ރައީސް
11 ފެބުރުއަރީ 2026 | ބުދަ 14:40ނ. ކެނދިކުޅުދޫ ބަނދަރު ބޮޑުކުރުމާއި ސްލިޕްވޭ ހެދުމުގެ މަސައްކަތް ހުއްޓިފައިވާތީ އެ ރަށު ކައުންސިލުން ކަންބޮޑުވުން ފާޅުކުރޭ. ބަނދަރުގެ ބޭރުތޮށި ނުހެދި ލަސްވުމުގެ ސަބަބުން ބަނދަރު ތެރެއަށް ވެލި ވަދެ، ކުރިން ކޮށްފައިވާ މަސައްކަތްތަކަށް ގެއްލުންވަމުންދާކަން ކައުންސިލުން ފާހަގަކުރޭ. މި މަޝްރޫއަށް ބޭނުންވާ ބޮޑުހިލަ ހޯދުމުގައި ސަރުކާރަށް ދަތިތަކެއް ކުރިމަތިވެފައިވާ ކަމަށް ބުނެ، ކައުންސިލުން ވަނީ ސަރުކާރުގެ ސިޔާސަތުތަކަށް ފާޑުކިޔާފައި.
ނ. ކެނދުކުޅުދޫ ބަނދަރުގެ މަސައްކަތް ހުއްޓިފައި. | ރާއްޖެ އެމްވީ
ވެރިކަން ބަދަލުވުމާއެކު ކެނދިކުޅުދޫ ބަނދަރުގެ މަސައްކަތް ހުއްޓިއްޖެ ކަމަށާއި، ސަރުކާރުން އެ ބުނަނީ މިއީ ރައްޔިތުންނަށް ކަންކަން ކޮށްދޭނެ ގޮތް ކަމަށް ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު ވިދާޅުވެއްޖެ އެވެ.
ނ. ކެނދިކުޅުދޫ ބަނދަރަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެށި މަސައްކަތެކެވެ. ކެނދިކުޅުދޫ ބަނދަރުގެ ދަތިކަން ހުރުމުން 3 ބަޔަކަށް ބަހާލައިގެން މަސައްކަތް ކުރާ ގޮތަށް ނިންމި އެވެ. މިކަމާއި ގުޅިގެން ރާއްޖެޓީވީ އާއި ވާހަކަ ދައްކަވަމުން ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު ވިދާޅުވީ މި މަސައްކަތުގައި ހިމެނެނީ ބަނދަރު ބޮޑުކުރުމާއި، ސްލިޕްވޭ ހެދުމާއި ނެރުފައިކަށީގެ މަސައްކަތް ކަމަށެވެ.
އޭނާ ވިދާޅުވީ ވެރިކަން ބަދަލުވުމާއެކު މަސައްކަތް ހުއްޓި ބަނދަރު ސަރަހައްދުން މިހާރު އޮތް ހާލަތު ފެންނާނެ ކަމަށެވެ.
ދޭތެރެއަކުން 2 ފީފާ ތެޔޮ ލިބެނީ. ދެން އެ 2 ފީފާ ތެޔޮ ހުސްވަންދެން މަސައްކަތް ކުރާނީ. އެމްޓީސީސީގެ މައްސަލައެއް ނޫންކަމަށް ބޮޑަށް ފާހަގަ ކުރެވެނީ. ސަރުކާރުން ރައްޔިތުން ކައިރީގައި މި ބުނަނީ މިގޮތަށޭ ތިމަންނަމެން ކަންކުރާނީ. ރާއްޖެތެރޭ މީހުންވީމަ ފަސްކުޅަނދު މަދުވާހަކަ ކިޔައެއްނުން. އެގޮތަށް މަލާމާތް ކުރާ އުސޫލުން މި ސަރުކާރުން ރައްޔިތުންނާ ދޭތެރޭ ކަންތައްތައް ކުރަނީ.ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު
ހަސަން ވިދާޅުވީ ބޮޑު ހިލަ ނުލިބޭ ވާހަކައަކީ ވަރަށް ހެއްވާ ވާހަކައެއް ކަމަށާއި، މި ސަރުކާރު ވެރިކަމަށް އައި އިރު، ހިލައަކީ ދިވެހިރާއްޖޭގައި އުފެދޭ އެއްޗެއް ނޫންކަން ވެރިކަމުގައި ތިބި ބޭފުޅުންނަށް ނޭނގޭ ކަމަށެވެ.
އެމީހުން ހީކުރީ ގޮނޑުދޮށްތަކުން ހިލަ ނަގާފައި ހިލަ ޖެހޭނެ ކަމަށް. އެހެންނަމަވެސް އިންޑިއާ ނުވަތަ ކޮންމެވެސް ބޭރު ގައުމަކުން މި ގެންނަނީ. އިންޑިއާ ދިމާލަށް އެމީހުން އެއްޗެހި ގޮވާފައި އެމީހުން ހީކުރީ މި ޕްރޮޖެކްޓްތަކަށް ހިލަ ވެސް ލިބޭނެ ކަމަށް.ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު
ހަސަން ވިދާޅުވީ ބަނދަރު ފުންކޮށްފައި އޮންނަތަ އެތައް ޒަމާނެއް ވެއްޖެ ކަމަށެވެ. އަދި ބޮޑު ހިލަ ނުޖެހި ބޭރު ތޮށި ނުހެދި އޮތުމުން ހުޅަނގުގައި ބަނދަރު ތެރެއަށް ވެލި ވަންނާނެ ކަމަށާއި، އަނެއްކާ ވެސް ޖެހޭނީ ކޮންނަން ކަމަށެވެ.
