ބ. ހިތާދޫ ބަނދަރު މަޝްރޫއު: ނުނިމި ހުރި 30 އިންސައްތަ މަސައްކަތް ރައްޔިތުން އެދޭ ގޮތަށް ބަދަލު ގެނެސް ނިންމަވައިދެއްވާނެ ކަމަށް ރައީސް މުއިއްޒު ވިދާޅުވި ނަމަވެސް އެއްވެސް ބަދަލެއް ނުގެނޭ!
17 ސެޕްޓެމްބަރު 2026 | ބުރާސްފަތި 13:26ބ. ހިތާދޫ ބަނދަރުގެ މަޝްރޫއު ނިންމާލިއިރު، ރައްޔިތުން އެދުނު ބަދަލުތައް ގެނެސްދެއްވާނެ ކަމަށް ރައީސް ޑރ. މުއިއްޒު ވެވަޑައިގެންނެވި ވައުދުފުޅު ފުއްދަވާފައި ނުވާތީ އެ ރަށު ކައުންސިލްގެ ކުރީގެ މެންބަރު މުހައްމަދު ފާޒިލް ކަންބޮޑުވުން ފާޅުކުރައްވައިފި. ބަނދަރުގެ މަސައްކަތް ފެންވަރު ދަށްކޮށް ނިންމާލުމުގެ ސަބަބުން ބައްތިތައް ނުދިއްލުމާއި ރަށް ގިރުމުގެ މައްސަލަ ކުރިމަތިވަމުންދާކަން އޭނާ ފާހަގަކުރެއްވި
ބ. ހިތާދޫ ބަނދަރު މަޝްރޫއު: ނުނިމި ހުރި 30 އިންސައްތަ ރައްޔިތުން އެދޭ ގޮތަށް ބަދަލު ގެނެސް ނިންމަދޭނެ ކަމަށް ރައީސް މުއިއްޒު ވިދާޅުވި ނަމަވެސް އެއްވެސް ބަދަލެއް ނުގެނޭ! | ރާއްޖެ އެމްވީ
ބ. ހިތާދޫގައި ރައީސް އިބްރާހިމް މުހައްމަދު ސޯލިހުގެ ސަރުކާރުގައި 70 އިންސައްތަ ނިންމާފައިވާ ބަނދަރުގެ މަސައްކަތް ރައްޔިތުން އެދޭ ގޮތަށް ބަދަލު ގެނެސް ނިންމަވައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް، ބަނދަރު ނިންމާފައިވަނީ އެއްވެސް ބަދަލެއް ނުގެނެސްކަމުން ހިތާދޫ ކައުންސިލްގެ ކުރީގެ މެންބަރު މުހައްމަދު ފާޒިލް ކަންބޮޑުވުން ފާޅުކުރައްވައިފި އެވެ.
މިކަމުގެ ކަންބޮޑުވުން ފާޅުކުރައްވާ ފާޒިލް ރާއްޖެޓީވީއަށް ދެއްވި އިންޓަވިއުއެއްގައި ވިދާޅުވީ 22 އޮގަސްޓް 2025 ގައި ރައީސް މުއިއްޒު ހިތާދޫއަށް ވަޑައިގެން ރައްޔިތުންނާ ބައްދަލުކުރައްވާ ރައްޔިތުން އެދޭ ގޮތަށް ބަދަލު ގެނެސް ބަނދަރު މަޝްރޫއު ނިންމަވައިދެއްވާނެ ކަމަށް ވިދާޅުވި ކަމަށެވެ.
ނަމަވެސް އެއްވެސް ބަދަލެއް ނުގެނެސް ކުރިން ވެސް އޮތް ގޮތަށް މަސައްކަތް ނިންމިކަން ކުއްލިއަކަށް އިއުލާނު ކުރި ކަމަށް ފާޒިލް ވިދާޅުވި އެވެ.
ރައްޔިތުންނަށް ބައްދަލުކުރި ޖަލްސާގައި ކަރަށް ނާރު އަރުއްވާފައި (ރައީސް މުއިއްޒު) ވިދާޅުވި މިއޮތްތާ ވެސް ރިވެޓްމަންޓް ޖަހާދޭނަމޭ އެކޮޅުގައި ޖަހާފައި އިންގޮތަށް އެވެސް ނެތް. ދެން ހަމަ އެޔާއެކު ނެރު ފައިކަށި ހަމަ 50 މީޓަރު އިތުރަށް ޖައްސަވައިދޭނަމޭ. އަސްލު ހަގީގަތުގައި ރައްޔިތުންނާއި މަޝްވަރާ ކުރެވި ރައްޔިތުން ބޭނުންވި އެއްވެސް ކަމެއް ކުރެވިފައި ނެތްމުހައްމަދު ފާޒިލް
މީގެ އިތުރުން، ބަނދަރު ނިމުނު ފަހުން ތިން މަސްވެސް ނުވާކަން ފާހަގަކުރައްވައި ފާޒިލް ވިދާޅުވީ ބަނދަރުގައި އެމްޓީސީސީ އިން ޖަހާފައި ހުރި ބައްތިތައް މިހާރު ނުދިއްލޭ ކަމަށެވެ. އަދި ބަނދަރު މަޝްރޫއު ނިމުނުއިރު ވެސް ބޮޑު ހިލަ ބާލަން ޖެހި ބެޑް ނުނަގާ އޮތުމުން ރަށް ގިރަމުންދާތީ އެކަމުގެ ކަންބޮޑުވުން ފާޒިލް ވަނީ ފާޅުކުރައްވާފަ އެވެ.
ބ. ހިތާދޫ ބަނދަރު ހެނދުމުގެ މަޝްރޫއަކީ 2022 ވަނަ އަހަރު އެމްޓީސީސީ އިން އަމަލީ މަސައްކަތް ފެށި މަޝްރޫއެކެވެ. އެގޮތުން، މި މަޝްރޫއުގެ ދަށުން، 19،030 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 495 މީޓަރުގެ ސަރަހައްދެއްގައި ބޭރުތޮށި ލުމާއި، 22 މީޓަރުގެ ސަރަހައްދެއްގައި ގްރޮއިން ޖެހުމުގެ މަސައްކަތް ހިމެނެ އެވެ. އަދި 90 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 350 މީޓަރުގެ ސަރަހައްދެއްގައި އެއްގަމުތޮށި ލުމާއި، ރޭމްޕެއް ހެދުމާއި، 1،750 އަކަ މީޓަރުގެ ސަރަހައްދެއްގައި ޕޭވްމަންޓް ހެދުމާއި، ބަނދަރު ބައްތި އާއި ނެރުބައްތި ހަރުކޮށްފައިވެ އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރު ނިމުނުއިރު މި މަޝްރޫއުގެ 70 އިންސައްތަ މަސައްކަތް ވަނީ ނިންމާފަ އެވެ.
