ވިލާކޮލެޖާއި ހަވާލުކޮށްގެން ކެނދިކުޅުދޫގައި ހަދާ ޖޫނިއަރ ކޮލެޖުގެ މަސައްކަތް ސަރުކާރު އައި ފަހުން އޮތީ ހުއްޓިފައި
ނ. ކެނދިކުޅުދޫގައި ވިލާ ކޮލެޖުން އިމާރާތްކުރާ ޖޫނިއަރ ކޮލެޖުގެ މަސައްކަތް ހުއްޓި، އެތަނުގައި މަސައްކަތްކުރި މަސައްކަތު މީހުންގެ ފަރާތުން އާންމުންނަށް އުނދަގޫވާ މައްސަލަ ބޮޑުވި. ރަށުގެ ފަތުރުވެރިކަން ކުރިއެރުވުމުގެ މަގުސަދުގައި 50 އަހަރަށް ބިން ދޫކޮށްފައިވާ މި މަޝްރޫއު ލަސްވަމުންދާތީ ރައްޔިތުންގެ ކަންބޮޑުވުންތައް ހުރި އިރު، ކޮންޓްރެކްޓަރުންނަށް ފައިސާ ނުލިބުމުގެ މައްސަލަތަކެއް ވެސް ވަނީ ފެންމަތިވެފައި.
ކެނދިކުޅުދޫ ޖޫނިއަރ ކޮލެޖުގެ މަސައްކަތް ހުއްޓި އިމާރާތުގެ ތެރޭގައި ބަރަބޯ ހައްދާފައި. | ރާއްޖެ އެމްވީ
ވިލާކޮލެޖާއި ހަވާލުކޮށްގެން ނ. ކެނދިކުޅުދޫގައި ހަދާ ޖޫނިއަރ ކޮލެޖުގެ މަސައްކަތް ސަރުކާރު އައި ފަހުން އޮތީ ހުއްޓިފައި ކަމަށާއި، އެތަން ހަދަން ދެފަހަރެއްގެ މަތިން ބަޔަކާއި ހަވާލުކޮށްގެން ވެސް މަސައްކަތް ކުރިއަށް ނުދާ ކަމަށް ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު ވިދާޅުވެއްޖެ އެވެ.
ކެނދިކުޅުދޫ ޖޫނިއަރ ކޮލެޖު އަދި އެކަމަޑޭޝަން ބްލޮކުގެ މަސައްކަތީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ކުރިއަށް ގެންދަން ނިންމި މަޝްރޫއެކެވެ. ނަމަވެސް ޕްރޮޖެކްޓުގެ މަސައްކަތް ފެށި ނަމަވެސް މަސައްކަތް އޮތީ ހުއްޓިފަ އެވެ. މިކަމާއި ގުޅޭގޮތުން ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު ވިދާޅުވީ ރައީސް ސޯލިހުގެ ސަރުކާރުގައި އެރަށުގައި މަސައްކަތް ފެށި ޖޫނިއަރ ކޮލެޖަކީ އެރަށު ރައްޔިތުންގެ ވަރަށް ބޮޑު އުއްމީދެއް ކަމަށެވެ. އޭނާ ވިދާޅުވީ މި އުއްމީދު ފުރަތަމަ ގެނެސްދެއްވީ އެމްޑީޕީގެ ފުރަތަމަ ވެރިކަމުގައި ކަމަށާއި، ނަމަވެސް މި ވޭތުވެދިޔަ 14 ވަރަކަށް އަހަރުގެ ތެރޭގައި އެކަން ނުވެ ގޮސްފައިވާ ކަމަށެވެ.
ހަސަން ވިދާޅުވީ އެ ބިމަކީ ހަޔަރ އެޑިއުކޭޝަން މިނިސްޓްރީ އަށް ދީފައިވާ ބިމެއް ކަމަށާއި، އެ ޕްރޮޖެކްޓް ކާމިޔާބުކުރީ ވިލާ ކޮލެޖުން ކަމަށެވެ. އަދި ހަޔަރ އެޑިއުކޭޝަން އިން ވިލާ ކޮލެޖަށް ޕްރޮޖެކްޓް ހަވާލުކުރީ 2022 ވަނަ އަހަރުގެ ނޮވެމްބަރު މަހުގައި ކަމަށާއި، ނަމަވެސް ބިންގާ އެޅީ މިދިޔަ އަހަރު ކަމަށެވެ.
ބިންގާ އަޅުއްވަން ވަޑައިގެންނެވީ މިނިސްޓަރު ހައިދަރު. ވަރަށް ފޮނިކެނޑި. ދެން 18 ވަރަކަށް މަސް ތެރޭގައި މަސައްކަތް ނިންމާނެ ކަމަށް ފޮނިކެނޑި. ދެން މި ޕްރޮޖެކްޓް ލަސްވަމުން ގޮސް ކޮންޓްރެކްޓަރު މަސައްކަތް ދޭނެ ބަޔަކު ނުވެގެން އުޅެނިކޮށް ހިކާވި ކިޔާ ގްރޫޕަކުން މަސައްކަތް ކުރި. އެ ގްރޫޕުން 4.5 މިލިއަން ރުފިޔާގެ މުދާ މިތަނަށް އެމީހުން ގެނައި. އަރުވާފައި މަސައްކަތް ކުރަމުން ގޮސް އެމީހުންނަށް ދޭންޖެހޭ ފައިސާ ނުދީގެން އެމީހުން ބުނީ މަސައްކަތް އިތުރަށް ކުރިއަށް ނުގެންދާނެ ކަމަށް. އެއިރު ޕްރޮޖެކްޓް ހިންގުމަށްޓަކައި 15 ޕަސެންޓް ވިލާކޮޖުން ވަނީ ކޮންޓްރެކްޓަރަށް ދީފައި.ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު
ހަސަން ވިދާޅުވީ މަސައްކަތް ކުރަން އިތުރު ބަޔަކު އަނެއްކާ ވެސް ގެނެސްފައިވާ ކަމަށާއި، ނަމަވެސް ސައިޓުގައި މަސައްކަތު މީހުން ތިބޭނެ ގޮތެއް ހަމަޖެހިފައި ނުވާ ކަމަށާއި، ކެއިން ބުއިމުގެ ކަންތައްތަކެއް އަދި ނިދޭނެ ގޮތެއް ވެސް ހަމަޖެހިފައި ނުވާ ކަމަށެވެ.
ދެން ރައްޔިތުންނަށް އެންމެ ބޮޑަށް ދިމާވި މައްސަލައަކީ، ފުރަތަމަ ބުރުގައި އައި ވިއްސައްވުރެ ގިނަ ސްޓާފުން. ދެން އެބޭފުޅުން ބޮޑުކަމުދިއުމުގެ ކަންތައް ވަލުތެރޭގައި ކުރަނީ. ކުޑަކަމުދަނީ. ދެން ވަލުތެރޭ ހުންނަ ރުއްގަހުގެ ތަކެތި ވެސް ކަނީ. ދެން ރައްޔިތުންގެ ޝަކުވާ ވަރަށް ބޮޑަށް އެކަމާއި ދިމާވި. އެކަމާއި ގުޅިގެން ހަޔަރ އެޑިއުކޭޝަނަށް ލިޔުނިން. ވިލާ ކޮލެޖަށް ވެސް އެންގިން. ކޮންޓްރެކްޓަރަށް ވެސް އެންގިން މިކަން މިހެން ހިނގާ ވާހަކަ. އޭގެ ފަހުން އަނެއްކާ ވެސް ދިމާވި މައްސަލައަކީ ވަލުތެރެއިން ރުކުއަޅާ މައްސަލަ. އެ މައްސަލަ ބަލަމުން ދަނިކޮށް އެއްދުވަހު ދިމާވި 11 މީހުން ވަލުތެރެއިން ރުކުއަޅަނިކޮށް. އެ މައްސަލަ ވެސް އޮންނާނީ ރިޕޯޓް ކޮށްފައި. މިއިން އެއްވެސް ކަމަކަށް ހައްލެއް ނާދޭ.ކެނދިކުޅުދޫ ކައުންސިލްގެ ނައިބު ރައީސް ހަސަން މުހައްމަދު
ހަސަން ވިދާޅުވީ މި ސަރުކާރު އައި ފަހުން މަސައްކަތް އޮތީ އެއްކޮށް ހުއްޓިފައި ކަމަށެވެ. ހަސަން ވިދާޅުވީ ރައްޔިތުންގެ ތެރެއިން ގިނަ ބަޔަކު ދެކެނީ ކޮލެޖުގެ މަސައްކަތް ހުއްޓާލާފައި އޮތީ ގާސިމް ކޮންމެވެސް ފައިދާއެއް ހޯދަން ބޭނުންވާތީ ކަމަށެވެ.
ހަސަން ވިދާޅުވީ ކޮލެޖް އަޅަން ކައުންސިލުން ދީފައިވަނީ 86،000 އަކަފޫޓުގެ ބިމެއް 50 އަހަރަށް ކަމަށެވެ. އަދި ކައުންސިލުން މަސައްކަތް ކުރީ ކޮލެޖަށް ދީފައިވާ ބިމުން އެއްވެސް ފައިސާއެއް ނުނަގައި، ގެސްޓްހައުސް ހިންގުމަށް ދީފައިވާ ބިމުން އަކަފޫޓަކަށް 5 ލާރި ނެގުމަށް ކަމަށެވެ. އަދި ރައްޔިތުންގެ އުއްމީދަކީ ލޯކަލް ޓުއަރިޒަމް ރަށަށް ގެނައުން ކަމަށާއި، އެގޮތުގެ މަތިން ފަތުރުވެރިކަމުގެ ދާއިރާއިން ކޯސް ހިންގަން ކޮލެޖްއަޅަން ބިން ވެސް ހިލޭ ދީފައިވާ ކަމަށެވެ.
