ކުޅުދުއްފުށީގެ ތަރައްޤީއަށް މި ސަރުކާރު ފެއިލްވެއްޖެ, ޕީއެންސީގެ ކެމްޕެއިން ޖަލްސާ ނިމުނީ އެންޓި ކެމްޕޭނުން!
ކުޅުދުއްފުށި ސިޓީގައި ޕީއެންސީން ބޭއްވި ޖަލްސާގައި ސަރުކާރުން އެ ސިޓީއަށް ކޮށްދީފައިވާ ތަރައްޤީގެ މަޝްރޫޢުއެއް ދެއްކުމުގެ ބަދަލުގައި، ފެނިގެންދިޔައީ ކުރީ ސަރުކާރާއި ކައުންސިލަށް ފާޑުކިޔައި އިދިކޮޅު ފަރާތްތަކުގެ ބޮލުގައި އިލްޒާމް އެޅުވި މަންޒަރު. ލާމަރުކަޒީ ނިޒާމު ބަލިކަށިކޮށް ކައުންސިލްތަކުގެ ބާރުތައް ސަރުކާރުން ހިފަހައްޓަމުންދާކަމަށް ބުނެ، މި ޖަލްސާއަކީ ތަރައްޤީގެ ތަޞައްވުރެއް ނެތް ފިތުނަވެރި އަމަލެއްގެ ގޮތުގައި އާންމުން ވަނީ ސިފަކޮށްފަ.
ޕީއެނސީން 6 ފެބްރުއަރީ 2026ގައި ކުޅުދުއްފުށި ސިޓީގަައި ބޭއްވި ޖަލްސާގެ ތެރެއިން | ޕީއެންސީ
ކުރިއަށް އޮތް ލޯކަލް ކައުންސިލް އިންތިޚާބަށް އަމާޒުކޮށް ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ)ން ކުޅުދުއްފުށި ސިޓީގައި 6 ފެބްރުއަރީ 2026 ގައި ބޭއްވި ކެމްޕޭން ލޯންޗުކުރުމުގެ ޖަލްސާގައި، ރަށުގެ ތަރައްޤީގެ ތަޞައްވުރަށްވުރެ ބޮޑަށް ފެނިގެންދިޔައީ އިދިކޮޅު ސިޔާސީ ފަރާތްތަކަށް ބަހުގެ ހަމަލާތައް އަމާޒުކުރުމާއި އެންޓި ކެމްޕޭންގެ ހަރަކާތްތަކެވެ.
ޕީއެންސީގެ އިސް ބޭފުޅުން ބައިވެރިވެވަޑައިގެންނެވި މި ޖަލްސާގައި، ކުޅުދުއްފުށީގެ ތަރައްޤީއަށްޓަކައި ސަރުކާރުން ކުރަމުންދާ ނުވަތަ ކުރަން ގަސްތުކުރާ އެއްވެސް މަސައްކަތެއް ހާމަކޮށްދެވޭ ކަށް ނެތެވެ. ސަރުކާރަށް ދެ އަހަރު ފުރިގެން ދިޔައިރުވެސް، ކުޅުދުއްފުށި ސިޓީގެ ތަރައްޤީއާ ގުޅޭގޮތުން ރައްޔިތުންނަށް ދައްކާލެވޭނެ އެންމެ މަޝްރޫއެއްވެސް ނެތްކަމީ ފާހަގަކޮށްލަންޖެހޭ ހަގީގަތެކެވެ.
ކޮވިޑް-19 ގެ ދަތި ހާލަތުގައިވެސް، ނިމިދިޔަ ސަރުކާރުގެ ފުރަތަމަ ދެ އަހަރު ކުޅުދުއްފުށި ސިޓީގެ ތަރައްޤީއަށްޓަކައި ހިންގި މަޝްރޫއުތަކާ އަޅާކިޔާއިރު، މި ސަރުކާރުގެ ފަރާތުން މި ސިޓީގެ ތަރައްޤީގެ މީޒާނުގައި އެދެވޭ އެއްވެސް ކުރިއެރުމެއް ފެންނާކަށް ނެތެވެ. ދެވެން އޮތީ ހަމަ "ސުމެކެވެ".
އެ ޖަލްސާގައި ފެނިގެންދިޔައީ ކަންކަމުގެ ޒިންމާ އުފުލުމުގެ ބަދަލުގައި، ކުޅުދުއްފުށި ސިޓީ ކައުންސިލާއި ކުރީގެ ސަރުކާރު ކުށްވެރިކޮށް، ރައްޔިތުންނަށް ކަންކަން އޮޅުވާލުމަށް ކުރި މަސައްކަތެވެ. "ކުރީ ސަރުކާރު" ގެ ބަހަނާ ދައްކައިގެން ރައްޔިތުންގެ މެދުގައި ނުބައި ތަޞައްވުރެއް އުފެއްދުމަށް އެރޭވެސް ވަނީ މަސައްކަތް ކޮށްފައެވެ.
ކުޅުދުއްފުށި ސިޓީ ކައުންސިލްގެ އަގުވައްޓާލުމަށް ސަރުކާރުން ކުރަމުންދާ މަސައްކަތްތައް ނާކާމިޔާބުވުމާ ގުޅިގެން، އެކަމުގައި ދައްކާނެ އިތުރު ވާހަކައެއް އެ ފަރާތްތަކަށް މިހާރު ނެތެވެ. ރަށުގެ ތަރައްޤީއަށް އެދެވޭ މަސައްކަތްތަކެއް ކޮށްދެވިފައި ނުވާތީ، އަމިއްލަ ނުކުޅެދުންތެރިކަން ފޮރުވުމަށްޓަކައި އިދިކޮޅު ފަރާތްތަކުގެ ބޮލުގައި ދޮގު އިލްޒާމު އެޅުވުން ފިޔަވައި އިތުރު ކަމެއް، އެރޭ ބޭއްވި ޖަލްސާގައި ބައިވެރިވި ޕީއެންސީގެ އިސްވެރިންނަކަށް ނުކުރެވުނެވެ.
ނަމަވެސް، ސަރުކާރުގެ އިސްވެރިން ޙަޤީޤަތާ ޚިލާފަށް ދައްކަވަމުންދާ ވާހަކަތައް ރައްޔިތުން މިއަދު ބަލައެއް ނުގަނެއެވެ. ލޯކަލް ކައުންސިލް އިންތިޚާބާ ދިމާކޮށް، ކައުންސިލްތަކުގެ ބާރުތައް ސަރުކާރުގެ މުށުތެރެއަށް ޖަމާކޮށް، ލާމަރުކަޒީ ނިޒާމު ބަލިކަށިކުރަމުންދާ މަންޒަރު ކުޅުދުއްފުށީގެ ރައްޔިތުންނަށް މިއަދު ވަރަށް ސާފުކޮށް ހާމަވަމުންދެއެވެ.
ކުޅުދުއްފުށީ ސިޓީގެ ތަރައްޤީގެ އަސްލު ބާނީންނަކީ އަދި އެ މަސައްކަތްތަކުގެ މޭސްތިރިންނަކީ ރައްޔިތުންގެ ފުރިހަމަ އިތުބާރާއެކު އިންތިޚާބުކޮށްފައިވާ ސިޓީ ކައުންސިލްކަން އެއީ މިއަދު އެ ސިޓީގެ ރައްޔިތުން ބަލައިގަންނަ ހަގީގަތެކެވެ. ޕީއެންސީން ބޭއްވި ޖަލްސާއިން ސާފުވެގެންދިޔަ ކަމަކީ މި ސަރުކާރުގެ ފަރާތުން ކުޅުދުއްފުށީގެ ތަރައްޤީއަށް އެދެވޭ މަސައްކަތްތަކެއް ނުކުރެވޭ ކަމެވެ. ފެނިގެންދިޔައީ ހަމައެކަނި ފިތުނަވެރިކަމާއި ނޭދެވޭ ސިޔާސީ ހަރަކާތްތަކަށް އިސްކަންދޭ މަންޒަރު ކަމެވެ.
