ށ.ފޯކައިދޫގެ ހުކުރު މިސްކިތް ތަޅާލާ މަލްޓިޕަރޕަސް ހޯލުގައި ނަމާދު ކުރަން ރައްޔިތުންނަށް ޖެއްސުން ނޫނީ މި ސަރުކާރުން އެ ރަށަށް ކޮށްދެވުނު ކަމެއް ނެތް: ކައުންސިލް ރައީސް
ށ. ފޯކައިދޫގައި ބޭއްވި ޖަލްސާއެއްގައި އެ ރަށު ކައުންސިލްގެ ރައީސް އަހުމަދު އާސިފް ވިދާޅުވީ، މިހާރުގެ ސަރުކާރުން އެ ރަށުގެ މިސްކިތް ތަޅާލައި، ރައްޔިތުންނަށް ދަތިތަކާ ކުރިމަތިލާން ޖައްސާފައިވާ ކަމަށް. ކުރީގެ ސަރުކާރުން ރަށުގެ ތަރައްޤީއަށް ކޮށްދިން މަސައްކަތްތަކުގެ މަތިން ހަނދާންކުރަން ޖެހޭ ކަމަށް އާސިފް ވިދާޅުވި.
ށ.ފޯކައިދޫ ކައުންސިލް ރައީސް އަހުމަދު އާސިފް | އެމްޑީޕީ
ށ.ފޯކައިދޫގެ ހުކުރު މިސްކިތް ތަޅާލާ މަލްޓިޕަރޕަސް ހޯލުގައި ނަމާދު ކުރަން ރައްޔިތުންނަށް ޖެއްސުން ނޫނީ މި ސަރުކާރުން އެ ރަށަށް ކޮށްދެވުނު ކަމެއް ނެތް ކަމަށް ފޯކައިދޫ ކައުންސިލް ރައީސް އަހުމަދު އާސިފް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ށ.ފޯކައިދޫގައި ހޮނިހިރު ދުވަހުގެ ރޭ ބޭއްވި ހޭވައްލާ ތައްޔާރު ކެމްޕެއިން ޖަލްސާގައި ވާހަަކަދައްކަވަމުންނެވެ.
އޭނާ ވިދަޅުވީ ކައުންސިލްތައް ބާކީކޮށް އެެއީ ބޭނުމެއް ނެތްތަނެއްކަން ދެއްކުމަށް މި ސަރުކާރަށް ކުރެވުނުހާ މަސައްކަތެއް ކުރަމުންދާ ކަމަށެވެ. ރައްޔިތުންގެ ތަރައްޤީ އަށްޓަކާ އަދި ކުރިމަގަށްޓަކާ އެމްޑީޕީ އަށް ވޯޓުދޭން ޖެހޭ ކަމަށް އޭނާ ވިދާޅުވި އެވެ. މި ސަރުކާރަކީ ތަރައްޤީ ގެނެވޭނެ ސަރުކާރެއް ނޫންކަން މިހާތަނަށް ވެސް ފެންނަމުންދާ ކަަމަށް އޭނާ ވިދާޅުވި އެވެ.
"އެވެރިންގެ ތެރޭގައި ބޭނުން ކުރާ އިބާރާތެއް އޮވޭ. ތަރައްޤީ ގެނެވޭނީ ސަރުކާރަށޭ. މި އިބާރާތް ބަދަލުކުރަން ޖެހޭ. މި ވެރިކަން ދެ ބައި ވި އިރު ކޮން ކަމެއްތޯ ކުރެވުނީ." އޭނާ ވިދާޅުވި އެވެ.
ށ.ފޯކައިދޫ އެކަހެރިކޮށް ބާކީކޮށްލާފައި ވަނިކޮށް އެކަން ނިމުމަކަށް ގެނެސް އެ ރަށަށް ތަރައްޤީ ބަންޑުން ކޮށްދެއްވީ ކުރީގެ ރައީސް އިބްރާހިމް މުހައްމަދު ސޯލިހު ކަމަށް އޭނާ ވިދާޅުވި އެވެ. އޭނާ ވަނީ ކުރިން އެ ރަށް އޮތް ހާލު ހަނދާން ވޭތޯ ސުވާލު ކުރައްވާފަ އެވެ. ރައީސް ސޯލިހުގެ ވެރިކަމުގެ ކުރިން އެ ރަށުގައި އެތައް ކަމެއް ދަތިކޮށް ހުރުމުން އާއްމުން އައީ ކުރިން ސަރުކާރުތަކުގައި ވެސް އެކަންކަން ހައްލުކޮށްދިނުމަށް އެދެމުންކަން ކައުންސިލް ރައީސް ވަނީ ފާހަގަކުރައްވާފަ އެވެ. ނަމަވެސް ރައްޔިތުންގެ ކަންބޮޑުވުންތަކަށް ހައްލު ހޯދާދެއްވީ ކުރީގެ ރައީސް ސޯލިހުކަމަށް އޭނާ ވިދާޅުވި އެވެ.
އެ ރަށުގެ ފެނާއި ނަރުދަމާގެ ހާލަތު ގޯސްވެފައި ވަނިކޮށް އެ ރަށުގެ ރައްޔިތުންނަށް ހައްގު މިންވަރަކީ ނަޖިސް ފެނުން ފެންވެރުން ނޫންކަމަށް ޤަބޫލުކުރައްވާ ނަރުދަމާ އާއި ސާފު ފެނުގެ ނިޒާމެއް ޤާއިމްކޮށްދެއްވީ ވެސް ރައީސް ސޯލިިހުގެ ވެރިކަމުގައި ކަމަށް އޭނާ ވިދާޅުވި އެވެ.
ރަށުގެ ބަނދަރުގެ ދަތިކަން ދިމާވެފައި ވަނިކޮށް ބަނދަރު ރަނގަޅު ފެންވަރަކަށް ހައްދަވައިދެއްވީ ވެސް ރައީސް ސޯލިހު ކަމަށް އޭނާ ވަނީ ވިދާޅުވެފަ އެވެ.
"ހަނދާން އެބަ ހުރިތޯ ލަފާ ފުރޭނެ ގޮތެއް ނެތި ރަށު ބަންދުގައި ތިބި ހަނދާން. ހުޅަނގުގެ ކޮޅިގަނޑުތަކުގެ ތެރޭގައި ފުރާނަ އަތްމައްޗަށް ލައިގެން ގަދަ ފަޅުގައި މިދަލުގެ ރައްކާތެރިކަމެއް ނެތި ބަނދަރުމަތީ ދެކޮޅަށް ހިނގަން ޖެހުނު މާޒީ ހަނދާން އެބަ ހުރިތޯ؟" އޭނާ ވިދާޅުވި އެވެ.
މީގެ އިތުރުން ރަށު މެދުގައި ހުރި ދުނބުޅި ބަދިގެ އެއް ފަދަ އިންޖީނުގޭގެ ބަދަލުގައި އާ އިންޖީނުގެ އެއް ާއިމްކޮށްދެއްވުމާއި ސްކޫލުގެ ޖާގައިގެ ދަތިކަން ހައްލުކޮށްދެއްވީ ވެސް ރައީސް ސޯލިހު ކަމަށް އޭނާ ވަނީ ވިދާޅުވެފަ އެވެ.
