ޕާކިސްތާނުގެ މިސްކިތެއްގައި ބާރުގަދަ އެއްޗެއް ގޮއްވާލައިފި

ޕާކިސްތާނުގެ ވެރިރަށް އިސްލާމްއާބާދުގައި ހުންނަ މިސްކިތެއްގައި ހުކުރު ނަމާދުގެ ވަގުތު ބާރުގަދަ އެއްޗެއް ގޮވައިފިއެވެ.

މި ހާދިސާ ހިނގާފައިވަނީ އިސްލާމްއާބާދުގެ އިރުދެކުނު ސަރަހައްދެއް ކަމަށްވާ ތަރްލާއީ ގައި ހުންނަ ޚަދީޖަތުލް ކުބްރާ މިސްކިތުގައި، މިއަދުގެ ހުކުރު ނަމާދު ވަގުތުގަ އެވެ.

މި ގޮވުމާ ގުޅިގެން ރެސްކިއު ޓީމުތަކުން މިހާރު ދަނީ އެ ސަރަހައްދުގައި ހަރަކާތްތެރިވަމުންނެވެ.

މި ހާދިސާގައި ލިބުނު ގެއްލުންތަކުގެ ތަފުސީލެއް އަދި ރަސްމީ ފަރާތްތަކުން ހާމަ ކޮށްފައި ނުވި ނަމަވެސް، ގިނަ އަދަދެއްގެ ބަޔަކު މަރުވެފައިވާނެ ކަމުގެ ބިރު ވަނީ ހީވެފަ އެވެ.

އަލް ޖަޒީރާ އިން ރިޕޯޓު ކޮށްފައިވާ ގޮތުގައި ހާދިސާ ގައި މަދުވެގެން 31 މީހުން ވަނީ މަރުވެފަ އެވެ.

މިދިޔަ އަހަރުގެ ނޮވެމްބަރު މަހުގެ ތެރޭގައި ވެސް އިސްލާމްއާބާދުގެ ޑިސްޓްރިކްޓް ޖުޑީޝަލް ކޮމްޕްލެކްސްގެ ދޮރުމަތީގައި އަމިއްލައަށް މަރުވެގެން ދިން ބޮމުގެ ހަމަލާއެއްގައި މަދުވެގެން 12 މީހުން މަރުވެ، ގިނަ ބަޔަކު ޒަޚަމްވެފައިވެ އެވެ.