ފަލަސްތީނުގެ ޤައުމީ މަޖިލީހަށް މެމްބަރުން ހޮވަން ބާއްވާ ތާރީޚީ އިންތިޚާބު ނޮވެމްބަރު އެއް ވަނަ ދުވަހު ބާއްވަނީ

ފަލަސްތީނުގެ ޤައުމީ މަޖިލީހަށް މެމްބަރުން އިންތިޚާބު ކުރުމަށް ބާއްވާ އިންތިޚާބު، މިއަހަރުގެ ނޮވެމްބަރު މަހުގެ އެއް ވަނަ ދުވަހު ބާއްވަން ނިންމާފައިވާ ކަމަށް، ފަލަސްތީނުގެ ރައީސް މަހުމޫދު އައްބާސް ވިދާޅުވެއްްޖެ އެވެ. 

ހޯމަ ދުވަހު މިކަން ހާމަ ކޮށްފައި ވަނީ ފަލަސްތީނުގެ ރަސްމީ ނޫސް އެޖެންސީ ވަފާ އިންނެވެ. 

މިއީ ރައްޔިތުންގެ ސީދާ ވޯޓަކުން މި މަޖިލީހަށް މެމްބަރުން އިންތިޚާބު ކުރާނެ ފުރަތަމަ ފަހަރެވެ. އެހެންކަމުން މިއީ ތާރީޚީ ގޮތުން ވަރަށް ޚާއްސަ އިންތިޚާބަކަށް ވެސް ވެގެންދާނެ އެވެ. މީގެ ކުރިން މި މަޖިލީހުގެ މެމްބަރުން އައްޔަން ކޮށްފައި ވަނީ، ފަލަސްތީނުގެ ހަރަކާތުގެ ތެރެއިންނެވެ.

ފަލަސްތީން އޮތޯރިޓީގެ ރައީސް އަދި ފަލަސްތީން މިނިވަން ކުރުމުގެ ޖަމާއަތުގެ ރައީސްގެ ހައިސިއްޔަތުން އައްބާސް ނެރުއްވި ބަޔާނުގައި ވިދާޅުވެފައި ވަނީ، ފަލަސްތީނުގެ އެތެރޭގައި އަދި ބޭރުގައި ވެސް ފުރުސަތު އޮތް ހުރިހާ ތަނެއްގައި އިންތިޚާބު ބާއްވާނެ ކަމަށެވެ. މިގޮތުން ފަލަސްތީން ރައްޔިތުން ދިރިއުޅޭ ހުރިހާ ތަން ތަނެއްގައި އެންމެ ފުޅާ ދާއިރާއެއްގައި ބައިވެރިވުން ކަށަވަރު ކުރުމަށް އެ ގޮތަށް ނިންމަވާފައިވާ ކަމަށް އައްބާސް ވިދާޅުވި އެވެ. 

ފަލަސްތީނުގެ ޤައުމީ މަޖިލީހަކީ ދިގު މުއްދަތެއް ވަންދެން ފަލަސްތީނުގެ މިނިވަން ކުރުމުގެ ޖަމާއަތުގެ ދަށުން ޕާލަމެންޓެއްގެ ގޮތުގައިި މަސައްކަތް ކުރަމުން އަންނަ މަޖިލީހެކެވެ. މި މަޖިލީހުގެ އެންމެ ބާރު ގަދަ ބާރު އޮތީ އައްބާސްގެ ސިޔާސީ ޙަރަކާތް ކަމަށްވާ ފަތަޙް ޕާޓީގެ އަތުގަ އެވެ. ފަތަޙް ޕާޓީ އުފެއްދުމުގައި ބައިވެރިވެ ވަޑައިގެންނެވި ފަލަސްޠީނުގެ ތާރީޚީ ލީޑަރު ޔާސިރު އަރަފާތު އަވަހާރަވެފައި ވަނީ 2004 ވަނަ އަހަރުގެ ތެރޭގަ އެވެ.

ފަލަސްތީނުގެ ހައްގުގައި މަސައްކަތް ކުރަމުން އަންނަ ހަމާސް ޖަމާއަތާއި، ފަލަސްތީން އިސްލާމިކް ޖިހާދަކީ ފަލަސްތީން މިިނިވަން ކުރުމުގެ ޖަމާއަތުގެ މެމްބަރުން ނޫން ކަމުން، އެ ޖަމާއަތްތައް މި މަޖިލީހުގައި ތަމްސީލެއް ނުވެ އެވެ. 

މި އިންތިޚާބު އިއުލާން ކުރުމަކީ ފަލަސްތީނުގެ ސިޔާސީ މަސްރަހުގައި މުހިންމު ބަދަލެއް ގެނައުމަށް ކުރާ މަސައްކަތެއްގެ ގޮތުގައި ބައެއް ބައިވެރިން ދެކެމުން އަންނަ ކަމަށް ރިޕޯޓުތައް ބުނެ އެވެ. އެހެން ނަމަވެސް، ފަލަސްތީނުގެ އެކި ސިޔާސީ ޖަމާއަތް ތަކުގެ މެދުގައި އޮންނަ ބައިބައިވުންތަކާ ހެދި މި އިންތިޚާބު ކާމިޔާބު ކުރުމަށް ގިނަ ގޮންޖެހުން ތަކެއް ކުރިމަތި ވެދާނެ ކަމަށް ވެސް ބައެއް ބައިވެރިން ފާހަގަ ކުރެ އެވެ.