ހަގީގަތް ހާމަ ކުރާތީ ޕީއެންސީ ތަމްސީލުކުރާ މަޖީލީސް މެންބަރުން، ދާއިރާގެ ސަރުކާރު މުވައްޒަފުންނަށް ބިރުދައްކަނީ

ކުރިއަށް އޮތް ލޯކަލް ކައުންސިލް އިންތިޚާބު ބޯމަތިވަމުން އަންނައިރު، ރާއްޖޭގެ އެކި ކަންކޮޅުތަކުގައި ތިބި ސަރުކާރު މުވައްޒަފުންނަށް ބިރުދައްކައި، ނުފޫޒު ފޯރުވުމުގެ އަމަލުތައް, ވެރިކަން ކުރާ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ މަޖިލިސް މެންބަރުން އިތުރުކޮށްފިއެވެ.

މިގޮތުން ސަރުކާރުގެ ސިޔާސަތުތަކާ މެދު ނުވަތަ ރަށުގެ ތަރައްޤީއަށް ހުރަސްއެޅޭ ގޮތަށް ހިންގާ ކަންކަމާ މެދު ކަންބޮޑުވުން ފާޅުކުރާ މުވައްޒަފުންނަށް އަމާޒުކޮށް، "ވަޒީފާ ދުއްވާލާނެ" ކަމުގެ އިންޒާރު ޕީއެންސީގެ މަޖިލީސް މެންބަރުން ދަނީ އެ މުވައްޒަފުންނަށް ދެމުންނެވެ.

މީގެ ތެރޭގައި، ސިޔާސީ ގޮތުން ފިކުރު ތަފާތުވާ މުވައްޒަފުން އެކަހެރިކުރުމުގެ ގޮތުން، އެ މީހުން ދިރިއުޅޭ ރަށް ނޫން އެހެން ރަށްރަށަށް އަރުވާލުން ނުވަތަ ވަޒީފާ ބަދަލުކުރުން މިހާރު ވަނީ އާންމު ކަމަކަށް ވެފަ އެވެ.

މަޖިލީސް މެންބަރުން ހިންގާ މިފަދަ ނާތަހުޒީބީ އަމަލުތަކުގެ ސަބަބުން ރައްޔިތުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާއިރު, ޚާއްޞަކޮށް، ރަށްރަށުގެ ތަރައްޤީ އަށް ސަރުކާރުން ހުރަސްއަޅަމުންދާ ކަމަށް ބުނެ އާންމުން ފާޅުކުރާ ޝުޢޫރުތައް ހުއްޓުވުމަށް މަސައްކަތް ކުރުމަކީ، ބަސްބުނުމުގެ މިނިވަންކަން ނިގުޅައިގަތުން ކަމަށް ޤަބޫލުކުރެވެއެވެ.

މި ކަންކަމުން ސާބިތުވަނީ، ރައްޔިތުން ސަރުކާރާ ދެކޮޅަށް ދައްކާ ހަޤީޤީ ވާހަކަތަކާއި، ކުރާ ޝަކުވާތައް ބަލައިގަތުމުގެ ޤާބިލުކަން ސަރުކާރުގެ ކިބައިގައި ނެތް ކަމެވެ. އަދި އިންތިޚާބާ ދިމާކޮށް ރައްޔިތުންގެ އަނގަ ބަންދުކުރުމަށްޓަކައި ބިރުދެއްކުމުގެ ސަގާފަތެއް އަލުން އިއާދަވަމުންދާކަން މިކަމުން ހާމަވެ އެވެ.

މިކަމުގެ ސަބަބުން، ދައުލަތުގެ މުވައްޒަފުންނަށް އެ ފަރާތްތަކުގެ އާއިލާ އާއި ދުރުގައި މަސައްކަތް ކުރުމަށް މަޖުބޫރުވެ, ބިރުވެރިކަމެއްގެ ތެރޭގައި ބައިތިއްބާ, ސަރުކާރުން ހިންގާ މި ލާއިންސާނީ އަމަލުތަކަކީ ޑިމޮކްރެޓިކް ނިޒާމެއްގައި ރައްޔިތުންނަށް ލިބިދީފައިވާ އަސާސީ ޙައްޤުތަކަށް އަރައިގަތުން ނޫން ކަމަކަށް ފާހަގައެއް ނުވެއެވެ.

ރައްޔިތުންގެ މަޖިލިސްގެ މެންބަރުންނަކީ، އެމީހެއްގެ ދާއިރާގެ ރައްޔިތުން ވޯޓުލައިގެން ކޮންމެ ފަސް އަހަރަކުން އެއް އަހަރަކު ހޮވާ ބަޔަކަށް ވާއިރު, ޑިމޮކްރެސީއެއްގައި، މަޖިލީހުގައި މެންބަރު ތަމުސީލުކުރަން ވާނީ، އެމީހެއްގެ ދާއިރާގެ ގިނަ މީހުންނަށް ފެންނަ ގޮތަކަށެވެ. ނަމަވެސް، މިހާރު ފެންނަމުންދާ މަންޒަރަކީ ރައްޔިތުންގެ މަންދޫބުންގެ ގޮތުގައި ތިއްބެވި ޕީއެންސީގެ މެންބަރުން، ރައްޔިތުންގެ ހައްގުގައި ވަކާލާތު ކުރުމުގެ ބަދަލުގައި، ސަރުކާރުގެ ނުފޫޒު ފެތުރުމަށް މުވައްޒަފުންނަށް ބިރުދައްކާ ހަތިޔާރަކަށް ވެފައިވާ ހިތި މަންޒަރެވެ.