މަގާމަށް ކުފޫ ހަމަނުވާ މީހުން ލައިގެން ގައުމު ހިންގަން އުޅުމުން އެ ލިބޭ ގެއްލުމަށް ޒިންމާ ނަގާނީ ކާކު ހެއްޔެވެ؟

ރައީސް މުއިއްޒުގެ ވެރިކަމުގެ ފުރަތަމަ 2 އަހަރު ތެރޭ ވަނީ އެތަށް ރެކޯޑެއް ގާއިމް ކޮށްފަ އެވެ. ނަމަވެސް ހިތާމަ އަކީ ރައްޔިތަކަށް ފައިދާ އެއް ވާފަދަ އެއްވެސް ރެކޯޑެއް ހެދިފަ ނެތްކަމެވެ. ދުވަހެއް ދުވަހަކަށް ދިވެހި ރައްޔިތުންނަށް ހާމަ ވެގެންދަނީ ރައީސް މުއިއްޒުގެ ސަރުކާރުގެ ޚާރިޖީ އަދި އިގްތިސާދީ ސިޔާސާތުތަށް މުޅިން ފެއިލް ވެ، ރާއްޖޭގެ އިގްތިސާދު ރެކޯޑް މިންވަރަކަށް ދަށަށްދާ މަންޒަރެވެ.

ބައިނަލްއަގްވާމީ މަސްރަހުގައި މީގެ އެތައް ޒާމާނެއް ކުރިން ދިވެހި ދައުލަތް ހޯދައިފައިވާ އިތުބާރު، މި ވެރިކަމުގައި މިވަނީ ވެއްޔާ މޮޑެލާފަ އެވެ. އިންވެސްޓަރުންގެ އިތުބާރު ގެއްލި، މިއަދު ރާއްޖޭގައި ތަރައްގީގެ މަޝްރޫއެއް ހިންގަން، ބައި ސެންޓް ދިއްކޮށްލާނެ ގައުމެއް ނުވަތަ ބައިނަލްއަގުވާމީ މާލީ އިދާރާ އެއް ވެސް ނެތެވެ. ނަމަވެސް ރިޔާސީ އިންތިހާބުގެ ކެމްޕެއިން ތެރޭ ރައީސް މުއިއްޒު ވިދާޅުވީ، ގައުމުގެ އިގްތިސާދީ ހާލަތު ކިތަންމެ ދަށުގައި އޮތަސް ބާރު ސްޕީޑް ގައި މުޅި ރާއްޖޭ ބަދަލުކޮށްލާނެ ޕްރޮޖެކްޓް ހިންގުމަށް ބޭނުންވާ ފައިސާ ވެސް ހަމަޖެހިފައިވާ ކަމުގަ އެވެ. 

ރައީސް މުއިއްޒު ގެ ޒައާމަތުގައި ބަހާ އަމަލާ ދިމާ ނުވާކަމީ، މިއަދު ދިވެހި ހުރިހާ ރައްޔިތުން ވެސް އެއްވެސް ޝައްކެއްނެތް މިންވަރަށް ގަބޫލުކުރާ ހަގީގަތެކެވެ. ކެމްޕެއިން ތެރޭގައި ރައީސް މުއިއްޒު ދޮގުން އެޅި ގަނޑުވަރުތައް، ވެރިކަމަށް ވަޑައިގަތް ފަހުން ފުނޑުފުނޑުވާން ފެށުމުން ދެން ކުރަން ފެށީ މާ ނުރައްކާތެރި ކަންތައް ތަކެކެވެ. ގާނޫނުތަށް ކޮށާ މަށައިގެން، ރައްޔިތުންނަށް އޮޅުވާލާ، ހީލަތްތެރި ތެރި ގޮތަކަށް ފައިސާ ޗާޕުކޮށް ނުވިތާކަށް މީގެ ކުރިން އެންމެ ފައިދާ ވަމުން ދިޔަ ދައުލަތުގެ ކުންފުނިތަށް ވެސް "ފެލަން" ފެށީ އެވެ. ހުރިހާ ބާރެއް މުށުތެރެޔަށް ލައިގެން ގައުމަކަށް ރައްޔިތަކަށް ވާނެ ގެއްލުމަކަށް ބެލުމެއް ނެތި ހިތުހުރި ގޮތަކަށް ކަންކަން ކުރަނީ އެވެ. 

މިހާ ހިސާބަށް ކަން ކަން ދާން ވީ ކީއްވެގެންތޯ؟ މައިގަނޑު ސަބަބެއް ކަމަށް އެންމެ ގިނަ ބަޔަކު ފާހަގަކުރަނީ ސަރުކާރުގެ ފުރަތަމަ ދުވަހުން ފެށިގެން ކުފޫ ހަމަނުވާ މީހުން ދައުލަތުގެ ޒިންމާދާރު މަގާމުތަކަށް ރައީސް މުއިއްޒު އައްޔަނު ކުރެއްވުމެވެ. ރައީސް މުއިއްޒުގެ ފުރަތަމަ ޓޫރިޒަމް މިނިސްޓަރު ގެ ސަބަބުން ބައިނަލްއަގުވާމީ މައިދާނުގައި ދިވެހީން ގަންނަން ޖެހުނު ލަދު އަދި ދިވެހީން ހަނދާނެއް ނުނެތޭނެ އެވެ. ރައީށް މުއިއްޒު ގައުމުތަކަށް ކަނޑައަޅާފައިވާ ބައެއް ސަފީރުންނަށް ޑިޕްލޮމެސީ ގެ އަލިފެއް ބާ އެއް ނޭނގޭކަން އެބައިމީހުންގެ އަމަލުތަކުން ފެނެ އެވެ. ދޭދޭ ގައުމުތަކުގެ މެދުގަ ކަންކަން ހައްލުކުރަން، "ކަންމަތީ އާންޓީސް" ގެ ސްޓައިލް ކަމުނުދާކަން ހަމަ އެބޭފުޅުންނަށް ނޭނގެނީ ބާވަ އެވެ. އާޚިރުގައި ހުރިހާ ލަދެއް ގަންނަން މި ޖެހެނީ ދިވެހި ރައްޔިތުންނެވެ. 

ދެން އޮތީ އިކޮނޮމިކް މިނިސްޓަރު ގެ ވާހަކަ އެވެ. ބަންކަރިންގ އިން އަހަރަކަށް ހޯދާނެ ކަމަށް ވިދާޅުވި 400 މިލިއަން ޑޮލަރު ދިޔަތަނެއް އެނގޭ މީހަކު މި އުޑު ދަށުގައެއް ނެތެވެ. ތިރިވާނެ ކަމަށް ބުނި ޑޮލަރުގެ ރޭޓު އޮތީ، އެކަކު އަނެކަކު ކޮނޑަށް އަރައިގެން ވެސް އަތްފޯރާ ހިސާބަށް ވުރެ ވެސް މަތީގަ އެވެ. މުޅި ރާއްޖޭގައި ހިންގަން ބުނި ތަރައްގީގެ ޕްރޮޖެކްޓްތައް އަދި އޮތީ ކުލަވާނެ ކަމުގެ އުއްމީދެއް ނުވާ ހުވަފެންތަކެއްގެ ގޮތުގަ އެވެ. މި ވަރުން އަދި ފުދުނީކީ ނޫނެވެ. މިހުރިހާ ގެއްލުމެއް ރައްޔިތުންނަށް ދިނުމަށް ފަހު، މިހާރު އެބޭފުޅާ ކަންތައް ކުރައްވާ ގޮތުން ބޭރު ގައުމުތަކަށް ގޮސް ދިވެހިންގެ އައިޑެންޓިޓީ ހާމަކުރަން ވެސް ލަދު ގަނެ އެވެ. 

ދާދި ފަހުން ސްވިޒަލެންޑް ގައި ބޭއްވި ވޯލްޑް އިކޮނޮމިކް ފޯރަމްގެ ހަވާސާގެ ތެރެއިން ރައީސް މުއިއްޒުގެ އިކޮނޮމިކް މިނިސްޓަރ މުހައްމަދު ސައީދު، ބައިނަލްއަޤުވާމީ މީޑިއާ އަކަށް ދެއްވި އިންޓަރވިއު އަކާ ގުޅިގެން އެތައް ބައެއްގެ ފާޑުކިޔުން ވަނީ އަމާޒުވެފަ އެވެ. މި އިންޓަވިއުގެ ވީޑިއޯ އަށް ކޮމެންޓް ކުރި ބައެއް ފަރާތްތަކުން ބުނީ ގްރޭޑް 5 ގެ ދަރިވަރަކު ވެސް ސައީދު އަށް ވުރެ ރަނޅަށް އިންޓަވިއު ދޭނެ ކަމުގަ އެވެ.

ބޭރުގެ ނޫސްވެރިޔަކު ސައީދު އާއި ކުރި ސުވާލަކީ ޖޯގްރަފީ ގޮތުން ދުނިޔޭގެ އެންމެ ބޮޑު އެއް އިގްތިސާދު ކަމަށްވާ އިންޑިޔާ ގެ ކައިރީގައި ރާއްޖެ އޮތުމުގެ ސަބަބުން، އިންވެސްޓަރުންގެ މަންޒިލެއްގެ ގޮތުގައި ރާއްޖެ އާއި ދެތެރޭ ދެކޭ ގޮތް ހާމަ ކުރުމަށެވެ. ހާއްސަ ކޮށް މިއަދުގެ ދުނިޔޭގައި ޖިއޯޕޮލިޓިކަލް އަދި ޖިއޮގްރަފީ ގޮތުން ރާއްޖޭގެ މުހިންމުކަމާ ބެހޭ ގޮތުންނެވެ. ނަމަވެސް ސައީދު ދެއްވި ޖަވާބުން، އެ ސުވާލު ސައީދަށް ފަހުމް ވިއެކޭ ނުބުނެވޭނެ އެވެ. ސައީދު ގެ ޖަވާބަކަށް ވީ ދުނިޔެ ސްޓްރެސް ވީމަ އެންމެން ވެސް ރާއްޖެ އައުމުން ހައްލު ލިބޭނެ ކަމުގެ ވާހަކަ އެވެ. އިންޑިއާ އަކީ ރާއްޖޭގެ ބެސްޓް ފްރެންޑް ކަމާ، އިންޑިޔާގެ މެދުފަންތީގެ މީހުންގެ ދިރުއުޅުމުގެ ކަންކަން ކުރިއަރާ ވާހަކަ އެވެ. ދެން ދެއްކެވި ވާހަކަ އަކީ ރާއްޖެ އަށް އަވިދޭ ވާހަކަ އާއި، ރީތި ގޮނޑުދޮއްތައް ހުންނަ ވާހަކަ އާއި ޔޫރަޕަށް ފައިބާ ސުނޯ ވާހަކަ އެެވެ.

ސޯޝަލް މީޑިއާގައި ޚިޔާލު ފާޅުކޮށްފައިވާ ގިނަ މީހުން ގަބޫލުކުރާ ގޮތުގައި މިއީ ރާއްޖޭގެ އިގްތިސާދީ  ވަޒީރުގެ ހުންނަން ޖެހޭ ފެންވަރެއް ނޫނެވެ. އިގްތިސާދީ ވުޒާރާ އަކީ ޚާރިޖީ ވުޒާރާ  ނެގުމަށްފަހު ދުނިޔޭގެ އެކި ޤައުމުތަކާ އެންމެ ބޮޑަށް ގުޅިފައިވާ ވުޒާރާ އަށްވާއިރު، އެ ވުޒާރާއާ ހަވާލުވެވަޑައިގެން ހުންނަވާ ބޭފުޅެއްގެ ތައުލީމީ ފެންވަރު އެއަށްވުރެ ރަނގަޅުވާން ޖެހޭނެ ކަމަށް ގިނަ ބަޔަކު ބުނެ އެވެ. އެގޮތުން، ބައެއް މީހުން ވަނީ އެ މީހުންގެ ކުޑަ ދަރިން އިނގިރޭސިން ވާހަކަދައްކާ ގޮތާއި ސައީދު ވާހަކަފުޅާ އަޅާކިޔާފަ އެވެ.

 މިލިއަނުން ހަރަދު ކޮށްގެން ބޭރު ގައުމުތަކަށް ކުރާ ދަތުރުތަކުން ދިވެހި ގައުމަށް އެއްވެސް ފައިދާ އެއް ނުވަނީ، ރަނގަޅަށް މުއާމަލާތްކުރަން ވެސް ނޭނގޭ ނާގާބިލު މީހަކު އިގްތިސާދީ ވަޒީރުކަމުގައި ހުންނެވުން ކަމަށް ވެސް ގިނަ ފަރާތްތަކަކުން ފާހަގަ ކުރެ އެވެ. ކުރާނެ ކަމެއް ނެތެވެ. މަގާމުތަކަށް ކުފޫ ހަމަނުވާ ނާގާބިލު މީހުން ލައިގެން ރައީސް މުއިއްޒު ގައުމު ހިންގަވާތީ ހުރިހާ ގެއްލުމެއް ވަނީ ދިވެހި ގައުމަށެވެ. ދިވެހި ރައްޔިތުންނަށެވެ.