ލާމަރުކަޒީ ނިޒާމުގެ ބާރުތައް ނަގަނީ ސަރުކާރަށް ވުރެ ބޮޑަށް ކައުންސިލްތަކުން މަޝްރޫއުތައް ހިންގާތީ: ކެނދިކުޅުދޫ ކައުންސިލްގެ ރައީސް ރައޫފް
ސަރުކާރުން ކުރިއަށްގެންދާ ކުދި މަޝްރޫއުތަކަށްވުރެ ކައުންސިލުން ހިންގާ ބޮޑެތި މަސައްކަތްތައް ރައްޔިތުންނަށް ފެންނާތީ، ލާމަރުކަޒީ ނިޒާމުގެ ބާރުތައް ކަނޑުވާލަން ސަރުކާރުން މަސައްކަތް ކުރާ ކަމަށް އޭނާ ތުހުމަތު ކުރެއްވި. އަދި ލާމަރުކަޒީ ނިޒާމު ފުރިހަމައަށް ތަންފީޒުކޮށް، ރައްޔިތުން ބޭނުންވާ ގޮތަށް ކަންކަން ކުރުމުގެ ފުރުސަތު ދެނީ ހަމައެކަނި އެމްޑީޕީން ކަމަށްވެސް ރައޫފް ވިދާޅުވި.
ފަށާއިރު ޕްރޮގްރާމްގައި ނ. ކެނދިކުޅުދޫ ކައުންސިލްގެ ރައީސް ރައޫފް ވާހަކަ ދައްކަވަނީ | ރާއްޖެއެމްވީ
ރައީސް ޑރ.މުހައްމަދު މުއިއްޒުގެ ސަރުކާރުން ލާމަރުކަޒީ ނިޒާމުގެ ބާރުތައް ނަގަނީ ސަރުކާރަށް ވުރެ ބޮޑަށް ކައުންސިލްތަކުން ރަށްރަށުގައި ކަންކަން ތަންފީޒު ކޮށް މަޝްރޫއުތައް ކުރިއަށް ގެންދާތީ ކަމަށް ނ. ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވެއްޖެ އެވެ.
ހުކުރު ދުވަހުގެ ފަށާއިރު ޕްރޮގްރާމްގައި ރައޫފް ވަނީ އެރަށުގެ ތަރައްގީއާ ގުޅޭގޮތުން ވާހަކަ ދައްކަވާފަ އެވެ. ރައޫފް ވިދާޅުވީ އެމްޑީޕީގެ ދެ ވެރިކަމުގައި އެރަށުގައި ތަރައްގީގެ މަޝްރޫއުތައް ކުރިއަށް ގެންދިޔަ ކަމަށެވެ.
އެގޮތުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މިސްކިތް، އިންޖީނުގޭގެ އައު އިމާރާތް، ފުޓްބޯޅަ ދަނޑެއް ތަރައްގީކޮށް ނިންމި ކަމަށް އޭނާ ވިދާޅުވި އެވެ. ރައޫފް ވިދާޅުވީ ވެރިކަން ބަދަލުވެގެން ދިޔައިރު، ޖޫނިއަރ ކޮލެޖާއި، ހޮސްޕިޓަލް ގެ މަސައްކަތް ކުރިއަށް ގެންދިޔަ ކަމަށާއި، މަގުތައް ޒަމާނީ ފެންވަރަށް ތަރައްގީ ކުރުމާއި، ބަނދަރު ބޮޑު ކުރުމުގެ މަޝްރޫއު ކުރިއަށް ގެންދިޔަ ކަމަށެވެ. އަދި ސްކޫލުގެ ތިން ބުރީގެ އިމާރާތުގެ ބޮޑު ބައެއް ނިމިފައިވާ ކަމަށާއި، ނަރުދަމާ ނިޒާމުގެ 90 އިންސައްތަ ނިމިފައިވާ ކަމަށް އޭނާ ވިދާޅުވި އެވެ.
ނަމަވެސް ސަރުކާރު ބަދަލުވެގެން ދިއުމާއެކު މަސައްކަތްތައް ދާން ޖެހޭ ބާރު ސްޕީޑްގައި ކުރިއަށް ނުދާ ކަމަށް ރައޫފް ވިދާޅުވި އެވެ. ރައޫފް ވިދާޅުވީ މިސަރުކާރުން އެރަށުގައި ކުރިއަށް ގެންދާ މަޝްރޫއަކީ ކުޑަ ކުދީންގެ ޕާކެއް ތަރައްގީ ކުރުމާއި، އައުޓްޑޯ ޖިމެއްގެ މަސައްކަތް ކަމަށެވެ.
ރައޫފް ވިދާޅުވީ ސަރުކާރުން މި ދެ މަޝްރޫއު ކުރިއަށް ގެންދަނިކޮށް ކައުންސިލުން ޒަމާނީ ފެންވަރުގެ ވޮލީ ކޯޓެއް ތަރައްގީ ކޮށް ނިންމާފައިވާ ކަމަށެވެ. އަދި ސަރުކާރަށް ވުރެ ބޮޑަށް ކައުންސިލުން މަސައްކަތްތައް ކުރާނަމަ ސަރުކާރު ޕްރޮމޯޓް ނުވާނެ ކަމަށާއި، އެސަބަބާ ހުރެ ކައުންސިލްތަކަށް ދަތި ކުރަނީ ކަމަށް އޭނާ ވިދާޅުވި އެވެ.
އަސްލު އޭގެ ޒާތުގައި ބުނެވޭނީ ފުޓްބޯޅަ ދަނޑުތަކުގައި ތަންކޮޅެއް ކުރީ ޒަމާނުގައި ތަން ކޮޅެއް ކުޑަކުދީން ކުޅެން ފެށީމަ ދެން މާ މޮޅަށް ކުޅެން ފެށީމަ ހުއްޓުވާނެ. ކޮންމެވެސް ގޮތަކުން ދަނޑުން ބާލުވާނީ. ބޭރު ކުރެވޭ ގޮތަށް މަސައްކަތް ކުރާނީ. އެގޮތަށް ރާއްޖޭގެ ވަރަށް ގިނަ ރަށްރަށުގައި ވަރަށް ބައިވަރު ޕްރޮޖެކްޓްތައް ކައުންސިލްތަކުން ވަރަށް ބޮޑެތި ކަންކަން ފެށީ. ދެން އެހެން ނަމަވެސް ސަރުކާރުން މިރަށުައި ދެ ކަމެއް. ކުޑަ ކުދިންގެ ޕާކަކާ އައުޓް ޑޯ ޖިމެއް ފެށީ. ކައުންސިލްތަކުން ބޮޑެތި ކަންތައްތަކެއް. މިރަށު ކައުންސިލުން ވެސް ވޮލީ ކޯޓެއް ފަށާ ނިންމީ. އެތައް ޚިދުމަތްތަކެއް ގާއިމް ކުރިން. އެހެންވީމަ މިރަށާއި، ރާއްޖޭގެ އެހެން ރަށްރަށުން ފަށާ އެބޭފުޅުންނަށް ވުރެ ބޮޑަށް ރައްޔިތުންނަށް ފެންނަ ގޮތަށް ކައުންސިލުގެ މަސައްކަތްތައް ފެންނަން ފެށީމަ އެއްކަލަ ލާމަރުކަޒީ ނިޒާމުގެ މޮޅު ކަމާއި، ރައްޔިތުންނަށް އޭގެން ފެންނަން ހުރި ހެޔޮކަން ފެންނަން ފެށީމަ އެކަން ހުއްޓުވަން ޖެހޭ. ސަރުކާރު ޕްރޮމޯޓް ވާން ބޭނުންވަންޏާ.ނ. ކެނދިކުޅުދޫ ކައުންސިލްގެ ރައީސް މުހައްމަދު ރައޫފް
ރައޫފް ވިދާޅުވީ ލާމަރުކަޒީ ނިޒާމު އެމްޑީޕީ ނޫން އެހެން ސިޔާސީ ޕާޓީ އަކަށް ޓޮލަރޭޓް ނުކުރެވޭނެ ކަމަށެވެ. އަދި މިހާތަނަށް ރަށެއްގައި ރައްޔިތުން ބޭނުންވާ ގޮތަށް ކަންކަން އިންޕްލިމެންޓް ކުރަން ފުރުސަތު ދީފައިވަނީ އެމްޑީޕީން ކަމަށާއި، އެކަން މާޒީއަށް ބަލާއިރު ފެންނަން އޮބައޮތް ކަމަށް އޭނާ ވިދާޅުވި އެވެ.
